របាយការណ៍របស់មូលនិធិសន្តិភាព សាសាកាវ៉ា យូអេសអេ បានឱ្យដឹងថា អង្គភាពកងកម្លាំងអាម៉េរិក នៅជប៉ុន បានគ្រប់គ្រងកងទ័ពអាម៉េរិក ប្រហែល៥ម៉ឺន៣ពាន់នាក់ និងមូលដ្ឋានសំខាន់ៗចំនួន១៥ នៅជប៉ុន។ ប៉ុន្តែមិនមានទីបញ្ជាការប្រតិបត្តិការនោះទេ ខណៈអង្គភាពនេះមានបុគ្គលិកតែប្រហែល១៤០នាក់ប៉ុណ្ណោះ គឺតិចជាងពាក់កណ្តាលនៃចំនួនអង្គទូតអាម៉េរិក នៅទីក្រុងតូក្យូ ទៅទៀត។
ដោយមើលឃើញការកើនឡើងនូវសមត្ថភាពយោធារបស់ចិន ដូច្នេះហើយនៅខែកក្កដា ឆ្នាំ២០២៤ អតីតរដ្ឋមន្ត្រីការពារជាតិ អាម៉េរិក លោក ឡយ អូស្ទីន បានប្រកាសពីផែនការពង្រីកអង្គភាពកងកម្លាំងអាម៉េរិក នៅជប៉ុន ទៅជាទីស្នាក់ការកណ្តាលកងកម្លាំងរួមថ្មីមួយរបស់អាម៉េរិក ដើម្បីទទួលបន្ទុកជាចម្បងសម្រាប់ការសម្របសម្រួលសកម្មភាពសន្តិសុខទាំងក្នុង និងជុំវិញប្រទេសជប៉ុន។
ប៉ុន្តែកាលពីពេលថ្មីៗនេះ ក្រសួងការពារជាតិ អាម៉េរិក ក្រោមរដ្ឋបាលរបស់លោក ដូណាល់ ត្រាំ ប្រធានាធិបតីអាម៉េរិក កំពុងពិចារណាលុបចោលការពង្រីកអង្គភាពកងកម្លាំងអាម៉េរិក នៅជប៉ុន ដែលជាវិធានការមួយអាចសន្សំប្រាក់បានប្រហែលជាង១ពាន់លានដុល្លារ ពីការចំណាយលើបុគ្គលិក និងការពង្រីកបញ្ជាការដ្ឋាន និងការគ្រប់គ្រងអង្គភាពនេះ។
ការផ្លាស់ប្តូរនេះនឹងក្លាយជាផ្នែកមួយនៃការពង្រីកផែនការកាន់តែធំក្នុងការកាត់បន្ថយថវិកាដ៏សំខាន់របស់មន្ទីរបញ្ចកោណ រួមទាំងការបង្រួបបង្រួមបញ្ជាការប្រយុទ្ធ និងការបោះបង់ចោលនូវការដឹកនាំរបស់សហរដ្ឋអាម៉េរិក ទៅលើប្រតិបត្តិការយោធាណាតូ ផងដែរ។
ប្រសិនបើផែនការលុបចោលការពង្រីកអង្គភាពកងកម្លាំងអាម៉េរិក នៅជប៉ុន បានជោគជ័យមែន វាស្មើនឹងការដើរបញ្ច្រាសទាំងស្រុងទៅនឹងសមាហរណកម្មសម្ព័ន្ធភាព ខណៈកាលពីថ្ងៃទី៧ ខែកុម្ភៈ លោក ត្រាំ និងនាយករដ្ឋមន្ត្រីជប៉ុន លោក ស៊ីហ្គេរូ អ៊ីស៊ីបា បាននិយាយពីការពង្រីកក្របខណ្ឌបញ្ជាការដ្ឋាន និងការគ្រប់គ្រង នៃកងកម្លាំងអាម៉េរិក និងជប៉ុននៅក្នុងសេចក្តីថ្លែងការណ៍រួមមួយ៕
អត្ថបទ៖ សុខ មង្គល
