មកដល់ពេលបច្ចុប្បន្ននេះ ប្រទេសវៀតណាមកំពុងតែសិក្សាទៅលើ ការសាងសង់ផ្លូវល្បឿនលឿន ប្រវែង ៥៣គីឡូម៉ែត្រ តភ្ជាប់ពីទីក្រុងហូជីមិញ មកកាន់ព្រំដែនកម្ពុជា តែម្តង ដោយគម្រោងនេះ អាចនឹងចំណាយទឹកប្រាក់ប្រមាណ ៤៥០លានដុល្លារអាមេរិក ក្រោមភាពជាដៃគូសាធារណៈ និងឯកជន។
នាយកដ្ឋានគ្រប់គ្រងផ្លូវវៀតណាម បានដាក់សំណើផ្លូវល្បឿនលឿនប្រវែង ៥៣គីឡូម៉ែត្រ រួចរាល់ហើយទៅកាន់ ក្រសួងសាធារណការវៀតណាម ដែលផ្លូវនេះនឹងតភ្ជាប់ពីផ្លូវក្រវ៉ាត់ក្រុងទី ៣ នៃទីក្រុងហូជីមិញ មកកាន់ ស្រុក ម៉ុក បៃ ខេត្តថាយ និញ ជាប់នឹងព្រំប្រទល់កម្ពុជា-វៀតណាមតែម្តង។
ការសាងសង់ផ្លូវនេះ នឹងធ្វើឡើងដោយមាន ២ដំណាក់កាលធំៗ ដោយដំបូង នឹងធ្វើការសាងសង់ផ្លូវហាយវេ ចែកជា ២ដាច់ដោយឡែកពីគ្នា មាន ៤គន្លង សម្រាប់ការធ្វើដំណើរក្នុងល្បឿន ១២០គីឡូម៉ែត្រ ក្នុងមួយម៉ោង។
អត្ថបទទាក់ទង!
ដំណាក់កាលទី ២ នៃការសាងសង់ គឺពង្រីកផ្លូវនេះទៅជា ផ្លូវល្បឿនលឿន ដែលមាន ៦ ឬ ៨គន្លង។
ក្រសួងសាធារណការវៀតណាម ក៏បានលើកឡើងដែរថា ផ្លូវល្បឿនលឿនហូជីមិញ-ម៉ុក បៃ នឹងបំពេញតម្រូវការនៃវិស័យដឹកជញ្ជូនក្នុងតំបន់ ហើយវានឹងពង្រឹងទំនាក់ទំនងសេដ្ឋកិច្ចនៅតាមបណ្តោយព្រំដែនភាគខាងត្បូងផងដែរ។
បើក្រឡេកទៅមើល ទំហំពាណិជ្ជកម្មរវាងកម្ពុជា និងប្រទេសវៀតណាម នៅក្នុងរយៈពេល ៧ខែ ដើមឆ្នាំ ២០១៩នេះ ទំហំពាណិជ្ជកម្មទ្វេភាគី បានឈានដល់ ៣ពាន់លានដុល្លារអាមេរិក ដែលក្នុងនោះ កម្ពុជា នាំចេញទៅ វៀតណាម ក្នុងទំហំទឹកប្រាក់ជាង ៦៤០លានដុល្លារអាមេរិក និងនាំចូលមកពី វៀតណាម វិញ ក្នុងទំហំទឹកប្រាក់ជាង ២ពាន់ ៥រយលានដុល្លារអាមេរិក។
បើមើលពីទំហំទឹកប្រាក់នៃការនាំចូលពីប្រទេសវៀតណាមវិញ ហាក់បីដូចខ្ពស់ឆ្ងាយដាច់ជារៀងរាល់ឆ្នាំ ហើយទំនិញដែល វៀតណាម នាំចូលមក កម្ពុជា ភាគច្រើនជា ចំណីអាហារកញ្ចប់ ដែលមានតម្លៃជាង ៣៣លានដុល្លារ ផលិតផលគីមី ៥០លានដុល្លារ ផលិតផលក្រដាសជាង ៥៣លានដុល្លារ គ្រឿងវាយនភណ្ឌជាង ៣៤០លានដុល្លារ គ្រឿងសមុទ្រជិត ២០លានដុល្លារអាមេរិក បន្លែផ្លែឈើជាង ២៨លានដុល្លារ និងវត្ថុធាតុដើមសម្រាប់វិស័យឧស្សាហកម្មជិត១៦០លានដុល្លារអាមេរិក។
យ៉ាងណាមិញ របាយការណ៍ដដែល មិនបានបញ្ជាក់ពី ផលិតផល ដែលនាំចេញពី កម្ពុជា ទៅកាន់វៀតណាម នោះទេ គ្រាន់តែបង្ហាញថា កម្ពុជា បាននាំចេញទៅ វៀតណាម ក្នុងទំហំទឹកប្រាក់ជាង ៦៤០លានដុល្លារអាមេរិក។
កាលពីឆ្នាំ ២០១៨កន្លងទៅ ទំហំពាណិជ្ជកម្មទ្វេភាគីរវាង កម្ពុជា និងវៀតណាម គឺសម្រេចបានជាង ៤,៧ ពាន់លានដុល្លារអាមេរិក ហើយរំពឹងទុក នឹងកើនឡើងដល់ ៥ពាន់លានដុល្លារអាមេរិក មុនឆ្នាំ២០២០ខាងមុខ ហើយភាគីទាំងពីរ ក៏បានចុះហត្ថលេខាលើ កិច្ចសម្របសម្រួលជំរុញពាណិជ្ជកម្មទ្វេភាគីរវាងកម្ពុជា-វៀតណាម ស្តីពីការអនុគ្រោះពន្ធសម្រាប់ឆ្នាំ ២០១៩-២០២០ ផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
