ការដែលលោក ស៊ី ជីនពីង នឹងបន្ដតំណែង៣អាណត្តិជាប់ៗគ្នានេះ មិនមែនជាអ្វីដែលត្រូវចាប់អារម្មណ៍ខ្លាំងក្នុងសមាជបក្សកុម្មុយនិស្តចិននៅខែតុលាឆ្នាំនេះទេ។ អ្វីដែលត្រូវតាមដានខ្លាំងគឺនៅត្រង់ថា លោកស៊ី ជីនពីង នឹងត្រូវរុះរើបេក្ខភាពក្បាលម៉ាស៊ីនដឹកនាំធំៗរូបណាខ្លះ ឱ្យចូលដឹកនាំក្នុងជួរបក្ស? នេះបើតាមការរាយការណ៍ដោយទីភ្នាក់ងារព័ត៌មានរ៉យទ័រ។
គេត្រូវស្វែងយល់ខ្លះៗអំពីសមាជបក្សកុម្មុយនិស្តចិនដ៏ធំ ធ្វើឡើងតែម្តងប៉ុណ្ណោះក្នុងរយៈពេល៥ឆ្នាំ។ សមាជិកគណបក្សសរុបប្រហែល ២៣០០នាក់មកពីទូទាំងប្រទេសនឹងប្រមូលផ្តុំគ្នានៅប៉េកាំង ក្នុងវិមានប្រជាជនកណ្តាលទីលានធានអាន់មិន។ ភាគច្រើននៃកិច្ចប្រជុំត្រូវធ្វើឡើងក្នុងលក្ខខណ្ឌបិទទ្វារ ហើយដែលដំណើរការទៅប្រហែលពេញមួយសប្តាហ៍។
ប្រតិភូទាំងជាង២ពាន់នាក់នេះនឹងត្រូវតស៊ូមតិ រួចបោះឆ្នោតជ្រើសតាំងសមាជិកគណៈកម្មការមជ្ឈិមបក្សថ្មីចំនួនប្រហែល២០០នាក់ ដើម្បីឱ្យគណៈកម្មការថ្មីនេះជ្រើសរើសបន្ត សមាជិកការិយាល័យនយោបាយ ២៥រូប និងចុងក្រោយសមាជិកគណៈកម្មការអចិន្ត្រៃយ៍នៃការិយាល័យនយោបាយបក្ស ចំនួន៧រូប។
ក្នុងន័យនេះ លោកស៊ី ជីនពីង នឹងត្រូវបង្ហាញក្រុមអ្នកដឹកនាំកំពូលថ្មីរបស់លោក ហើយសមាជបក្សទាំងមូលនឹងបានឃើញពីការរុះរើរចនាសម្ព័ន្ធអំណាចកំពូលរបស់ប្រទេសចិន គឺគណៈកម្មការអចិន្ត្រៃយ៍នៃការិយាល័យនយោបាយបក្ស។ មនុស្សទាំងនេះជាអ្នកកំណត់គោលនយោបាយ សេដ្ឋកិច្ច ការទូត សន្តិសុខ និងសង្គម សម្រាប់រយៈពេលប្រាំឆ្នាំខាងមុខ។
ក្នុងវ័យ ៦៩ឆ្នាំ លោកស៊ី កាន់តំណែងសំខាន់ៗចំនួនបីឯណោះ គឺជាប្រធានបក្សផង ជាប្រធានាធិបតីចិនផង និងជាអគ្គមេបញ្ជាការកងទ័ពផង ហើយលោកក៏ទទួលនាមជាបុគ្គលស្នូលរបស់បក្សផងដែរ។ អ្នកកាន់តំណែងជាប្រធានាធិបតីចិនមុនៗចំនួនពីររូប សុទ្ធតែបានលាលែងបន្ទាប់ពីកាន់តំណែងអស់ពេលពីរអាណត្តិពេញ។ ប៉ុន្តែលោក ស៊ី ជីនពីង ត្រូវបានគេរំពឹងថា នឹងក្លាយជាអ្នកផ្លាស់ប្តូរទម្លាប់មួយនេះ ដោយបន្តក្តាប់អំណាចសម្រាប់អាណត្តិទី៣។
អត្ថបទគួរអាន
មែនទែនទៅលោកអាចធ្វើដូចនេះបាន ក៏ដោយសារតែកាលពីឆ្នាំ២០១៨ សភាប្រជាជនចិនតាមការស្នើរបស់លោក បានអនុម័តកែប្រែរដ្ឋធម្មនុញ្ញដែលកំណត់អាណត្តិដឹកនាំរបស់ប្រធានាធិបតីចិនត្រឹម២អាណត្តិ មកជាការអាចដឹកនាំបានពេញមួយជីវិត។
ក្រៅពីលោកស៊ី ជីនពីង បុគ្គលមានអំណាចមួយរូបទៀតរបស់ចិន គឺនាយករដ្ឋមន្ត្រីលី ឃឺឈាំង ក៏នឹងទំនងនៅបន្តមានវត្តមានធ្វើនយោបាយក្នុងប្រទេសចិនដែរ ទោះលោកត្រូវផុតអាណត្តិជានាយករដ្ឋមន្ត្រីត្រឹមខែមិនាឆ្នាំក្រោយក្តី។
ទោះលោកលី ឃឺឈាំងមិនមានលក្ខខណ្ឌកាន់អំណាចពិសេសដូចលោកស៊ី ជីនពីងក្តី ពោលគឺលោកកាន់តំណែងបានតែ២អាណត្តិប៉ុណ្ណោះ ក៏លោកអាចបន្តកាន់តំណែងក្នុងជួរបក្ស ឬក្នុងគណៈកម្មការអចិន្ត្រៃយ៍នៃការិយាល័យនយោបាយបក្សបានដែរ។ ក្នុងវ័យ៦៧ឆ្នាំលោកលី ឃឺឈាំងនៅក្មេងជាងលោកស៊ី ជីនពីង បន្ដិច ហើយវ័យនេះក៏មិនទាន់ជាវ័យត្រូវចូលនិវត្តន៍ដែរ សម្រាប់ប្រមុខដឹកនាំចិន។ ទន្ទឹមនេះ នៅមួយរយៈចុងក្រោយគេឃើញលោក លី ឃឺឈាំង ហាក់ចេញមុខចេញមាត់ ថ្លែងសារអំពាវនាវនានាច្រើនជាងមុន ដែលជាសញ្ញាថាលោក នឹងនៅតែបន្តវត្តមានក្នុងជួរបក្ស។
សរុបមក នៅខែតុលាខាងមុខ គេនឹងបានឃើញក្បាលម៉ាស៊ីនបក្សកុម្មុយនិស្តចិនថ្មីៗ សម្រាប់ដឹកនាំមហាអំណាចពិភពលោកទី២ សម្រាប់សករាជថ្មីក៏ពិតមែន ប៉ុន្តែបុរសខ្លាំងរបស់ចិន និងមនុស្សជំនិតមួយចំនួនទៀតនឹងបន្តក្តាប់អំណាចប៉េកាំងដដែល ហើយលោកស៊ី នឹងផ្លាស់ប្តូរប្រវត្តិសាស្ត្រនាសម័យកាលថ្មីនេះ ដោយនឹងក្លាយជាប្រធានាធិបតីចិនកាន់អំណាច៣អាណត្តិជាប់ៗគ្នា៕
