អត្ថបទទាក់ទង
បើយោងតាមអ្នកជំនាញរបស់ក្រសួងសុខាភិបាលកម្ពុជា ក្រដាសលុយក៏ជាភ្នាក់ងារចម្លងមេរោគកូវីដ-១៩ដែរ នៅពេលដែលលុយនោះបានប្រឡាក់នូវទឹករំអិលពីផ្លូវដង្ហើមរបស់អ្នកដែលមានផ្ទុកមេរោគកូវីដ-១៩ ហើយក្រដាសលុយនោះត្រូវបានប៉ះពាល់បន្តៗគ្នាពីមនុស្សម្នាក់ទៅមនុស្សម្នាក់ទៀត ។
ដោយសារតែប្រជាជនគ្រប់គ្នាមិនអាចជៀសផុតក្នុងការទិញទំនិញប្រើប្រាស់ហូបចុកប្រចាំថ្ងៃ គេគប្បីប្រើការទូទាត់ដោយ SCAN QR Code ដោយមិនចាំបាច់ប៉ះពាល់ក្រដាសប្រាក់ ដើម្បីបង្ការការឆ្លងមេរោគកូវីដ-១៩ ដ៏កាចសាហាវនេះ ។
លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ នៃធនាគារ អេស៊ីលីដា
លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ នៃធនាគារអេស៊ីលីដា បាននិយាយថា «ធនាគារ អេស៊ីលីដា លើកទឹកចិត្តដល់ការចាយវាយទូទាត់ប្រាក់ដោយប្រព័ន្ធឌីជីថល ពោលគឺទូទាត់ដោយ Scan QR Code តាម អេស៊ីលីដាម៉ូបាល សម្រាប់ការទិញទំនិញប្រើប្រាស់សព្វបែបយ៉ាង ។ ការទូទាត់ប្រាក់តាម អេស៊ីលីដាម៉ូបាល ដោយមិនប៉ះពាល់ក្រដាសប្រាក់នេះ គឺមានភាពងាយស្រួល មានសុវត្ថិភាព និងបង្ការការឆ្លងមេរោគកាចសាហាវបានថែមទៀតផង ។»
លោកស្រីនាយិកាបានបន្ថែមថា សព្វថ្ងៃនេះ ធនាគារ អេស៊ីលីដា មានដៃគូអាជីវកម្មចំនួន ៧២.០៤៤ ទីតាំង ដែលលោកអ្នកអាចធ្វើប្រតិបត្តិការទូទាត់ថ្លៃទំនិញ ឬសេវាកម្មផ្សេងៗ តាមរយៈឃ្យូអរកូដ (QR Code) របស់អេស៊ីលីដាម៉ូបាល បាន នៅទូទាំងប្រទេស ៕
