អគ្គនាយិកាស្ថាប័នប្រឹក្សាយោបល់អចលនវត្ថុ Nexus Property Marketing Co. លោកស្រី Nalinrat Chareonsuphong បានបញ្ជាក់នៅក្នុងសារព័ត៌មាន បាងកកប៉ុស្ដិ៍នាពេលថ្មីៗនេះថាកត្តាអវិជ្ជមាននៅឆ្នាំ២០២០ ដែលកំពុងធ្វើឲ្យប៉ះពាល់ដល់វិស័យខុនដូនៅប្រទេសថៃនោះ គឺរួមមានទាំង ភាពមិនច្បាស់លាស់ក្នុងសេដ្ឋកិច្ចសកល និងសេដ្ឋកិច្ចថៃ, ការដាក់កម្រិតលើប្រាក់កម្ចី, ប្រាក់បាតថៃឡើងថ្លៃខ្ពស់ និងពន្ធថ្មីលើដីធ្លី និងអគារ។
លោកស្រី Nalinrat បាននិយាយថា «តម្លៃលុយបាតកើនឡើង គឺមិនបានលើកទឹកចិត្តជនបរទេសនោះទេ ខណៈដែលអ្នកទិញសម្រាប់ការវិនិយោគបានចាកចេញ នៅពេលដែលការដាក់កម្រិតលើប្រាក់កម្ចី បានចូលជាធរមានកាលពីខែ មេសាឆ្នាំនេះ។ លើសពីនេះ ពន្ធលើដីធ្លី និងអគារនឹងមានឥទ្ធិពលផ្លូវចិត្តទៅលើអ្នកដែលចង់ទិញខុនដូសម្រាប់ជួល»។
អត្ថបទទាក់ទង!
ដើម្បីជំរុញទីផ្សារអចលនទ្រព្យនៅឆ្នាំក្រោយ លោក ស្រី Nalinrat បានស្នើឲ្យមានការលើកទឹកចិត្តរួមមាន ការកាត់បន្ថយការចំណាយលើការផ្ទេរ និងប្រាក់កម្ចីមានទ្រព្យបញ្ចាំ មកនៅត្រឹម០,០១% ដែលគ្របដណ្ដប់លើខុនដូគ្រប់តម្លៃទាំងអស់ មិនមែនមានតែលើខុនដូដែលមានតម្លៃប្រមាណ១០ ម៉ឺនដុល្លារ ឬតិចជាងនេះនោះទេ។
ស្ថាប័នស្រាវជ្រាវទីផ្សារ Nexus បានរកឃើញថា ចំនួនខុនដូដែលលក់មិនដាច់នៅក្រុងបាងកក បានកើនឡើងដល់ ៦២.៧០០ យូនីត នៅក្នុងឆ្នាំ២០១៩ ខណៈដែលខុនដូលក់មិនដាច់សរុបមាន ៦៥៤.២០០ យូនីត។ ការបើកលក់ខុនដូថ្មីៗនៅក្រុងបាងកក នៅឆ្នាំ ២០១៩ ក៏មានការធ្លាក់ចុះ ២៩% ផងដែរ ធៀបនឹងឆ្នាំ២០១៨ ពោលគឺនៅមានត្រឹមតែ៤៣.០០០ យូនីតប៉ុណ្ណោះ។
ទីតាំងសំខាន់បំផុត៣ ដែលមានការបើកលក់ខុនដូថ្មីៗច្រើនជាងគេនៅឆ្នាំនេះ គឺស្ថិតនៅតាមបណ្ដោយខ្សែបណ្ដាញពង្រីកផ្លូវរថភ្លើង ឬផ្លូវដឹកជញ្ជូនធំៗ ដោយបានដឹកមុខដោយ ខណ្ឌ ថុនបូរី តាមបណ្ដោយផ្លូវ ផេត កាសេម ក្នុងក្រុងបាងកក ដែលមាន១០.១០០ យូនីត ស្មើនឹងប្រមាណ២៣% និងត្រូវបានតាមពីក្រោយដោយ តំបន់មានការពង្រីកមានផ្លូវរថភ្លើងនៅភាគខាងជើង ដែលជាប្រភេទខ្សែរថភ្លើងពណ៌ខៀវ ក្នុងខណ្ឌPhra Khanong និង Suan Luang ដែលមាន៧.៨០០ យូនីត ស្មើនឹងប្រមាណ ១៨% និងតំបន់តាមខ្សែរថភ្លើងពណ៌លឿង ក្នុងខណ្ឌ Phrao និង Wang Thong Lang មានង ៦.១០០ យូនីត ស្មើនឹង ១៤%។
តំបន់ផ្លូវ ផេត កាសេម ក្នុងខណ្ឌ ថុន បូរី ត្រូវបានគេមើលឃើញថា មានកំណើនការផ្គត់ផ្គង់ខុនដូខ្ពស់ជាងគេបំផុត ដែលមានកំណើនដល់ទៅ ៦៣% ដោយសារតែគម្រោងពង្រីកខ្សែរថភ្លើង ទើបតែត្រូវបានបញ្ចប់រួចរាល់ ហើយតម្លៃដីធ្លីនៅក្នុងតំបន់នោះ ក៏នៅមានទាបនៅឡើយ។
តម្លៃមធ្យមនៃខុនដូថ្មី នៅក្នុងក្រុងបាងកក មានការកើនឡើង ត្រឹមតែ ០,៩% ធៀបនឹងឆ្នាំ ២០១៨ ដែលមានតម្លៃកើនឡើងមកដល់ត្រឹមតែប្រមាណ ៤.៧០០ ដុល្លារអាមេរិក ក្នុងមួយម៉ែត្រការ៉េ ដែលកំណើននេះ គឺជាកំណើនទាបបំផុតក្នុងរយៈពេល ៥ឆ្នាំចុងក្រោយនេះ ដែលកំណើនជាមធ្យមកាលពីមុនមក គឺមាន៨%។
នៅឆ្នាំ២០១៩នេះ ការផ្គត់ផ្គង់ខុនដូ បានផ្លាស់ប្ដូរមកទីផ្សារថ្នាក់កណ្ដាលវិញ ដែលតម្លៃក្នុងមួយ យូនីត ចន្លោះពី ប្រមាណ ២.៥០០ ដុល្លារ ទៅ៣.៦០០ ដុល្លារ ក្នុងមួយម៉ែត្រការ៉េ។ តម្លៃខុនដូជាមធ្យមនៅឆ្នាំ២០១៩នេះ គឺធ្លាក់ចុះ១៥% ទាបជាងឆ្នាំ២០១៨។
អត្ថបទគួរឲ្យចាប់អារម្មណ៍
តម្លៃសរុបនៃខុនដូថ្នាក់កណ្ដាល ដែលបានដាក់លក់នៅក្រុងបាងកក នៅឆ្នាំនេះ បានកើនឡើងដល់ទៅប្រមាណ ៣ពាន់លានដុល្លារអាមេរិក ដែលកាលពីឆ្នាំមុន មានតែប្រមាណ ១,៧ ពាន់លានដុល្លារអាមេរិកប៉ុណ្ណោះ។ រីឯតម្លៃខុនដូថ្នាក់ខ្ពស់វិញ បង្ហាញពីការផ្គត់ផ្គង់ធ្លាក់ចុះ គឺនៅមានតែតែប្រមាណ ២,៤ ពាន់លានដុល្លារប៉ុណ្ណោះ ខណៈដែលកាលពីឆ្នាំមុនមានជាង ៤,៦ ពាន់លានដុល្លារអាមេរិក។
តម្រូវការខុនដូក្នុងក្រុងបាងកកនៅឆ្នាំនេះ សរុបមាន ៤៣.២០០ យូនីត ធៀបនឹងខុនដូបើកលក់ថ្មី មាន២០.៧០០ យូនីត នៅឆ្នាំ២០១៩ ហើយមានខុនដូ ២២.៥០០ យូនីត បានបើកលក់កាលពីឆ្នាំមុនៗ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
