បើយោងតាមរបាយការណ៍ថ្មីចុងក្រោយមួយរបស់ក្រសួងទេសចរណ៍ ចេញផ្សាយសម្រាប់ខែឧសភា ឆ្នាំ ២០២០នេះ បានបង្ហាញថា គិតចាប់ពីខែមករា ដល់ខែឧសភា កន្លងទៅនេះ ចំនួនសកម្មភាពទេសចរណ៍ក្នុងស្រុក មានជាង ៣លាន ៧សែនដង ក្នុងនោះមានប្រជាពលរដ្ឋខ្មែរជាង ២លាន ២សែននាក់ និងភ្ញៀវទេសចរណ៍បរទេសជិត ១លាន ៥សែននាក់ ដែលតួលេខនេះ មានការធ្លាក់ចុះរង្វង់ ៥០% បើធៀបនឹងពេលដូចគ្នា កាលពីឆ្នាំ ២០១៩កន្លងទៅ។
អំឡុងពេលនេះ ទីក្រុងភ្នំពេញទទួលបានភ្ញៀវទេសចរជាង ១លាន ៥សែននាក់ ខណៈតំបន់ឆ្នេរសមុទ្រ ជាកន្លែងទាក់ទាញបន្ទាប់ ដែលមានភ្ញៀវទេសចរជាង ១លាន ៤សែននាក់ ហើយតំបន់សៀមរាបអង្គរ ទទួលបានជាង ៥សែននាក់។
អត្ថបទទាក់ទង!
បើតាមរបាយការណ៍ថ្មីចុងក្រោយមួយ របស់ក្រុមហ៊ុនអាកាសចរណ៍កម្ពុជា បានបង្ហាញឲ្យឃើញថា នៅក្នុងឆមាសទី ១ ដើមឆ្នាំ ២០២០នេះ ចរាចរណ៍អ្នកដំណើរនៅប្រទេសកម្ពុជា មានជាង ១លាន ៩សែនជើង ធ្លាក់ចុះជាង ៦៧% ដោយក្នុងនោះ ព្រលានយន្តហោះអន្តរជាតិភ្នំពេញមានសកម្មភាពហោះហើរជាង ១លាន ១សែនដង ខណៈព្រលានយន្តហោះអន្តរជាតិសៀមរាប មានជាង ៦សែនដង និងក្រុងព្រះសីហនុ មានជិត ២សែនដង។
យោងតាមរបាយការណ៍ប្រឆាំឆមាសទី១ ឆ្នាំ ២០២០ របស់ធនាគារជាតិនៃកម្ពុជា ក៏បានលើកឡើងដែរថា ដោយសារតែកម្ពុជា ពឹងផ្អែកខ្លាំងទៅលើវិស័យខាងក្រៅ បានធ្វើឲ្យវិស័យទេសចរណ៍កម្ពុជារងឥទ្ធិពលអវិជ្ជមាន ដោយក្នុងឆ្នាំ ២០២០ ចំនួនភ្ញៀវទេសចរអន្តរជាតិ អាចនឹងធ្លាក់ចុះដល់ទៅ ៥៥% ខណៈឆ្នាំ ២០១៩កន្លងទៅ មានកំណើន ១១% ហើយក្នុងនោះ ភ្ញៀវទេសចរចិន ដែលឈរលើលំដាប់លេខ ១ នឹងធ្លាក់ចុះយ៉ាងគំហុកប្រមាណ ៧១%។
បើតាមការព្យាកររបស់ រាជរដ្ឋាភិបាលកម្ពុជា កំណើនសេដ្ឋកិច្ចកម្ពុជា នៅឆ្នាំ ២០២០នេះ អាចនឹងធ្លាក់ចុះដល់ -១,៩% ហើយពាក់ព័ន្ធនឹងវិស័យទេសចរណ៍ អនុវិស័យសណ្ឋាគារ និងភោជនីយដ្ឋាន រំពឹងនឹងធ្លាក់ចុះ-៩,៧%។
យ៉ាងណាក៏ដោយ សកម្មភាពទេសចរក្នុងស្រុក ត្រូវបានគេរំពឹងថា នឹងកើនឡើងមកវិញយ៉ាងឆាប់រហ័ស បន្ទាប់ពីប្រជាពលរដ្ឋកម្ពុជា បានផ្អាកធ្វើដំណើរមួយរយៈពេលកូវីដ-១៩នេះ និងដោយសារតែការផ្អាកការធ្វើដំណើររបស់ប្រជាពលរដ្ឋកម្ពុជាទៅកាន់បរទេសផងដែរ៕
None
