លោកជំទាវ ជា សិរី អះអាងថា បច្ចុប្បន្ននៅកម្ពុជាមានតែ app អេស៊ីលីដាម៉ូបាល របស់ធនាគារអេស៊ីលីដា ប៉ុណ្ណោះ ដែលអាចស្កែន QR Code ទូទាត់ជាមួយអ្នកលក់ទំនិញក្នុងប្រទេសថៃ ដែលប្រើធនាគារ SCB ថៃ ។ លោកជំទាវបានបន្ថែមថា នៅឆ្នាំក្រោយអ្នកប្រើប្រាស់ app ធនាគារទាំងអស់នៅកម្ពុជា នឹងអាចទូទាត់បានកាន់តែទូលំលាយ ជាមួយអ្នកប្រើប្រាស់ធនាគារក្នុងស្រុកថៃ បន្ទាប់ពីគ្រឹះស្ថានធនាគារទាំងពីរធ្វើបច្ចុប្បន្នភាពព័ត៌មានវិទ្យារួចរាល់។
អត្ថបទគួរអាន
ក្នុងដំណើរទស្សនកិច្ចនៅប្រទេសថៃ លោកជំទាវ ជា សិរី ឧបការីទេសាភិបាលធនាគារជាតិនៃកម្ពុជាបានលើកឡើងដូច្នេះថា៖ «ទីបំផុតបានសាកចាយលុយដោយប្រើ QR កូដ នៅប្រទេសថៃ ដោយប្រើ app ធនាគារ ACLEDA ។ បច្ចុប្បន្ន មានតែអ្នកប្រើ app ACLEDA ទេ ដែលអាចចាយបានជាមួយអ្នកលក់ដែលប្រើធនាគារ SCB ថៃ។ ឆ្នាំក្រោយ នាពេលគ្រឹះស្ថានធនាគារ ទាំង២ប្រទេស ធ្វើបច្ចុប្បន្នកម្មប្រព័ន្ធព័ត៌មានវិទ្យារួចរាល់ អ្នកប្រើប្រាស់ app ធនាគារនៅស្រុកខ្មែរនឹងអាចចាយតាមគ្រប់អ្នកលក់ដែលប្រើធនាគារក្នុងស្រុកថៃ»។
សូមបញ្ជាក់ថា បើតាមនាយិកាប្រតិបត្តិទីផ្សារជាន់ខ្ពស់ធនាគារអេស៊ីលីដា លោកស្រី សុខ សោភា បានបញ្ជាក់ថា សព្វថ្ងៃ អេស៊ីលីដាមានអ្នកកំពុងប្រើប្រាស់គណនីធនាគារជិត៣លានគណនី។ ក្នុងនោះ អ្នកកំពុងប្រើប្រាស់អេស៊ីលីដា មានជាង២លាននាក់ និងដៃគូទទួលប្រតិបត្តិការទូទាត់តាមអេស៊ីលីដាម៉ូបាលមានជាង ១០ម៉ឺនកន្លែងនៅទូទាំងប្រទេស និងទីតាំងអាចទូទាត់តាមម៉ាស៊ីនឆូតកាតបានមានជាងជិត ៥ពាន់កន្លែងផងដែរ។
ចំពោះព័ត៌មានផ្សេងៗសូមលោកអ្នកទាក់ទងមកការិយាល័យទំនាក់ទំនងអតិថិជន (បម្រើ២៤ម៉ោង) តាមរយៈទូរស័ព្ទលេខ ០១៥ ៩៩៩ ២៣៣ ឬ ០២៣ ៩៩៤ ៤៤៤ ៕
None
