ក្នុងជំនួបពិភាក្សាការងារជាមួយលោក ង្វៀន ហ៊ុយ តាង ឯកអគ្គរដ្ឋទូតវៀតណាមប្រចាំកម្ពុជាកាលពីថ្ងៃទី១២តុលា ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បានស្នើដល់លោកភាគីវៀតណាម ជួយជំរុញសម្រេចឱ្យបានទិសដៅទាក់ទាញភ្ញៀវទេសចរវៀតណាម៧០ម៉ឺននាក់នៅឆ្នាំក្រោយ និងឱ្យបាន១លាននាក់នៅឆ្នាំ២០២៤។
ឯកឧត្តម ថោង ខុន ឱ្យដឹងទៀតថា ក្នុងពេលដែលពិភពលោកមិនទាន់រួចផុតទាំងស្រុងពីជំងឺកូវីដ១៩ រីឯសេដ្ឋកិច្ចសកលក៏មិនប្រាកដប្រជា ការជំរុញចលនាទេសចរជាមួយប្រទេសជិតខាងនិងក្នុងតំបន់ គឺជារឿងសំខាន់បំផុត។ ជាក់ស្តែងកម្ពុជានិងវៀតណាមជាប្រទេសក្បែរខាងគ្នា ត្រូវបង្កើនកិច្ចសហការលើវិស័យទេសចរណ៍ ដើម្បីជំរុញចលនាទេសចរទៅវិញទៅមក។
អំឡុងជំនួបរវាងថ្នាក់ដឹកនាំទាំងពីរ ក៏បានឯកភាពគ្នាជំរុញការតភ្ជាប់ផ្លូវទឹកឱ្យកាន់តែប្រសើរឡើង ពិសេសតភ្ជាប់ពីកំពង់ផែកោះត្រល់មកកំពង់ផែខេត្តកំពត ស្របពេលកំពង់ផែទេសចរណ៍នេះ ត្រៀមដាក់ឱ្យដំណើរនៅអំឡុងត្រីមាសទី២ឆ្នាំ២០២៣ខាងមុខដែរ។
អត្ថបទគួរអាន
ដោយឡែកសម្រាប់ផ្លូវអាកាស ភាគីទាំងពីរបានជំរុញឱ្យមានការតភ្ជាប់ជើងហោះហើររវាងគោលដៅទេសចរណ៍សំខាន់ៗមួយចំនួន រួមមាន សៀមរាប-កោះត្រល់ ព្រះសីហនុ-ហាឡុង សៀមរាប-ហាយហ្វុង សៀមរាប-កាន់ថឺរ។ លើសពីនេះ កម្ពុជាវៀតណាមឯកភាពគ្នាជំរុញចលនាទេសចរបើក ដោយខ្លួនឯងឆ្លងកាត់ប្រទេសទាំងពីរ និងទៅប្រទេសទី៣។
គួបញ្ជាក់ដែរថា ក្រៅតែពីវិស័យទេសចរណ៍ កម្ពុជា-វៀតណាមបានឯកភាពគ្នាលើការជំរុញ ការផ្លាស់ធុរកិច្ច និងទស្សនកិច្ចរវាងវិស័យសាធារណៈ និងឯកជនឱ្យបានច្រើន ដោយហេតុថាវិស័យឯកជនគឺជាភ្នាក់ងារដ៏សំខាន់ក្នុងការនាំភ្ញៀវទេសចរ៕
