អតីតនាយករដ្ឋមន្ត្រីថៃ​​​ ព្រមានថា ផែនការខ្ចីលុយជាង១២ពាន់លានដុល្លាររបស់រដ្ឋបាល​លោក អានុទីន អាចក្លាយជាបន្ទុកធ្ងន់ដល់ពលរដ្ឋថៃ ទៅថ្ងៃអនាគត​

អតីតនាយករដ្ឋមន្ត្រីថៃ លោក អាប់ភីស៊ីត វេចាជីវ៉ា (Abhisit Vejjajiva) ដែលបច្ចុប្បន្នជាប្រធានគណបក្សប្រជាធិបតេយ្យ បានចេញមុខព្រមានថា ផែនការរបស់រដ្ឋាភិបាលថៃ ក្រោមការដឹកនាំរបស់នាយករដ្ឋមន្ត្រី អានុទីន ឆានវីរៈគុល ក្នុងការខ្ចីលុយជាង១២ពាន់លានដុល្លារអាម៉េរិក រួមទាំងគម្រោងដ៏មហិមា Land Bridge តម្លៃ៣១ពាន់លានដុល្លារអាម៉េរិក អាចក្លាយជាបន្ទុកធ្ងន់លើពលរដ្ឋថៃ នាពេលអនាគត។
ការព្រមាននេះធ្វើឡើងបន្ទាប់ពីរដ្ឋាភិបាលថៃ បានចេញអនុក្រឹត្យអនុញ្ញាតឱ្យក្រសួងហិរញ្ញវត្ថុ ខ្ចីប្រាក់រហូតដល់ជាង១២ពាន់លានដុល្លារអាម៉េរិក នៅត្រឹមថ្ងៃទី៣០ ខែកញ្ញា ឆ្នាំ២០២៧ ដើម្បីដោះស្រាយផលប៉ះពាល់សេដ្ឋកិច្ច និងសង្គម ដែលបង្កឡើងដោយការកើនឡើងនៃតម្លៃថាមពលពិភពលោក និងការផ្លាស់ប្តូរប្រព័ន្ធថាមពលរបស់ប្រទេស ហើយក៏ធ្វើឡើងដោយក្ដីបារម្ភអំពីទំហំចំណាយដ៏សម្បើមសម្រាប់គម្រោងផ្លូវដឹកជញ្ជូនដ៏មហិច្ឆតា Land Bridge តម្លៃ៣១ពាន់លានដុល្លារអាម៉េរិកផងដែរ។
ក្នុងចំណោមថវិកាសរុបប្រមាណជាង១២ពាន់លានដុល្លារ នឹងត្រូវយកទៅអនុវត្តវិធានការជួយសម្រាលបន្ទុកប្រជាពលរដ្ឋ កសិករ និងអាជីវកម្ម ដែលរងផលប៉ះពាល់ពីវិបត្តិថាមពល។ ចំណែកថវិកា ដែលនៅសល់នឹងត្រូវប្រើសម្រាប់គម្រោងផ្លាស់ប្តូរថាមពលរយៈពេលវែងដូចជាការអភិវឌ្ឍថាមពលកកើតឡើងវិញ ការលើកកម្ពស់រថយន្តអគ្គិសនី (EV) ការសាងសង់ស្ថានីយសាកភ្លើង និងការបណ្តុះបណ្តាលកម្លាំងពលកម្ម។
ទោះជាយ៉ាងណា អតីតនាយករដ្ឋមន្ត្រីថៃ លោក អាប់ភីស៊ីត បានអះអាងថា រដ្ឋាភិបាលគួរតែស្តាប់យោបល់ និងស្វែងរកវិធានការដែលអាចអនុវត្តបាន ដោយមិនចាំបាច់បង្កើនបំណុលជាតិនោះឡើយ។ លោកបានស្នើឱ្យក្រសួងថាមពលអនុវត្តតាមការសន្យារបស់ខ្លួនក្នុងការដោះស្រាយបញ្ហាប្រាក់ចំណេញខ្ពស់ខុសប្រក្រតីរបស់បណ្ដារោងចក្រចម្រាញ់ប្រេង និងកែប្រែប្រព័ន្ធកំណត់តម្លៃប្រេងដែលបច្ចុប្បន្នភ្ជាប់ទៅនឹងតម្លៃយោងរបស់ប្រទេសសិង្ហបុរី។
លោកព្រមានថា ប្រសិនបើរដ្ឋាភិបាលថៃ មិនដោះស្រាយឫសគល់នៃបញ្ហាដែលធ្វើឱ្យប្រេង និងថាមពលឡើងថ្លៃទេ នោះរដ្ឋនឹងត្រូវចំណាយថវិកាយ៉ាងច្រើនសម្រាប់វិធានការបណ្តោះអាសន្ន ខណៈបង្កើតបំណុលរយៈពេលវែងសម្រាប់មនុស្សជំនាន់ក្រោយឱ្យទទួលរ៉ាប់រងសងជំនួស។
លោក អាប់ភីស៊ីត ក៏បានសង្កត់ធ្ងន់ដែរថា ការរក្សាប្រព័ន្ធបច្ចុប្បន្ន និងការព្យាយាមទប់ស្កាត់តម្លៃប្រេងលក់រាយតាមរយៈមូលនិធិប្រេងឥន្ធនៈ នឹងធ្វើឱ្យបន្ទុកហិរញ្ញវត្ថុនៅតែធ្លាក់ទៅលើប្រជាពលរដ្ឋដដែល។ ជុំវិញសំណើពាក់ព័ន្ធនឹងគម្រោងនេះ លោកបានបញ្ជាក់ថា ការសម្រេចចិត្តចុងក្រោយ គឺស្ថិតនៅលើការពិចារណារបស់ប្រធានរដ្ឋសភាថៃ៕

ដោយ: តែម សុខុម