នៅក្នុងគោលនយោបាយជាតិសម្រាប់រយៈពេល៥ឆ្នាំ គឺចាប់ពីឆ្នាំ២០២០ ដល់ឆ្នាំ២០២៥ ដែលត្រូវបានចុះផ្សាយដោយសារព័ត៌មានរដ្ឋចិនស៊ិនហួរ បានឲ្យដឹងថា បក្សកុម្មុយនិស្តចិន និង រដ្ឋាភិបាលក្រុងប៉េកាំងនឹងធានាឲ្យបានពីនីតិរដ្ឋ ដែលអ្វីៗត្រូវតែធ្វើតាមការដឹកនាំ និង ចង្អុលបង្ហាញរបស់បក្ស។
ដើម្បីធានាបានពីនីតិរដ្ឋ រដ្ឋអំណាចក្រុងប៉េកាំង បាននិយាយនៅក្នុងគោលនយោបាយរបស់ខ្លួនថា ពួកគេនឹងបង្កើតច្បាប់ស្របតាមវិស័យ និងភាពជឿនលឿនថ្មីៗ នៅក្នុងប្រទេសចិន ដូចជា សេដ្ឋកិច្ច ឌីជីថល ហិរញ្ញវត្ថុតាមប្រព័ន្ធអ៊ីនធឺណែត បញ្ញាសិប្បនិម្មិត ឬហៅថា AI ប្រព័ន្ធសុវត្ថិភាពកុំព្យូរទ័រ និង ការការពារទិន្នន័យជាដើម។
ជាក់ស្តែង ច្បាប់ថ្មីៗ ដែលចិនគ្រោងនឹងបង្កើនឡើងឲ្យស្របតាមវិស័យជឿនលឿនខាងលើនេះ រួមមាន ច្បាប់សន្តិសុខជាតិ ច្បាប់ប្រឆាំងការធ្វើអាជីវកម្មផ្តាច់មុខ និង ច្បាប់បច្ចេកវិទ្យាជាដើម។
សម្រាប់រដ្ឋាភិបាលចិន សេចក្ដីព្រាងច្បាប់ទាំងអស់នេះ គឺជាការធានាឲ្យបាននីតិរដ្ឋនៅក្នុងប្រទេសចិន ក៏ប៉ុន្តែសម្រាប់អ្នកវិនិយោគបរទេស ឬក្រុមហ៊ុនចិនដែលមានទំនោរប្រឆាំងនឹងការដឹកនាំរបស់ក្រុងប៉េកាំង បានចាត់ទុកថា ច្បាប់អស់នេះ វាជាការគំរាមកំហែង និងការគាបសង្កត់តែប៉ុណ្ណោះ។
អត្ថបទគួរអាន
សូមជម្រាបថា នៅមួយរយៈចុងក្រោយនេះ រដ្ឋាភិបាលចិនបានផ្តើមធ្វើការបង្ក្រាបលើក្រុមហ៊ុនយក្សៗរបស់ខ្លួន ក្រោមហេតុផលការធ្វើអាជីវកម្មផ្តាច់មុខ និង ការដាក់គំនាបលើការគ្រប់គ្រងទិន្នន័យជាដើម។ ជាក់ស្តែង កាលពីខែឧសភាឆ្នាំនេះ ក្រុមហ៊ុនយក្ស Alibaba របស់មហាសេដ្ឋីចិន លោក ជេក ម៉ា ក៏ទើបតែរងពិន័យពីក្រុងប៉េកាំង ឲ្យបង់លុយជាង ៣ពាន់លានដុល្លារ ដោយសារតែរដ្ឋចិនបានចោទប្រកាន់ក្រុមហ៊ុនមហាសេដ្ឋីរអិលមាត់ ជេកម៉ា រូបនេះថា បានល្មើសនឹងការរកស៊ីផ្ដាច់មុខ។ ប្រការនេះបានធ្វើឲ្យ Alibaba ខាតបង់ប្រាក់អស់ជាច្រើន នៅក្នុងអាជីវកម្មរបស់ខ្លួនក្នុងត្រីមាសទី១ឆ្នាំ២០២១នេះ។ ហើយ ថ្មីៗនេះទៀតសោត ក្រុមហ៊ុនបច្ចេកវិទ្យាយក្សចិនមួយទៀតឈ្មោះ Didi ក៏ត្រូវបានរដ្ឋាភិបាលចិនដាក់គំនាបលើទិន្នន័យរបស់អ្នកប្រើប្រាស់ដូចគ្នា ក្រោយពីខ្លួនបានឈានជើងបោះផ្សាយលក់ភាគហ៊ុន ក្នុងផ្សារហ៊ុនក្រុងញូវយ៉ក៕
None
