ក្រសួងការបរទេសសហរដ្ឋអាមេរិកបានចុះបញ្ជីបេក្ខភាពដែលស្នើសុំទិដ្ឋាការមកពីប្រទេសរុស្សី ថាជា "ជនអនាថា" ក៏ព្រោះតែ ប្រទេសដែលសហរដ្ឋអាមេរិកមិនមានតំណាងកុងស៊ុល ឬស្ថានទូត ឬជាកន្លែងដែលបុគ្គលិកកុងស៊ុល មិនអាចចេញទិដ្ឋាការឲ្យបាន ដោយសារតែស្ថានភាពនយោបាយ ឬអសន្តិសុខ។
ប្រទេសរុស្ស៊ីបានក្លាយជាប្រទេសទី១០ នៅក្នុងបញ្ជីមួយនេះ បន្ទាប់ពីប្រទេសគុយបា អ៊ីរ៉ង់ លីប៊ី សូម៉ាលី ស៊ូដង់ខាងត្បូង ស៊ីរី វេណេហ្ស៊ុយអេឡា និង យេម៉ែន។
អ្នកនាំពាក្យក្រសួងការបរទេសរុស្សី បានចេញមករិះគន់ថា សហរដ្ឋអាមេរិកអស់ពេលជាច្រើនឆ្នាំមកហើយបាននិងកំពុងបំផ្លាញប្រព័ន្ធសេវាកម្មរបស់កុងស៊ុល និងស្ថានទូតនៅក្នុងប្រទេសរុស្ស៊ី ហើយកំពុងបង្កការលំបាកដល់ប្រជាជនរបស់ខ្លួន។អត្ថបទគួរអាន
គួរជម្រាបថា ទំនាក់ទំនងចាប់តាំងពីពេលក្រោយសង្គ្រាមត្រជាក់រវាងប្រទេសទាំងពីរ បានធ្លាក់ដល់កម្រិតទាបបំផុត ពោលគឺរុស្សីនិងសហរដ្ឋអាមេរិក កំពុងមានជម្លោះទាក់ទិននឹងបេសកកម្មការទូតរបស់ខ្លួន ដែលក្នុងនោះក៏រួមមានចំនួនអ្នកការទូត ដែលត្រូវបញ្ជូនទៅធ្វើការនៅក្នុងស្ថានទូត ក្នុងរដ្ឋធានីនៃប្រទេសទាំងពីរផងដែរ។
ជម្លោះស្ថានទូតរវាងប្រទេសទាំងពីរ អូសបន្លាយអស់ពេលយូរណាស់មកហើយ តែមិនទាន់រកផ្លូវចេញបាននោះទេ ចាប់តាំងពីអាមេរិក និងរុស្សីបានកោះហៅឯកអគ្គរដ្ឋទូតរៀងៗខ្លួនឲ្យត្រឡប់ចូលមកក្នុងប្រទេសវិញ ក្រោយទំនាក់ទំនងកាន់តែតានតឹង។
សូមជម្រាបថា បន្ថែមពីលើបញ្ហាស្ថានទូតនេះ នៅមានបញ្ហាធំៗពីរទៀត ដែលរុញច្រានឲ្យមហាអំណាចលើពិភពលោកទាំងពីរ មើលមុខគ្នាមិនត្រង់ គឺការចោទប្រកាន់ពីសំណាក់ភាគីអាមេរិកលើរុស្សីថាបាន លូកដៃចូលក្នុងការបោះឆ្នោតរបស់អាមេរិកចំនួនពីរដង និងចុងក្រោយកាលពីខែឧសភា គឺជាការវាយប្រហារតាមអ៊ីនធឺណែតលើក្រុមហ៊ុន និងប្រព័ន្ធបង្ហូរប្រេងនៅឆ្នេរសមុទ្រភាគខាងកើតរបស់អាមេរិក ដែលបានបណ្តាលឲ្យខាតបង់ប្រាក់អស់ជាច្រើនផងដែរ៕None
