បើតាមសម្ដេច ហ៊ុន សែន មានលក្ខខណ្ឌចំនួន៣ ដែលរាជរដ្ឋាភិបាលសម្រេចលុបចោល រួមមាន៖ ទី១. មិនតម្រូវឲ្យអ្នកដំណើរមកពីបរទេសធ្វើតេស្តរកកូវីដ១៩ តាមម៉ាស៊ីន PCR រយៈពេល ៧២ម៉ោង, ទី២.លុបចោលការធ្វើតេស្តរហ័សពេលមកដល់អាកាសយាន្តដ្ឋាន និងទី៣.អនុញ្ញាតឲ្យបើកដំណើរការឡើងវិញនូវទិដ្ឋាការពេលមកដល់ សម្រាប់អ្នកដំណើរបរទេសទាំងអស់។
ថ្លែងនៅក្នុងពិធីសម្ពោធដាក់ឱ្យប្រើប្រាស់ «ភូមិកុមារ SOS» ស្ថិតក្នុងខេត្តព្រៃវែង នៅថ្ងៃទី១៧ ខែមីនា ឆ្នាំ២០២២ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានមានប្រសាសន៍តបតាមការស្នើសុំ របស់ឯកឧត្តម ថោង ខុន រដ្ឋមន្ត្រីក្រសួងទេសចរណ៍ រាជរដ្ឋាភិបាលបានសម្រេចលើកលែងនូវលក្ខខណ្ឌតម្រូវសម្រាប់អ្នកដំណើរបរទេសចូលមកប្រទេសកម្ពុជា ចាប់ពីពេលនេះតទៅ។ បើតាមសម្ដេចតេជោ ហ៊ុន សែន លក្ខខណ្ឌចំនួន៣ចំណុច មានដូចជា៖ ទី១. មិនតម្រូវឲ្យអ្នកដំណើរមកពីបរទេសធ្វើតេស្តរកកូវីដ១៩ តាមម៉ាស៊ីន PCR រយៈពេល ៧២ម៉ោងទៀតនោះទេ។ ទី២.លុបចោលការធ្វើតេស្តរហ័សពេលមកដល់អាកាសយាន្តដ្ឋាន និងទី៣.អនុញ្ញាតឲ្យបើកដំណើរការឡើងវិញនូវទិដ្ឋាការពេលមកដល់សម្រាប់អ្នកដំណើរបរទេសទាំងអស់។ សម្ដេចបានសង្កត់ធ្ងន់ទៀតថា ការលុបចោលលក្ខខណ្ឌទាំងនេះ គឺដើម្បីសម្រួលដល់អ្នកដំណើរចេញ-ចូល ប្រទេសកម្ពុជា។
សម្ដេចតេជោ ហ៊ុន សែន ក៏បានគូសបញ្ជាក់ដែរថា ការសម្រេចលើកលែងនូវលក្ខខណ្ឌតម្រូវមួយចំនួននេះ មិនត្រឹមតែសម្រួលដល់អ្នកដំណើរចេញ-ចូល មកកម្ពុជា ប៉ុណ្ណោះទេ ថែមទាំងអាចជួយសម្រាលបន្ទុកក្នុងការចំណាយរបស់រាជរដ្ឋាភិបាលកម្ពុជា ផងដែរ។ សម្ដេចបន្តថា បន្ថែមលើការប្រយុទ្ធប្រឆាំងនឹងមេរោគកូវីដ១៩ កម្ពុជាក៏បានចំណាយថវិកាអស់ជាច្រើន ទៅលើសម្ភារៈធ្វើតេស្ដរកមេរោគកូវីដ១៩ ទាំងប្រជាពលរដ្ឋកម្ពុជា និងអ្នកដំណើរបរទេស។
អត្ថបទគួរអាន
លោក ធួន ស៊ីណាន ប្រធានសមាគមភ្នាក់ងារទេសចរណ៍អាស៊ីប៉ាស៊ីហ្វិក បានយល់ឃើញថា ការសម្រេចរបស់រាជរដ្ឋាភិបាល ក្នុងការលើកលែងការធ្វើតេស្តសម្រាប់អ្នកដំណើរ គឺជាការគាំពារលើវិស័យទេសចរណ៍ ក៏ដូចជា ជំរុញសន្ទុះឲ្យកាន់តែប្រសើរឡើងវិញសម្រាប់វិស័យទេសចរណ៍។ ក៏ប៉ុន្តែ បើទោះជាបែបនេះក្ដី អ្នកជំនាញក្នុងវិស័យទេសចរណ៍រូបនេះ បានសង្កត់ធ្ងន់ថា កម្ពុជាតែម្ខាងមិនអាចធ្វើទៅបានឡើយ បើសិនមិនមានការសហការពីបណ្ដាប្រទេសដទៃ ក្នុងតំបន់អាស៊ាននោះទេ។ ជាមួយគ្នានេះ លោក ធួន ស៊ីណាន ក៏បានគូសបញ្ជាក់ដែរថា ទោះបីបណ្ដាប្រទេសជាសមាជិកអាស៊ានមួយចំនួន បានបន្ធូរបន្ថយលក្ខខណ្ឌតម្រូវសម្រាប់អ្នកដំណើរ ប៉ុន្ដែប្រទេសកម្ពុជា នៅតែមានគោលនយោបាយទូលំទូលាយជាងប្រទេសក្បែរខាងមួយចំនួន។
សូមបញ្ជាក់ថា បន្ទាប់ពីមានការណែនាំរបស់ប្រមុខរាជរដ្ឋាភិបាលកម្ពុជា សម្ដេច ហ៊ុន សែន នៅថ្ងៃទី១៧ ខែមីនា ក្រសួងសុខាភិបាល ចាប់ផ្ដើមសម្រេចលុបចោលនូវលក្ខខណ្ឌតម្រូវ ចំនួន៣ចំណុចដល់អ្នកដំណើរបរទេស ដែលចូលមកប្រទេសកម្ពុជា។ ក៏ប៉ុន្តែ ក្រសួងសុខាភិបាល បានក៏បានណែនាំឲ្យអ្នកដំណើរទាំងអស់គប្បីធ្វើតេស្តរហ័សដោយខ្លួនឯង ក៏ដូចជា បង្ហាញនូវវិញ្ញាបនបត្របញ្ជាក់ការចាក់វ៉ាក់សាំងកូវីដ១៩ នៅពេលមកដល់ប្រទេសកម្ពុជាផងដែរ៕
None
