កាលពីថ្ងៃទី២៥ ខែកុម្ភៈ ឆ្នាំ២០២០ រដ្ឋបាលសាលារាជធានីភ្នំពេញ បានចេញលិខិតផ្សព្វផ្សាយមួយ ដើម្បីអញ្ជើញក្រុមហ៊ុនឯកជននានា ដែលមានសមត្ថភាព បទពិសោធន៍ និងហិរញ្ញវត្ថុគ្រប់គ្រាន់ ដើម្បីផ្តល់សេវាប្រមូល និងដឹកជញ្ជូមសំរាម និងសំណល់រឹងនៅរាជធានីភ្នំពេញ ក្រោមដំណើរការនិងនីតិវិធីលទ្ធកម្មតាមលក្ខណៈស្តង់ដារអន្តរជាតិ។ នៅក្នុងដំណើរលទ្ធកម្មនេះដែរ ត្រូវបានបែងចែកជា០២ដំណាក់កាលផ្សេងគ្នា ដែលក្នុងនោះក្រុមហ៊ុនឯកជន ដែលទទួលបានការជ្រើសរើសក្នុងដំណាក់កាលទី០១ នឹងមានសិទ្ធិចូលរួមដេញថ្លៃបន្ត ក្នុងដំណាក់កាលទី២ ឬហៅថាដំណាក់កាលលទ្ធកម្ម។
អត្ថបទគួរអាន
នៅក្នុងលិខិតដដែលនោះបានបញ្ជាក់ថា រាជធានីភ្នំពេញ ត្រូវបានបែងចែកជា០៣តំបន់ សម្រាប់អោយក្រុមហ៊ុនធ្វើការជ្រើសរើសក្នុងការផ្តល់សេវាប្រមូលនិងដឹកជញ្ជូនសំរាម សំណល់រឹងទៅតាមតំបន់នីមួយៗ ហើយក្រុមហ៊ុនក្នុងស្រុក ក្រុមហ៊ុនអន្តរជាតិ និងក្រុមហ៊ុនបណ្តាក់ទុនរួមគ្នាទាំងអស់ សុទ្ធតែអាចចូលរួមក្នុងដំណើរការលទ្ធកម្មនេះ។
ចំពោះការផ្សព្វផ្សាយពីដំណើរការចូលរួមក្នុងការធ្វើលទ្ធកម្មនេះដែរ ត្រូវបានលោក ម៉េត មាសភក្តី អ្នកនាំពាក្យសាលារាជធានីភ្នំពេញ បានអោយដឹងដែរថា ក្រុមហ៊ុនស៊ិនទ្រី នៅតែអាចមានសិទ្ធចូលរួមក្នុងការដេញថ្លៃ ដើម្បីមានសិទ្ធិគ្រប់គ្រងដឹកជញ្ជូនសំរាម និងសំណល់រឹងបន្តទៀតបាន។
យ៉ាងណាមិញ អ្នកនាំពាក្យរូបមិនអាចបញ្ជាក់ថា តើក្រុមហ៊ុនឯកជនទាំង៣ ដែលនឹងត្រូវចូលខ្លួនមកគ្រប់សំរាមជំនួសអោយក្រុមហ៊ុនស៊ិនទ្រីតែមួយកាលពីមុន នឹងត្រូវស្ថិតក្រោមការគ្រប់គ្រងរដ្ឋាករស្វយ័តគ្រប់គ្រងសំរាមរបស់សាលារាជធានី ដែលទើបតែបង្កើត កាលពីដើមខែមករានោះឬយ៉ាងណានោះទេ ដោយរងចាំការធ្វើសន្និសិទសារព័ត៌មានលំអិត នៅពាក់កណ្តាលខែមីនា ខាងមុខនេះសិន៕
None
