ចំនួនអ្នកឆ្លងកូវីដ១៩ ហើយធ្លាក់ខ្លួនចូលមន្ទីរពេទ្យនៅអាមេរិក បានកើនដល់ជិត៥០% នៃចំនួនអ្នកឆ្លងសរុបប្រចាំថ្ងៃ ខណៈអ្នកកំពុងសម្រាកក្នុងមន្ទីរពេទ្យ បានកើនលើស១០ម៉ឺននាក់ហើយនាពេលនេះ។ នេះបើយោងតាមទិន្នន័យដែលរ៉យទ័របានវិភាគ។ នេះជាកំណើនលើកទីមួយហើយ ដែលអ្នកឆ្លងហើយត្រូវចូលមន្ទីរពេទ្យ បានកើនឡើងបែបនេះ បន្ទាប់ពីរលកឆ្លងដ៏កាចសហាវកាលពីរដូវរងារឆ្នាំមុន។
កាលពីសប្តាហ៍មុនៗ ករណីវិជ្ជមានកូវីដ១៩នៅអាមេរិកជាមធ្យមប្រចាំថ្ងៃ មានជិត៥០ម៉ឺននាក់ប៉ុណ្ណោះ ប៉ុន្តែនៅជិត៧ថ្ងៃចុងក្រោយនេះ អត្រាឆ្លងបានហក់ឡើងទ្វេដង ក្លាយជាតួលេខឆ្លងប្រចាំថ្ងៃខ្ពស់បំផុត បើធៀបនឹងប្រទេសនានាក្នុងពិភពលោក។ ជាក់ស្តែង នៅថ្ងៃច័ន្ទទី០៣ មករាដើមសប្តាហ៍នេះ អ្នកឆ្លងកូវីដ១៩ប្រចាំថ្ងៃនៅអាមេរិក បានកើនឡើងដល់ជាង ៩៧ម៉ឺននាក់។
យ៉ាងណាមិញ អត្រាស្លាប់នៅសហរដ្ឋអាមេរិក ហាក់នៅកម្រិតដដែល មិនមានការកើនឡើងឬថយចុះនោះទេ ដោយមានចំនួនអ្នកស្លាប់ជាមធ្យម ១.៣០០នាក់ក្នុងមួយថ្ងៃ។ នេះបើតាមរបាយការណ៍ដែលតាមដាន និងចងក្រងដោយរ៉យទ័រដដែល។
អត្ថបទគួរអាន
បើគេមើលលើសកម្មភាពរបស់អូមីក្រុងនៅសហរដ្ឋអាមេរិកវិញឃើញថា មេរោគកូវីដ១៩បំប្លែងខ្លួនប្រភេទនេះ មិនបានបង្ហាញពីសញ្ញាថមថយឡើយ ពោលវាបានតំណាងឲ្យជាង៩៥% នៃករណីវិជ្ជមានទាំងអស់ដែលគេមានរកឃើញនៅអាមេរិក គិតត្រឹមថ្ងៃទី០១ខែមករា។ នេះបើតាមការឲ្យដឹងពី មជ្ឈមណ្ឌលគ្រប់គ្រង និងបង្ការជំងឺឆ្លងអាមេរិក CDC។
សូមជម្រាបថា ក្រោយកត់ត្រាពីករណីឆ្លងប្រចាំថ្ងៃកើនឡើងដូចនេះ សេតវិមានអាមេរិកកាលពីថ្ងៃអង្គារ បានប្រកាសថា ខ្លួនកំពុងត្រៀមឧបករណ៍តេស្តរហ័សចំនួន ៥០០លាន សម្រាប់ចែកចាយដោយឥតគិតថ្លៃដល់ពលរដ្ឋអាមេរិក។ គំនិតផ្តួចផ្តើមនេះមានគោលបំណងជួយសម្រាលបញ្ហាខ្វះខាតការធ្វើតេស្ត និងកាត់បន្ថយការកកស្ទះ ពេលពលរដ្ឋរង់ចាំយកសំណាកនៅទីសាធារណៈ៕
None
