លោកជំទាវ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានឲ្យដឹងថា ខាងក្រុមហ៊ុន AstraZeneca បានផ្តល់អាជ្ញាបណ្ណដល់ក្រុមហ៊ុននៅប្រទេសឥណ្ឌា ដើម្បីផលិត ដែលវ៉ាក់សាំងផលិតនៅឥណ្ឌានោះដាក់ឈ្មោះថា កូវីហ្សែល ហើយវ៉ាក់សាំងនេះ គឺខុសគ្នាពីវ៉ាក់សាំង AstraZeneca ដែលគេកំពុងប្រើប្រាស់នៅអឺរ៉ុប។
លោកជំទាវ ឱ វណ្ណឌីន បានពន្យល់ថា៖ « អ្វីដែលយើងថា វាមិនដូចគ្នាទៅនឹងវ៉ាក់សាំងនៅអឺរ៉ុបនោះ គឺខ្ញុំបានបញ្ជាក់ជូនហើយ គឺត្រង់ថា វាមិនស្ថិតនៅក្នុង Batch នៅក្នុងចង្កោមនៃវ៉ាក់សាំងដែលផលិតនៅខាងប្រទេសអង់គ្លេសនោះ ហើយដែលបានចែកចាយប្រើនៅប្រទេសនៅក្នុងអឺរ៉ុបនោះទេ ពីព្រោះយើងនេះវាស្ថិតនៅក្នុងក្រុមផ្សេង Batch ផ្សេង»។
អត្ថបទទាក់ទង!
ខាងក្រោមនេះ ជាហេតុផលសំខាន់ទាំង៨ ដែលក្រសួងសុខាភិបាលអះអាងថា កម្ពុជានៅតែអាចបន្តការចាក់វ៉ាក់សាំង AstraZeneca (កូវីហ្សែល) ដែលផលិតនៅប្រទេសឥណ្ឌានេះ៖
ទី១ វ៉ាក់សាំង ដែលយើងកំពុងប្រើនៅស្រុកខ្មែរនេះ មានឈ្មោះថាកូវីហ្សែល គឺផលិតនៅឥណ្ឌា ហើយគ្រាន់តែទទួលបានអាជ្ញាបណ្ណផលិតពីក្រុមហ៊ុន AstraZeneca។
ទី២ វ៉ាក់សាំងដែលកំពុងប្រើប្រាស់នេះ អង្គការសុខភាពពិភពលោក គេបានដាក់បញ្ចូលទៅក្នុងបញ្ជីប្រើប្រាស់បន្ទាន់រួចទៅហើយ។
ទី៣ តាមការបញ្ជាក់របស់អង្គការសុខភាពពិភពលោកនេះ គេមានការចែកចាយប្រើប្រាស់នៅតាមបណ្តាប្រទេសនៅលើសកលលោករាប់លានដូសទៅហើយ គឺប្រមាណជិត៣០០លានដូសទៅហើយ។
ទី៤ វ៉ាក់សាំងដែលយើងកំពុងប្រើនេះ វាមិនស្ថិតនៅក្នុងក្រុមវ៉ាក់សាំង ដែលកំពុងតែប្រើប្រាស់នៅខាងសហគមន៍អឺរ៉ុបនោះទេ។
ទី៥ អង្គការសុខភាពពិភពលោកនិយាយថា ខ្លួនមិនទាន់ទទួលបាននូវរបាយការណ៍ណាមួយពីបណ្តាប្រទេសដែលបានប្រើប្រាស់វ៉ាក់សាំងដែលដូចកម្ពុជាកំពុងប្រើ ដែលថាវ៉ាក់សាំងនេះ មានប្រតិកម្មរំខាន ឬប្រតិកម្មអ្វីមួយដែលធ្ងន់ធ្ងរនោះទេ។
ទី៦ អង្គការសុខភាពពិភពលោកបានបញ្ជាក់ហើយ បញ្ហាដែលថា មានកកឈាមស្ទះនៅក្នុងសសៃនោះ វាអត់មានទំនាក់ទងអ្វីជាមួយនោះទេ វាជាករណីចៃដន្យ ដែលវាកើតឡើងចំពេលដែលចាក់វ៉ាក់សាំងប៉ុណ្ណោះ។
ទី៧ អង្គការសុខភាពពិភពលោក កំពុងតែបន្តធ្វើការសិក្សាទៅលើបញ្ហានានា ដែលមានការលើកឡើង ហើយនៅពេលណាដែលមានរបកគំហើញអ្វីថ្មីទៀត គេនឹង រាយការណ៍ជូនជាសាធារណៈជូនប្រជាជាតិលើសកលលោក
ទី៨ អង្គការសុខភាពពិភពលោក គេនៅតែផ្តល់នូវអនុសាសន៍ឲ្យបន្តនូវការចាក់វ់ាក់សាំងនេះ AstraZeneca ហើយជាពិសេសអង្គការសុខភាពពិភពលោកប្រចាំនៅកម្ពុជាបានបញ្ជាក់ថា គ្មានហេតុផលអ្វីដែលកម្ពុជា ត្រូវផ្អាកការចាក់វ៉ាក់សាំងAstraZeneca (កូវីហ្សែល)នេះទេ៕
None
