តាមការប្រកាសព័ត៌មានពីភាគីកូរ៉េខាងត្បូង មេដឹកនាំប្រទេសទាំងពីរបានព្រមព្រៀងគ្នា ដើម្បីពង្រឹងទំនាក់ទំនងទ្វេភាគីជាមួយគ្នាឡើងវិញ បន្ទាប់ពីបានតឹងសសៃកដាក់គ្នា ទាក់ទងនឹងរឿងអាវុធនុយក្លេអ៊ែរ ដែលកូរ៉េខាងជើងតែងតែបាញ់សាកល្បង ដើម្បីសម្ញែងទៅកាន់កូរ៉េខាងត្បូង ក៏ដូចជាពិភពលោកទាំងមូលផងដែរ។
ខុទ្ទកាល័យប្រធានាធិបតីកូរ៉េខាងត្បូង បានចេញសេចក្តីប្រកាសថា លោក ម៉ូន ជេអ៊ីន ប្រធានាធិបតីកូរ៉េខាងត្បូង និង បុរសជើងខ្លាំងវ័យក្មេង គីម ជុងអ៊ុន ប្រធានាធិបតីកូរ៉េខាងជើង បានឈានដល់កិច្ចព្រមព្រៀងលើការភ្ជាប់ទំនាក់ទំនងជាមួយគ្នាឡើងវិញ ជាមួយនឹងការពង្រឹងចំណងការទូតឲ្យបានប្រសើរជាងមុន កាន់តែឆាប់តាមដែលអាចធ្វើទៅបាន ក្រោយពីប្រទេសទាំងពីរបានផ្អាកទំនាក់ទំនងជាផ្លូវការរវាងគ្នាអស់រយៈពេលជាង២ឆ្នាំកន្លះមកហើយ។
ភ្លាមៗក្រោយការប្រកាសរបស់ ខុទ្ទកាល័យប្រធានាធិបតីកូរ៉េខាងត្បូង សារព័ត៌មានរដ្ឋកូរ៉េខាងជើង KCNA បានចេញសេចក្តីប្រកាសស្រដៀងគ្នា ដោយបានទទួលស្គាល់ការប្រកាសរបស់ភាគីកូរ៉េខាងត្បូង។
គួររំឭកថា ចំណងការទូតរបស់បងប្អូនកូរ៉េទាំងពីរ រមែងមានភាពរកាំរកូសនឹងគ្នាអស់ពេលជាច្រើនឆ្នាំមកហើយ។ គេនៅចាំបានថា កាលពីឆ្នាំទៅមិញរបបក្រុងព្យុងយ៉ាង ហាក់មានការខឹងសម្បាយ៉ាងខ្លាំងជាមួយក្រុងសេអ៊ូល ដែលបានបណ្តែតបណ្តោយឲ្យសកម្មជននយោបាយ ផ្សព្វផ្សាយសារនយោបាយតាមរយៈខិតបណ្ណ នៅតាមព្រំដែន ដោយបានបញ្ចុះបញ្ចូលពលរដ្ឋកូរ៉េខាងជើងឲ្យរត់គេច ឈប់រស់នៅក្រោមរបបក្រុងព្យុងយ៉ាង។
អត្ថបទគួរអាន
នយោបាយការទូតរបស់ក្រុងសេអ៊ូល កូរ៉េខាងត្បូង ដែលភាគច្រើនត្រូវបានគេមើលឃើញថា មានសហរដ្ឋអាមេរិកជាខ្នងបង្អែកដ៏ធំនៅពីក្រោយ រមែងដាក់សម្ពាធជានិច្ចមកលើក្រុងព្យុងយ៉ាង ជាពិសេសជុំវិញនឹងរឿងអាវុធនុយក្លេអ៊ែរ។
សូមរម្លេចបញ្ជាក់កន្លែងនេះបន្តិចថា ចំណងការទូតរវាងប្រទេសកូរ៉េទាំងពីរ ធ្លាក់ដល់ចំណុចអាក្រក់បំផុតក្រោយបរាជ័យក្នុងជំនួបចរចារជាប្រវត្តិសាស្ត្ររវាងអាមេរិក និង កូរ៉េខាងជើងកាលពីឆ្នាំ២០១៩ ក្រោមអាណត្តិ លោកដូ ណាល់ត្រាំ ដោយលោកបានបរាជ័យក្នុងការបញ្ចុះបញ្ចូលក្រុងព្យុងយ៉ាង ឲ្យបោះបង់ចោលកម្មវិធីអាវុធ នុយក្លេអ៊ែរ ដែលជាកម្មវិធីតែងតែគម្រាមកំហែងដល់សន្តិសុខរបស់កូរ៉េខាងត្បូង និង ប្រទេសក្នុងតំបន់។
ដោយឡែក អ្នកជំនាញផ្នែកភូមិសាស្ត្រនយោបាយក្នុងតំបន់ឧបទ្វីបកូរ៉េ បានបកស្រាយថា បន្ទាប់ពីភ្ជាប់ទំនាក់ទំនងជាមួយក្រុងសេអ៊ូលឡើងវិញ កូរ៉េខាងជើងទំនងជានឹងឈានទៅរកសហរដ្ឋអាមេរិកមួយទៀត ប្រសិនបើស្ថានភាពសេដ្ឋកិច្ចនៅកូរ៉េខាងជើងបន្តវិវត្តទៅរកការដួលរលំ។
មេដឹកនាំរដ្ឋកូរ៉េខាងជើង លោកគីម ជុងអ៊ុន ធ្លាប់បានប្រកាសប្រាប់ទៅប្រជាជនខ្លួនថា កូរ៉េខាងជើងអាចនឹងជួបគ្រោះអត់ឃ្លាន ដោយសារតែទណ្ឌកម្ម កង្វះស្បៀងអាហារ និង បញ្ហាវិបត្តិកូវីដ១៩។
របាយការណ៍ពីអង្គការសហប្រជាជាតិដែលបានចេញផ្សាយកាលពីពេលថ្មីៗនេះ បានឲ្យដឹងថា កូរ៉េខាងជើងកំពុងខ្វះខាតស្បៀងអាហារប្រហែល ៨៦ម៉ឺនតោននៅឆ្នាំនេះ ហើយ នឹងបន្ដកើនឡើង រិតតែអាក្រក់ថែមទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
