កាលពីចុងសប្តាហ៍តុលា រុស្ស៊ីបានប្រកាសផ្អាកការចូលរួមនៅក្នុងកិច្ចព្រមព្រៀងនាំចេញគ្រាប់ធញ្ញជាតិពីកំពង់ផែសមុទ្រខ្មៅ ក្រោមហេតុផលដែលម៉ូស្គូចោទប្រកាន់ទៅលើអ៊ុយក្រែនថា បានវាយប្រហារដោយដ្រូនទៅលើកងនាវាចម្បាំងរបស់ខ្លួនក្នុងតំបន់គ្រីមៀ។ ប៉ុន្តែនៅថ្ងៃពុធ ទី២វិច្ឆិកា រុស្ស៊ីបានប្រកាសត្រឡប់ចូលកិច្ចព្រមព្រៀងវិញហើយ ដោយក្រសួងការពារជាតិរុស្ស៊ីបានអះអាងថា ឥឡូវនេះខ្លួនបានទទួលការធានាគ្រប់គ្រាន់ពីទីក្រុងកៀវថា នឹងមិនមានការប្រើប្រាស់ច្រកសមុទ្រខ្មៅដើម្បីជាគោលដៅប្រហារនោះទេ។
ទោះយ៉ាងណា បុរសខ្លាំងពូទីន បាននិយាយព្រមានរួចជាស្រេចថា រុស្ស៊ីអាចចាកចេញពីកិច្ចព្រមព្រៀងនេះម្តងទៀត ប្រសិនបើអ៊ុយក្រែនបំពានលើការធានារបស់ខ្លួន។
អគ្គលេខាធិការអង្គការសហប្រជាជាតិលោក Antonio Guterres បានស្វាគមន៍ការសម្រេចចិត្តរបស់រុស្ស៊ីក្នុងការបន្តការចូលរួមក្នុងកិច្ចព្រមព្រៀង ដែលត្រូវបានសម្របសម្រួលដោយ UN និងតួគីកាលពីខែកក្កដាមួយនេះ។
អត្ថបទគួរអាន
លោកប្រធានាធិបតី Volodymyr Zelenskyy បានបង្ហោះសារនៅលើគណនី Twitter របស់លោកដោយបានថ្លែងអំណរគុណដល់ប្រធានាធិបតីតួគី អ៊ែរដូហ្កាន សម្រាប់តួនាទីរបស់លោកក្នុងការរក្សា និងការពារកិច្ចព្រមព្រៀងនាំចេញគ្រាប់ធញ្ញជាតិអ៊ុយក្រែន។ ក្រោយមកមេដឹកនាំអ៊ុយក្រែនបានសាទរចំពោះការចាប់ផ្តើមនាំចេញឡើងវិញថា ជាលទ្ធផលការទូតដ៏សំខាន់សម្រាប់ប្រទេសអ៊ុយក្រែននិងពិភពលោកទាំងមូល។
គួរជម្រាបថា កិច្ចព្រមព្រៀងចតុភាគីដែលធ្វើឡើងតាំងតែពីខែកក្កដាមួយមួយនេះ នឹងត្រូវផុតកំណត់នៅថ្ងៃទី១៩វិច្ឆិកាឆ្នាំ២០២២នេះ។ ហេតុនេះ គេក៏កំពុងរកចាំមើលជំហររបស់អ៊ុយក្រែនផងដែរ ថានឹងបន្តកិច្ចព្រមព្រៀងនេះទៀតឬយ៉ាងណា។ អ្នកនាំពាក្យក្រសួងការបរទេសអាមេរិកលោក Ned Price បានអំពាវនាវកាលពីថ្ងៃពុធទី០២ ខែវិច្ឆិកា ឱ្យបន្តកិច្ចព្រមព្រៀងនេះ ដើម្បីរក្សាស្ថិរភាពនៅក្នុងទីផ្សារស្បៀងអាហារពិភពលោក។
គួរបញ្ជាក់ថា កិច្ចព្រមព្រៀងដដែលខាងលើបានអនុញ្ញាតឱ្យគ្រាប់ធញ្ញជាតិជិត ១០លានតោន និងគ្រឿងឧបភោគបរិភោគផ្សេងទៀត អាចនាំចេញពីកំពង់ផែអ៊ុយក្រែន ក្រោយជាប់គាំងជាច្រើនខែដោយសារសង្គ្រាម។ ប្រការនេះជួយសម្រួលយ៉ាងច្រើនដល់វិបត្តិស្បៀងអាហារសកល ដែលបង្កឡើងដោយសង្រ្គាមរវាងរុស្ស៊ី និងអ៊ុយក្រែន ដ្បិតថាអ្នកទាំងពីរនេះ ជាអ្នកនាំចេញគ្រាប់ធញ្ញជាតិដ៏សំខាន់សម្រាប់ពិភពលោក៕
