ទោះយ៉ាងណា ក្រុមអ្នកវិភាគក៏បានព្យាករបន្ទាបតម្លៃប្រេងនៅឆ្នាំ២០២២នេះ ទាបជាងមុនផងដែរ ដោយមើលឃើញពីឥទ្ធិពលនៃមេរោគអូមីក្រុង ដែលអាចនឹងបង្កការរំខានដល់តម្រូវការប្រេងពិភពលោក។ នេះបើតាមការរាយការណ៍ដោយសារព័ត៌មានអន្តរជាតិធំៗជាច្រើន។
បើទោះបីជាមានក្ដីបារម្ភកើនឡើង អំពីអូមីក្រុងយ៉ាងណាក្ដី ប៉ុន្ដែ តម្លៃប្រេងឆៅនៅអង់គ្លេសនៅថ្ងៃចន្ទដើមសប្ដាហ៍នេះ បានកើនឡើង៦៧សេន បន្ថែមទៀតដោយតម្លៃ ៧៨ដុល្លារ៤៥សេនមួយធុងបារ៉ែល ខណៈដែលប្រេងឆៅនៅអាមេរិកវិញ កើនឡើង៧៧សេន កើនជាង១% ដោយបានធ្វើឲ្យតម្លៃប្រេងឡើងដល់ ៧៥ដុល្លារ៩៨សេនក្នុងមួយធុងបារ៉ែល។
បើមើលទៅលើតម្លៃប្រេង កាលពីឆ្នាំ២០២១ដែលទើបតែបិទបញ្ចប់ថ្មីៗនេះវិញ គឺបានកើនឡើងដល់ប្រមាណ ៥០% ធៀបនឹងឆ្នាំ២០២០ ដោយមានការជំរុញដោយការស្ទុះងើបឡើងវិញនៃសេដ្ឋកិច្ចពិភពលោកពីការដាំក្បាលចុះ និងការកម្រិតលើការផលិតប្រេងពីសំណាក់ប្រទេសផលិតប្រេងធំៗ បើទោះបីជា នៅឆ្នាំ២០២១កន្លងទៅនេះ មានការឆ្លងកូវីដ១៩បន្ដកើនឡើងកាន់តែច្រើននៅជុំវិញពិភពលោកយ៉ាងណាក្ដី។
ទោះយ៉ាងណា ទីផ្សារប្រេងពិភពលោក នៅតែបន្ដស្ថិតនៅក្នុងការគំរាមកំហែង ដោយសារតែមេរោគបំប្លែងថ្មីអូមីក្រុងដដែល តួយ៉ាង នៅមួយរយៈចុងក្រោយមកនេះ មានការលុបចោលការធ្វើដំណើរតាមផ្លូវអាកាសរាប់ពាន់ជើងឯណោះ ខណៈរដ្ឋាភិបាលប្រទេសជាច្រើន ក៏បានដាក់ចេញវិធានការរឹតត្បិតជាងមុនដែរ ដើម្បីទប់ទល់នឹងការឆ្លងរាលដាលកូវីដ១៩អូមីក្រុង។
អ្នកជំនាញផ្នែកសុខាភិបាលអាមេរិក បានព្រមានដល់ពលរដ្ឋអាមេរិកាំងឲ្យត្រៀមខ្លួនសម្រាប់ការរំខានធ្ងន់ធ្ងរដែលអាចនឹងកើតមានឡើងនៅក្នុងប៉ុន្មានសប្ដាហ៍ខាងមុខនេះ ដោយអត្រាឆ្លងកូវីដ១៩នៅអាមេរិក ទំនងជាអាចនឹងកាន់តែមានស្ថានភាពអាក្រក់ទៅៗ ដោយសារតែមានការធ្វើដំណើរច្រើននៅអំឡុងឈប់សម្រាកពេលឆ្លងឆ្នាំថ្មី២០២១-២០២២ ស្របពេលដែលសាលារៀននៅអាមេរិកក៏នឹងបើកឡើងវិញបន្ទាប់ពីឈប់សម្រាករដូវរងាររួចផងដែរ។អត្ថបទគួរអាន
ក្រុមអ្នកវិភាគទីផ្សារប្រេង បានបន្ទាប់ការព្យាករបស់ខ្លួនចំពោះតម្លៃប្រេងនៅឆ្នាំ២០២២នេះ ដោយសារតែមេរោគបំប្លែងថ្មីអូមីក្រុង កំពុងបង្កព្យុះភ្លៀងកាន់តែខ្លាំងទៅលើការងើបឡើងនៃតម្រូវការប្រើប្រាស់ប្រេង និងហានិភ័យដល់ការផ្គត់ផ្គង់ប្រេង ខណៈដែលប្រទេសផលិតប្រេងក៏គ្រោងនឹងបង្កើនការបូមប្រេងបន្ថែមដែរ។ នេះបើតាមការស្ទង់មតិមួយពីរ៉យទ័រ។
ការស្ទង់មតិដដែលនេះ បានព្យាករថា តម្លៃប្រេងឆៅនៅអង់គ្លេស នឹងមានជាមធ្យមក្នុងតម្លៃ ៧៣ដុល្លារ៥៧សេនក្នុងមួយធុងបារ៉ែលនៅឆ្នាំ២០២២ ទាបជាងប្រហែល ២%ធៀបនឹងតម្លៃកាលពីខែវិច្ឆិកាឆ្នាំ២០២១។ រីឯ តម្លៃប្រេងឆៅនៅអាមេរិកវិញ ត្រូវបានព្យាករបន្ទាបផងដែរ ដោយតម្លៃជាមធ្យមនឹងមាន ៧១ដុល្លារ៣៨សេនក្នុងឆ្នាំ២០២២។
សូមបញ្ជាក់ថា អង្គការប្រទេសអ្នកនាំចេញប្រេង រួមទាំងប្រទេសរុស្ស៊ី និងសម្ព័ន្ធមិត្ត ហៅកាត់ថា OPEC+ ប្រហែលជានឹងបន្ដផែនការរបស់ពួកគេដដែល ដោយនឹងផលិតប្រេងបន្ថែមប្រមាណ ៤០ម៉ឺនបារ៉ែលក្នុងមួយថ្ងៃ សម្រាប់ការផ្គត់ផ្គង់នៅក្នុងខែកុម្ភៈខាងមុខនេះ មុននឹងមានការគិតគូរពីផែនការថ្មីទៀត៕None
