លោក Biden នឹងកំណត់អត្រាពន្ធលើប្រាក់ចំណូលអប្បបរមារបស់មហាសេដ្ឋីប្រាក់ពាន់លានដុល្លារយ៉ាងហោចណាស់ ២០% ចំពោះគ្រួសារមហាសេដ្ឋីដែលមានទ្រព្យសម្បត្តិសុទ្ធចាប់ពី១០០ លានដុល្លារឡើងទៅ ដោយផែនការយកពន្ធនេះ គឺនឹងត្រូវកំណត់គោលដៅភាគច្រើនទៅលើមហាសេដ្ឋីប្រាក់ពាន់លានដុល្លារជាង ៧០០នាក់របស់សហរដ្ឋអាមេរិក។ នេះបើយោងតាមរបាយការណ៍របស់សេតវិមានដែលបានចេញផ្សាយនៅចុងសប្ដាហ៍នេះ។
ផែនការនេះនឹងតម្រូវឱ្យគ្រួសារមហាសេដ្ឋីបង់ពន្ធអប្បបរមាចំនួន ២០% លើប្រាក់ចំណូលទាំងអស់របស់ពួកគេដែលរកបាន។ តាមផែនយកពន្ធលើមហាសេដ្ឋីអាមេរិកនេះ ត្រូវបានគេមើលឃើញថា នឹងជយយកាត់បន្ថយឱនភាពថវិកាជាតិអាមេរិកប្រហែល ៣៦០ ពាន់លានដុល្លារនៅក្នុងទសវត្សរ៍ខាងមុខនេះ។
គួរជម្រាបថា សមាជិកព្រឹទ្ធសភាគណបក្សប្រជាធិបតេយ្យកាលកាលពីឆ្នាំមុន ក៏ធ្លាប់បានស្នើដាក់ពន្ធលើមហាសេដ្ឋីអាមេរិក ដើម្បីជួយឲ្យរដ្ឋការលោក ចូ បៃឌិន អាចចំណាយសម្រាប់ការដោះស្រាយបញ្ហាសង្គម និងសម្រែសម្រួលអាកាសធាតុ ប៉ុន្ដែ កញ្ចប់ចំណាយនេះ មិនបានដំណើរការទៅមុខនោះទេ ដោយសារតែមិនមានសំឡេងគាំទ្រគ្រប់គ្រាន់នៅក្នុងព្រឹទ្ធសភា។
អត្ថបទគួរអាន
ការិយាល័យគ្រប់គ្រង និងថវិការបស់សេតវិមាន និងក្រុមប្រឹក្សានៃទីប្រឹក្សាសេដ្ឋកិច្ចអាមេរិក បានធ្វើការប៉ាន់ប្រមាណថា មានគ្រួសារមហាសេដ្ឋីប្រមាណ ៤០០គ្រួសារ ដែលបានបង់ពន្ធជាមធ្យមទៅកាន់រដ្ឋាភិបាលអាមេរិក ត្រឹមតែ៨% ប៉ុណ្ណោះ នៃប្រាក់ចំណូលរបស់ពួកគេនៅចន្លោះឆ្នាំ២០១០ ដល់២០១៨។ អត្រាបង់ពន្ធនេះ គឺមានទាបជាងអ្វីដែលបានបង់ដោយប្រជាពលរដ្ឋអាមេរិករាប់លាននាក់ទៅទៀត។
តាមផែនការសេតវិមានអាមេរិក នឹងកំណត់ឲ្យមហាសេដ្ឋីទាំងអស់ត្រូវបង់ពន្ធយ៉ាងហោចណាស់ ២០% នៃប្រាក់ចំណូលដែលពួកគេរកបាន ឬក៏រួមបញ្ចូលគ្នានៃទ្រំង់បែបបទប្រពៃណីនៃចំណូលជាប្រាក់ឈ្នួល និងអ្វីដែលពួកគេទទួលបានមិនទាន់ទងនឹងផលចំណេញជាក់ស្ដែង ដូចជា ការឡើងថ្លៃតម្លៃភាគហ៊ុនជាដើម។
តាមផែនការនៃការកំណត់ពន្ធថ្មីនេះ ត្រូវបានអ្នកជំនាញប៉ាន់ប្រមាណថា ការបង់ពន្ធរបស់នាយកប្រតិបត្តិក្រុមហ៊ុន Tesla លោក Elon Musk ដែលជាមហាសេដ្ឋីលេខ១ក្នុងលោកនោះ នឹងត្រូវបានបង់ពន្ធបន្ថែម ៥០ពាន់លានដុល្លារទៀត ពីលើប្រាក់ពន្ធដែលលោកបានបង់នាពេលបច្ចុប្បន្ន ខណៈដែលស្ថាបនិកក្រុមហ៊ុន Amazon លោក Jeff Bezos វិញនឹងត្រូវបង់ប្រាក់ពន្ធបន្ថែម ៣៥ពាន់លានដុល្លារ៕
None
