ក្រុមហ៊ុនវៀតណាម Hoang Anhgia Lai នេះ បច្ចុប្បន្នមានដីសម្បទាន ដាំដុះកៅស៊ូនៅខេត្តរតនគីរី និងបានដាំដុះចេកប្រមាណជាង ១០០ ហិកតានៅកម្ពុជាផងដែរ ដើម្បីនាំទៅវៀតណាម និងបន្តនាំចេញទៅប្រទេសចិន។
ក្រុមហ៊ុនវៀតណាមធំមួយនេះ បានបង្ហាញពីគម្រោងពង្រីកការដាំដុះចេកនៅកម្ពុជាឲ្យបានដល់ ៥ពាន់ហិកតា ដោយចំណាយដើមទុន ៤២លានដុល្លារអាមេរិក ដើម្បីនាំចេញទៅកាន់ទីផ្សារប្រទេសចិន ខណៈដែលក្នុងមួយឆ្នាំៗ ចិនមានតម្រូវការនាំចូលចេកប្រមាណ ១៥លានតោន។
លោកឧកញ៉ា ហ៊ុន ឡាក់ នាយកក្រុមហ៊ុន Longmate Agriculture Co.,Ltd ដែលទើបតែបានចាប់ដៃគ្នាជាមួយក្រុមហ៊ុនចិន វិនិយោគ ដាំចេក ១ពាន់ហិកតានៅខេត្តកំពត បានឲ្យដឹងដែរថា លោកក៏ធ្លាប់បានដឹងខ្លះៗដែរ ពីក្រុមហ៊ុនវៀតណាម Hoang Anhgia Lai នេះ ដែលដើមឡើយ មានដីសម្បទានដាំដុះកៅស៊ូ តែក្រោយមកក្រុមហ៊ុននេះ ក៏បានដាំចេកជាង ១០០ ហិកតា នៅខេត្តរតនគីរី ដើម្បីនាំយកទៅវៀតណាម សម្រាប់នាំចេញបន្តទៅកាន់ប្រទេសចិន។
អត្ថបទទាក់ទង!
លោកឧកញ៉ា យល់ឃើញថា ជាធម្មតាទេ ក្រុមហ៊ុនវៀតណាម Hoang Anhgia Lai នេះ មានដីសម្បទាននៅកម្ពុជាស្រាប់ ដុច្នេះ ពេលមានតម្រូវការចេកនាំចេញទៅចិនកំពុងមានសក្ដានុពល គេអាចនឹងបង្វែរពីការដាំកៅស៊ូ មកពង្រីកការដាំចេកវិញ។ ទោះយ៉ាងណា លោកឧកញ៉ា ហ៊ុន ឡាក់ ជឿជាក់ថា ខាងក្រសួងនឹងបន្តតាមដាន និងចុះត្រួតពិនិត្យជាក់ស្ដែងបន្ថែមទៀត អំពីដំណើរការនានា របស់ក្រុមហ៊ុនវៀតណាមនេះ ដើម្បីឲ្យច្បាស់ថា មានការដាំដុះបានត្រឹមត្រូវតាមលក្ខណៈបច្ចេកទេស។
ជុំវិញនឹងរឿងនេះដែរ ឯកឧត្តម ហ៊ាន វណ្ណហន បានឲ្យដឹងថា តាមពិតទៅ ក្រុមហ៊ុនវៀតណាមដែលប្រកាសខ្លួនថា នឹងពង្រីកការដាំដុះចេកនៅកម្ពុជា ៥ពាន់ហិកតានេះ មិនមែនមានជាក្រុមហ៊ុនថ្មីនោះទេ ពោលគឺក្រុមហ៊ុននេះ បានដាំដុះចេកជាច្រើនហិកតារួចហើយ នៅខេត្តរតនគីរី ហើយក៏ជាក្រុមហ៊ុនទីមួយនៅកម្ពុជា ដែលដាំចេក ដើម្បីនាំយកទៅវៀតណាម និងនាំទៅលក់បន្តនៅប្រទេសចិន។ ឯកឧត្តមបន្ថែមថា នៅក្នុងដីសម្បទានដែលក្រុមហ៊ុនវៀតណាមនោះទទួលបាន ក្រៅពីដំណាំចេក ក៏មានដាំស្រកានាគផងដែរ ដែលបានដឹកតាមកុងតឺន័រនាំចេញទៅវៀតណាមស្ទើរតែរៀងរាល់ថ្ងៃ។
យ៉ាងណាក៏ដោយចុះ ឯកឧត្តម ហ៊ាន វណ្ណហន បានបញ្ជាក់ថា មកទល់ពេលនេះ ក្រុមហ៊ុននេះ មិនទាន់បានដាក់ពាក្យស្នើសុំមកក្រសួងកសិកម្ម ដើម្បីនាំចេកទៅកាន់ប្រទេសចិននៅឡើយទេ។ តែយ៉ាងណា ឯកឧត្តម បានគូសបញ្ជាក់ថា ក្រសួងស្វាគមន៍ចំពោះវិនិយោគរបស់ក្រុមហ៊ុននេះ ហើយប្រសិនបើក្រុមហ៊ុនវៀតណាមនេះ ចង់នាំចេកទៅកាន់ប្រទេសចិនដែរ ទាមទារឲ្យមានគោរពទៅតាមលក្ខខណ្ឌអនាម័យ និងភូតគាមអនាម័យ ដូចដែលភាគីចិនបានកំណត់។
បច្ចុប្បន្ន ក្រុមហ៊ុន Hoang Anhgia Lai របស់វៀតណាមមួយនេះ កំពុងដាំដុះចេកប្រមាណជាង ១,៣ ម៉ឺនហិកតា នៅក្នុងប្រទេសចំនួនបី គឺវៀតណាម ឡាវ និងកម្ពុជា។ នៅឆ្នាំនេះ ក្រុមហ៊ុនវៀតណាម មួយនេះ រំពឹងថា នឹងប្រមូលទិន្នផលចេកបានលើស ១០ម៉ឺនតោន ជាមួយនឹងចំណូលក្នុងរង្វង់ ៧៣លានដុល្លារអាមេរិក និងប្រាក់ចំណេញ ៤២លានដុល្លារ។ មិនតែប៉ុណ្ណោះ ក្រៅពីនាំចេកទៅកាន់ទីផ្សារប្រទេសចិន ក្រុមហ៊ុន Hoang Anh Gai Lai ក៏សង្ឃឹមដែរថា នឹងអាចនាំចេញចេកប្រមាណ ២០% ផ្សេងទៀត ទៅកាន់ទីផ្សារប្រទេសកូរ៉េខាងត្បូង និងជប៉ុនផងដែរ។
សូមជម្រាបថា ប្រទេសកម្ពុជា និង ចិន ថ្មីៗនេះ ក៏បានសម្រេចចិត្តបោះទុន វិនិយោគរួមគ្នា ក្នុងទឹកប្រាក់ ប្រមាណ ជាង ៣២លានដុល្លារអាមេរិក សម្រាប់ការវិនិយោគទៅលើដំណំាចេកអំបូងលឿង ដើម្បីធ្វើការនាំចេញទៅកាន់ទីផ្សារអន្តរជាតិពិសេសទីផ្សារប្រទេសចិន ដោយក្នុងដំណាក់កាលដំបូង ដាំដុះលើផ្ទៃដីប្រមាណជាង ១ពាន់ហិកតា ដែលស្ថិតនៅក្នុងស្រុកឈូក ខេត្តកំពត។
សព្វថ្ងៃប្រភេទចេកអំបូងលឿងនេះ កំពុងតែមានតម្រូវការទីផ្សារខ្ពស់ ខណៈប្រទេសចិនជាប្រទេសដែលមានវិនិយោគលើដំណាំចេកនាំចេញច្រើនជាងគេមួយ បន្ទាប់ពីប្រទេសហ្វីលីពីនកំពុងតែជួបប្រទះនៅឧសបសគ្គហានិភ័យផ្សេងៗដូចជា ជំងឺស្លឹកលឿង និង ការបម្រែបម្រួលអាធាតុត្រជាក់ខ្លាំង បានធ្វើឲ្យផ្ទៃដីដាំដុះ និង ទិន្នផលមានការថយចុះយ៉ាងខ្លាំងនៅពេលបច្ចុប្បន្ន។
ការវិនិយោគចេករាប់ពាន់ហិកតានេះ អាចរាប់ចាត់ទុកថា ជាការវិនិយោគដ៏ធំជាងគេមួយមិនធ្លាប់មានក្នុងប្រវតិ្តសាស្រ្តរបស់ប្រទេសកម្ពុជា ក្នុងការវិនិយោគទៅលើការដាំចេកអំបូងលឿង ពិសេសដែលជាពូជចុងក្រោយ ដែលទើបតែសម្រេចបានមកពីការស្រាវជ្រាវនឹងពិសោធន៍ ថាមានគុណភាពខ្ពស់។
តាមទិន្នន័យពីអគ្គនាយកដ្ឋានកសិកម្មបានបង្ហាញថា បច្ចុប្បន្ននៅកម្ពុជាមានកសិដ្ឋានធំៗចំនួន ៣ កំពុងដាំចេកសម្រាប់នាំចេញមានក្នុងខេត្តរតនគិរី ក្រចេះ និងខេត្តកំពតដែលមានផ្ទៃដីសរុបជិត ៥ពាន់ហិកតា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
