ដោយមើលឃើញពីស្ថានការណ៍យ៉ាប់យ៉ឺនកាន់តែខ្លាំងបែបនេះ រដ្ឋាភិបាលអាមេរិក ដែលជាសម្ព័ន្ធមិត្តរបស់ឥណ្ឌានោះ បានប្រកាសថា ខ្លួននឹងគាំទ្រដល់រដ្ឋាភិបាល និង បុគ្គលិកសុខាភិបាលឥណ្ឌា ក្នុងការទប់ទល់នឹងវិបត្តិមេរោគឆ្លងក៏កាចសាហាវជាសកលមួយនេះ។ នេះយោងតាមការរាយការណ៍ដោយភ្នាក់ងារព័ត៌មាន Reuters។
អ្នកនាំពាក្យសេតវិមានអាមេរិក បានបញ្ជាក់នៅថ្ងៃអាទិត្យថា អាមេរិកមានការព្រួយបារម្ភយ៉ាងខ្លាំង ក្រោយមានករណីឆ្លងកូវីដ-១៩ យ៉ាងសម្បើម ប្រៀបបីដូចរលកយក្សស៊ូណាមិ ដែលកំពុងបោកបក់នៅក្នុងប្រទេសឥណ្ឌា ហើយអាមេរិកនឹងបន្ថែមការគាំទ្រថែមទៀត ចំពោះរដ្ឋាភិបាល និង បុគ្គលិកសុខាភិបាលឥណ្ឌា នៅក្នុងកាលៈទេសៈដ៏លំបាកនេះ។
ទីក្រុងវ៉ាស៊ិនតោន ត្រូវបានគេមើលឃើញថា កំពុងស្ថិតនៅក្នុងក្រសែភ្នែករបស់ពិភពលោក ជុំវិញនឹងការជួយប្រទេសឥណ្ឌា ដែលជាប្រទេសកាន់លិទ្ធិប្រជាធិបតេយ្យដ៏ធំបំផុតក្នុងពិភពលោក និង ជាសម្ព័ន្ធមិត្តយុទ្ធសាស្ត្រ នៅក្នុងកិច្ចខិតខំប្រឹងប្រែងរបស់ប្រធានាធិបតីអាមេរិក Joe Biden សម្រាប់ការប្រឆាំងទប់ទល់នឹងឥទ្ធិពលរបស់មហាយក្សចិន។
សភាពាណិជ្ជកម្មអាមេរិក កាលពីសុក្រសប្ដាហ៍មុននេះ បានស្នើទៅកាន់រដ្ឋបាលលោកចូ បៃឌិន ឲ្យបញ្ចេញវ៉ាក់សាំងកូវីដ-១៩ ប្រភេទ AstraZeneca ដែលបានស្ដុកទុក រាប់លានដូស ដើម្បីបញ្ជូនទៅកាន់ប្រទេសឥណ្ឌា ប្រេស៊ីល និង ប្រទេសដែលរងការវាយប្រហារខ្លាំងដោយសារកូវីដ-១៩។
មន្ត្រីជាន់ខ្ពស់សេតវិមានអាមេរិកបានគូសបញ្ជាក់ទៀតថា កាលពីពេលកន្លងទៅអាមេរិកបានផ្ដល់នូវជំនួយគិតជាទឹកប្រាក់ប្រមាណ ១ពាន់៤រយលានដុល្លារអាមេរិករួចហើយ ទៅឲ្យរដ្ឋាភិបាលឥណ្ឌា ក្នុងនោះរួមមាន ដូចជា ជំនួយសុខាភិបាល, ជំនួយសង្គ្រោះបន្ទាន់, ការបណ្ដុះបណ្ដាលមន្ត្រីរដ្ឋ និង មន្ត្រីសុខាភិបាលឥណ្ឌា ទាក់ទងនឹងការប្រយុទ្ធប្រឆាំងមេរោគឆ្លង និង ការផ្ដល់ជំនួយឧបករណ៍ជំនួយដង្ហើមជាដើម។
អត្ថបទទាក់ទង
តើអ្វីខ្លះទៅ ដែលឥណ្ឌាកំពុងខ្វះខាតខ្លាំងនៅពេលនេះ?
មិនមែនតែវ៉ាក់សាំងមួយមុខនោះទេ ដែលឥណ្ឌាកំពុងខ្វះខាត ក្នុងស្ថានភាពបច្ចុប្បន្ន ឥណ្ឌាកំពុងខ្វះខាតខ្លាំងបំផុត គឺបំពង់អុកស៊ីហ្សែន និង ឧបករណ៍ជំនួយដង្ហើមផ្សេងទៀត សម្រាប់ព្យាលបាលអ្នកជំងឺកូវីដ-១៩ ក៏ដូចជាគ្រែពេទ្យសម្រាប់អ្នកជំងឺ ដ្បិតថា បច្ចុប្បន្នចំនួនអ្នកឆ្លងហក់ឡើងរាប់សិបម៉ឺននាក់ទៅហើយ ក្នុងមួយថ្ងៃៗ ដែលធ្វើឲ្យចំនួនអ្នកឆ្លងសរុបនៅក្នុងប្រទេសដែលមានប្រជាជនច្រើនជាងគេបំផុតទី២ក្នុងលោកមួយនេះ បានកើនដល់ប្រមាណ១៧លាននាក់ហើយ ខណៈអ្នកស្លាប់សរុបវិញកើនដល់ប្រមាណជិត២០ម៉ឺននាក់។ នេះបើតាមតួលេខពីក្រសួងសុខាភិបាលឥណ្ឌា។
មានមន្ទីរពេទ្យជាច្រើននៅទីក្រុងញ៉ូដេលី កំពុងខ្វះខាតអុកស៊ីហ្សែនសម្រាប់អ្នកជំងឺ និងមានមន្ទីរពេទ្យខ្លះ ផ្អាកការទទួលយកអ្នកជំងឺដោយសារតែមិនមានអុកស៊ីហ្សែនដើម្បីសង្គ្រោះ។ រដ្ឋាភិបាលឥណ្ឌា ក៏បានខ្នះខ្នែងណាស់ដែរ ក្នុងការស្វែងរកអុកស៊ីហ្សែនសម្រាប់ផ្គត់ផ្គង់ឲ្យមន្ទីរពេទ្យ ដោយក្នុងនោះ រដ្ឋាភីបាលបានប្រើប្រាស់យន្ដហោះយោធា និងរថភ្លើង ដើម្បីទៅដឹកឧបករណ៍អុកស៊ីហ្សែនដែលមាននៅក្នុងប្រទេស សម្រាប់ការប្រើប្រាស់នៅក្នុងទីក្រុងញ៉ូដេលីដែលកំពុងខ្វះខាតខ្លាំង ហើយក្នុងនោះ ក៏មានការនាំចូលមកពីក្រៅប្រទេសផងដែរ ដូចជាពីប្រទេសសិង្ហបុរីជាដើម។
សូមបញ្ជាក់ថា តាមការវិភាគរបស់សារព័ត៌មាន Reuters ថ្មីៗនេះបានឲ្យដឹងថា ឥណ្ឌាទើបតែបានចាក់វ៉ាក់សាំងកូវីដ-១៩សម្រាប់ពលរដ្ឋរបស់ខ្លួនបានប្រមាណតែ៨%ប៉ុណ្ណោះ នៃចំនួនពលរដ្ឋសរុបជាង១ពាន់៣រយលាននាក់។ ដូច្នេះ គេអាចសន្និដ្ឋានបានថា ចំនួនសក្ដានុពលនៃការឆ្លងមេរោគកូវីដ-១៩ នៅឥណ្ឌាអាចនឹងបន្ដកើនឡើងថែមទៀតនៅពេលខាងមុខនេះ បើគ្មានវិធានការទប់ទល់ប្រកបដោយប្រសិទ្ធភាពខ្ពស់ទេនោះ៕
ចុច Like Facebook Page របស់ខេមបូណូមីសនិងចូលរួមក្នុង Telegram ដើម្បីទទួលបានព័ត៌មានថ្មីៗលឿនរហ័សមុនគេ: https://t.me/cambonomist
None
