កិច្ចប្រជុំនៃប្លុកដែលតំណាងឱ្យប្រមាណ៨០%នៃប្រជាជនពិភពលោក រួមជាមួយនឹងប្រទេសចិននេះ មានកម្មវត្ថុសំខាន់ផ្តោតសំខាន់លើកិច្ចសហប្រតិបត្តិការសេដ្ឋកិច្ច និងបញ្ហាធំៗលើសកលលោក ដូចជា សង្គ្រាមនៅអ៊ុយក្រែន បញ្ហាបម្រែបម្រួលអាកាសធាតុ ប្រព័ន្ធសេដ្ឋកិច្ចសាកល ពិសេសការស្រែកអំពាវនាវឱ្យមានការផ្លាស់ប្តូរសណ្តាប់ធ្នាប់អន្តរជាតិ ដឹកនាំដោយលោកខាងលិច។ នេះបើតាមការចុះផ្សាយដោយសារព័ត៌មានអន្តរជាតិធំៗ។
គុយបាដែលជាសមាជិកមួយនៃប្លុកG77នេះ គឺជាប្រធានប្តូរវេននៅឆ្នាំនេះ។ កិច្ចប្រជុំកំពូល ដែលមានរយៈពេលពីរថ្ងៃនៅទីក្រុង Havana ប្រទេសគុយបា គេឃើញមានការចូលរួមពីសំណាក់ប្រមុខរដ្ឋ ប្រមុខរដ្ឋភិបាល តំណាងប្រទេសជាសមាជិកជាង៣០ និងប្រមុខអង្គការសហប្រជាជាតិលោក Antonio Guterres ។ ដោយឡែក ប្រទេសចិន ដែលមិនមែនជាសមាជិកផ្លូវការនៃប្លុកនេះ ក៏បានបញ្ជូនតំណាងរបស់ខ្លួនគឺលោក Li Xi សមាជិកនៃគណៈកម្មាធិការអចិន្ត្រៃយ៍នៃបក្សកុម្មុយនិស្តចិន ឱ្យមកចូលរួមដែរ។
អត្ថបទគួរអាន
គួរជម្រាបថា ប្លុកG77 ត្រូវបានបង្កើតឡើង ដោយប្រទេសចំនួន៧៧ នៅលោកខាងត្បូងកាលពីឆ្នាំ១៩៦៤។ គោលបំណង នៃការបង្កើតប្លុកនេះ គឺដើម្បីរៀបចំ និងលើកកម្ពស់ផលប្រយោជន៍សេដ្ឋកិច្ច សមត្ថភាពចរចារួមគ្នា ក្នុងចំណោមបណ្តាប្រទេសកំពុងអភិវឌ្ឍ និងកំពុងរីកចម្រើន។ បច្ចុប្បន្ន សម្ព័ន្ធនៃប្លុកនេះ បានកើនសមាជិកដល់ ១៣៤ប្រទេស បើទោះបីជាចិនមិនមែនជាសមាជិកក៏ដោយចុះ ប៉ុន្ដែ ប្រទេសសេដ្ឋកិច្ចធំបំផុតទី២ក្នុងលោកមួយនេះ បានដើរតួជាអ្នកគាំទ្រដ៏សំខាន់នៅក្នុងរបៀបវារៈនយោបាយ។
នៅក្នុងកិច្ចប្រជុំកំពូលកាលកាលពីសប្ដាហ៍មុន គេសង្កេតឃើញមានការពិភាក្សាស៊ីជម្រៅលើកិច្ចសហប្រតិបត្តិសេដ្ឋកិច្ច ការកើនឡើងភាពតានតឹងភូមិសាស្ត្រនយោបាយ និងការសើរើចង់ឱ្យមានការផ្លាស់ប្តូរសណ្តាប់ធ្នាប់សេដ្ឋកិច្ចពិភពលោក ដែលមិនស្មើភាព នៅចំពោះមុខពិភពលោកពហុប៉ូល។
អគ្គលេខាធិការ UN លោក Antonio Guterres បានអំពាវនាវឱ្យពិភពលោករួមគ្នាឆ្លើយតបនឹងតម្រូវការប្រទេសកំពុងអភិវឌ្ឍ ដោយថា ពិភពលោកបច្ចុប្បន្នកំពុងជាប់ក្នុងអន្ទាក់នៃវិបត្តិសាកល។ ជាមួយគ្នានោះ តំណាងប្រទេសចិនលោក Li Xi បាននិយាយថា ចិននឹងនៅតែបន្តគាំទ្រកិច្ចសហប្រតិបត្តិការរវាងប្រទេសលោកខាងត្បូងនឹងខាងត្បូង (South-South) ជាអាទិភាព ក្រៅតែពីកិច្ចសហការពិភពលោកផ្សេងទៀត។ ទោះជាយ៉ាងណា រដ្ឋមន្ត្រីការបរទេសគុយបាលោក Bruno Rodriguez បានប្រាប់អ្នកសារព័ត៌មាននៅមុនកិច្ចប្រជុំថា G77 និងចិនទំងងជា នឹងចេញសេចក្តីថ្លែងការណ៍រួមគ្នាអំពាវនាវឱ្យមានការវិវត្តស្មើភាព នៅចំពោះវិសមភាព អយុត្តិធម៌ និងការកេងបន្លំរបស់សណ្តាប់អន្តរជាតិបច្ចុប្បន្ន។ ហើយនៅចំពោះមុខឧបសគ្គទាំងនេះ សម្ព័ន្ធG77នឹងត្រូវអំពាវនាវឱ្យមានការបង្កើតសណ្តាប់ធ្នាប់សេដ្ឋកិច្ចពិភពលោកថ្មី។
