ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានមានប្រសាសន៍ថា សម្ដេចនឹងអញ្ជើញទៅសហរដ្ឋអាមេរិកនៅខែកុម្ភៈ ឆ្នាំ២០២២ ខាងមុខ ដើម្បីធ្វើជាសហប្រធាននៃកិច្ចប្រជុំកំពូលអាស៊ាន-អាមេរិក ជាមួយប្រធានាធិបតីអាមេរិក លោក ចូ បៃឌិន។ សម្ដេចបានបន្តថា តាមពិតទៅកិច្ចប្រជុំកំពូលអាស៊ាន-អាមេរិក នេះធ្លាប់គ្រោងធ្វើឡើងតាំងពីដើមឆ្នាំ២០២០ ដែលមានអតីតប្រធានាធិបតីសហរដ្ឋអាមេរិក លោក ដូណាល់ ត្រាំ ជាអ្នកកាន់អំណាចម្ល៉េះ ក៏ប៉ុន្តែ ដោយសារការរាតត្បាតជំងឺសាកលកូវីដ១៩ កិច្ចប្រជុំនេះ ត្រូវលើកពេលរហូតដល់ឆ្នាំ២០២២ ហើយសម្ដេចបានត្រៀមខ្លួនជាស្រេចដើម្បីចូលរួមក្នុងកិច្ចប្រជុំនេះ។
នេះជាលើកដំបូងសម្រាប់រដ្ឋបាលលោក ចូ បៃឌិន ដែលបានរៀបចំកិច្ចប្រជុំកំពូលទល់មុខគ្នា រវាងប្រធានាធិបតីអាមេរិកលោក ចូ បៃដិន និងមេដឹកនាំនៃតំបន់អាស៊ាន។ ខណៈលោក ចូ បៃឌិន បាននិងកំពុងព្យាយាមយកចិត្តទុកដាក់ និងផ្សះផ្សាទំនាក់ទំនង ព្រមទាំងចាប់ផ្ដើមធ្វើការជាមួយយអាស៊ានឡើងវិញ បន្ទាប់ពីកាលពីជំនាន់អតីតប្រធានាធិបតីអាមេរិក លោក ដូណាល់ ត្រាំ មិនសូវជាខ្វាយខ្វល់ពីអាស៊ាននោះទេ ជាពិសេសកិច្ចប្រជុំអាមេរិក-អាស៊ាននេះតែម្ដង ពោលគឺលោក បានចូលរួមកិច្ចប្រជុំកំពូល អាមេរិក-អាស៊ាន តែមួយដងគត់ក្នុងឆ្នាំ ២០១៧។
អត្ថបទគួរអាន
ដើម្បីផ្សាភ្ជាប់នូវទំនាក់ទំនងឱ្យកាន់តែស៊ីជម្រៅរវាងអាមេរិក និងតំបន់អាស៊ាន នាអំឡុងកិច្ចប្រជុំកំពូលអាស៊ាន-អាមេរិកលើកទី៩ ដែលបានធ្វើឡើងតាមប្រព័ន្ធអនឡាញ អំឡុងខែតុលា ឆ្នាំ២០២១ លោកចូ បៃឌិន ប្រធានាធិបតីអាមេរិក បានផ្ដល់ថវិកា ចំនួន១០០លានដុល្លារឱ្យអាស៊ានផងដែរ។ ជាមួយគ្នានេះ លោក បៃឌិន ក៏បានគូសបញ្ជាក់ថា ភាពជាដៃគូរបស់អាមេរិក និងអាស៊ាន មានសារៈសំខាន់ណាស់ ក្នុងការរក្សាសេរីភាពនៃតំបន់ឥណ្ឌូប៉ាស៊ីហ្វិក និងការបើកចំហ ដែលជាមូលដ្ឋានគ្រឹះនៃសន្តិសុខ និងវិបុលភាពរួមគ្នា។
សូមបញ្ជាក់ថា ទីប្រឹក្សានៃក្រសួងការបរទេសអាមេរិក លោក ដឺរេក ឆូលេត (Derek Chollet) ក៏នឹងធ្វើដំណើរទស្សនកិច្ចនៅកម្ពុជា និងឥណ្ឌូនេស៊ី ចាប់ពីថ្ងៃទី ០៨ ដល់ថ្ងៃទី ១៣ ខែធ្នូនេះផងដែរ ដើម្បីពិភាក្សាទាក់ទងនឹងវិបត្តិនៅប្រទេសភូមា។ ដំណើរទស្សនកិច្ចរបស់ទីប្រឹក្សាក្រសួងការបរទេសអាមេរិក ក៏នឹងពង្រឹងភាពជាកណ្តាលរបស់អាស៊ាន និងតួនាទីដែលអាស៊ានដើរក្នុងស្ថិរភាពតំបន់ កំណើនសេដ្ឋកិច្ច និងការរក្សាសណ្តាប់ធ្នាប់តាមច្រកសមុទ្រដែលផ្អែកលើច្បាប់ ជាពិសេសនៅសមុទ្រចិនខាងត្បូង។ ចំពោះដំណើរទស្សនកិច្ចនៅកម្ពុជាវិញ លោក ដឺរ៉េក នឹងពិភាក្សាអំពីតួនាទីជាប្រធានអាស៊ាននាពេលខាងមុខរបស់កម្ពុជា។ លោកក៏នឹងពង្រឹងការគាំទ្ររបស់សហរដ្ឋអាមេរិកសម្រាប់សង្គមស៊ីវិល និងប្រជាជនកម្ពុជា។ នេះបើតាមសេចក្ដីប្រកាសព័ត៌មានមួយរបស់ក្រសួងការបរទេសអាមេរិក៕
None
