លោកបណ្ឌិត យង់ ពៅ អ្នកជំនាញវិទ្យាសាស្រ្តនយោបាយ បានលើកឡើងថា លោក អានុទីន ឆានវីរៈគុល កំពុងធ្វើតាមចលនាជ្រុលនិយមរបស់ថៃ ដោយមិនបានផ្អែកលើផលប្រយោជន៍ ឬសណ្ដាប់ធ្នាប់ក្នុងតំបន់នោះទេ ដោយថៃ កំពុងតែរុញច្រានស្ថានការណ៍ឱ្យកាន់តែតានតឹង និងកំពុងអូសទាញប្រទេសថៃ ឱ្យធ្លាក់ចូលនយោបាយបែបប្រជាភិថុតិ។ សម្រាប់អ្នកជំនាញរូបនេះ តាមរយៈយន្តការដែលមានស្រាប់រវាងកម្ពុជាថៃ កន្លងមក បានធ្វើឱ្យព្រំដែនសមុទ្ររវាងប្រទេសទាំងពីរបានស្ងប់សុខជាង២០ឆ្នាំមកហើយ ខណៈការសម្រេចចិត្តរបស់លោកអានុទីននេះ ថៃ កំពុងបំផ្លាញខ្លួនឯងទាំងក្នុងតំបន់ និងអន្តរជាតិ។
មិនខុសគ្នានោះទេ លោកបណ្ឌិត ស៊ឺន សំ អ្នកវិភាគគោលនយោបាយ និងជាអ្នកតាមដានព្រឹត្តិការណ៍អន្តរជាតិ យល់ឃើញថា ការសម្រេចលុប MOU 2001 របស់ថៃ ជាការធ្វើតាមអ្វីដែលលោក អានុទីន ឆានវីរៈគុល បានសន្យាជាមួយប្រជាពលរដ្ឋថៃ ក្នុងអំឡុងពេលឃោសនារកសំឡេងឆ្នោត។ សម្រាប់អ្នកជំនាញរូបនេះ ទោះការងាកមកប្រើយន្តការ UNCLOS ថៃ មានបំណងចង់បង្ហាញអន្តរជាតិ ឱ្យឃើញថា ខ្លួនគោរពច្បាប់អន្តរជាតិ ក៏ដោយ តែយន្តការ UNCLOS នេះ នឹងក្លាយជាអាវុធដ៏មានប្រសិទ្ធភាពសម្រាប់កម្ពុជា។ ទោះជាយ៉ាងណា លោកបានព្រមានឱ្យកម្ពុជា មានការប្រុងប្រយ័ត្នខ្ពស់ ព្រោះថៃ តែងតែរកច្រកណាដែលខ្លួនមានប្រៀប។
អត្ថបទគួរអាន
ដោយឡែក លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ ចាត់ទុកការងាកមកប្រើយន្តការ UNCLOS វាជាឱកាសដែលភាគីទាំងពីរត្រូវដឹកដៃគ្នាទៅកាន់តុលាការយុត្តិធម៌អន្តរជាតិ។ ទោះបីដំណើរការកាត់ក្តីអាចអូសបន្លាយពេលពី៣ទៅ៤ឆ្នាំ ប៉ុន្តែវានឹងផ្តល់នូវយុត្តិធម៌ដែលមិនអាចប្រកែកបាន និងបញ្ចប់ជម្លោះដោយសន្តិវិធី។
ពាក់ព័ន្ធគ្នានេះដែរ សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា បានបង្ហោះសារនៅលើបណ្ដាញសង្គមហ្វេសថា ការដោះស្រាយតំបន់ដែនសមុទ្រត្រួតស៊ីគ្នាតាមយន្តការច្បាប់សមុទ្រឆ្នាំ១៩៨២ ជាសក្ខីភាពដ៏ល្អមួយ ពីព្រោះមានភាគីទី៣ចូលរួមសម្រេច។ សម្ដេច បានគូសបញ្ជាក់ថា កម្ពុជា កំពុងធ្វើដំណើរទៅកាន់ច្បាប់អន្តរជាតិ ហើយបានផ្ដាំភាគីថៃ កុំឱ្យចោទប្រកាន់មកកម្ពុជាថា ធ្វើអន្តរជាតូបនីយកម្ម ហើយក៏មិនត្រូវនិយាយថា ធ្លាក់ចូលអន្ទាក់កម្ពុជាដែលចង់ឲ្យភាគីទី៣ចូលរួម ឬអន្តរជាតិចូលរួមនោះដែរ ជាពិសេសកុំបបួលកម្ពុជា រៀបចំយន្តការទ្វេភាគីថ្មីឡើងវិញជំនួសយន្តការទ្វេភាគីចាស់ ដែលថៃ លុបចោលជាឯកតោភាគីនាពេលថ្មីៗនេះ។ ប្រធានព្រឹទ្ធសភារំពឹងថា កម្ពុជា និងថៃនឹងអាចដឹកដៃគ្នាទៅកាន់យន្តការអន្តរជាតិ ដែលមានសមត្ថកិច្ចលើបញ្ហាសមុទ្ររវាងគ្នា៕
អត្ថបទ៖ ជា ម៉ារ៉ា
