យ៉ាងណាមិញ នៅថ្ងៃស្អែកនេះ ក្រុមមេដឹកនាំអឺរ៉ុបនឹងជួបប្រជុំពិភាក្សាគ្នានៅប្រទេសបារាំង អំពីវិបត្តិ ដែលបង្កឡើងពីការឈ្លានពានរបស់រុស្ស៊ីលើអ៊ុយក្រែន ប៉ុន្ដែ នៅក្នុងកិច្ចប្រជុំនោះ មិនមានការពិភាក្សាលើសំណើ របស់អ៊ុយក្រែនចូលជាសមាជិកសហភាពអឺរ៉ុបនោះទេ។ នេះបើតាមការអះអាងរបស់រដ្ឋមន្ត្រីកិច្ចការអឺរ៉ុបរបស់បារាំង។
លោក Clement Beaune រដ្ឋមន្ត្រីកិច្ចការអឺរ៉ុបរបស់បារាំង បានឲ្យដឹងថា សំណើសុំរបស់អ៊ុយក្រែនចូលជាសមាជិកសហភាពអឺរ៉ុប គឺត្រូវការពេលវេលា ដែលពេលវេលានេះ លោកសម្ដៅដល់ការជជែកដេញដោលនៅក្នុងរង្វង់កិច្ចការនយោយបាយអន្តរជាតិ ថាតើគួរ ឬមិនគួរឲ្យអ៊ុយក្រែនចូលសមាជិកសហភាពអឺរ៉ុបក្នុងពេលវេលាដ៏ឆាប់រហ័សនោះ។
នៅក្នុងកិច្ចប្រជុំនៅប្រទេសបារាំង មេដឹកនាំអឺរ៉ុប នឹងសម្រេចលើយន្ដការ លែងពឹងផ្អែកខ្លាំងទៅលើការទិញប្រេង ឧស្ម័ន និងធ្យូងថ្មពីរុស្ស៊ីតទៅទៀត ដោយសារតែសង្គ្រាមរបស់រុស្ស៊ី ដែលបានបង្កឡើងនៅអ៊ុយក្រែន បានធ្វើឲ្យអឺរ៉ុបបានដឹងថា ពួកគេត្រូវតែពឹងផ្អែកលើរុស្ស៊ីកាន់តែតិចទើបជារឿងល្អ ក៏ប៉ុន្ដែ អឺរ៉ុបមិនទំនងជានឹងផ្ដល់ឲ្យអ៊ុយក្រែនបានចូលជាសមាជិកអឺរ៉ុបបានលឿនរហ័សតាមដែលអ៊ុយក្រែនចង់បាននោះទេ។ នេះបើតាមសេចក្ដីព្រាងប្រកាសព័ត៌មានមួយនៃកិច្ចប្រជុំនេះ ដែលបានត្រូវបានផ្សាយដោយរ៉យទ័រ។
កន្លងមកក្រៅពីស្នើសុំចូលសហភាពអឺរ៉ុប ប្រធានាធិបតីអ៊ុយក្រែន ក៏បានខ្នះខ្នែងខ្លាំងណាស់ដែរ ក្នុងជំរុញឲ្យអង្គការណាតូទទួលយកខ្លួនជាសមាជិក ប៉ុន្ដែ ណាតូហាក់មិនមានការផ្ដល់ភ្លើងខៀវបន្ដិចណាឡើយសម្រាប់អ៊ុយក្រែន ព្រោះតែខ្លាចរុស្ស៊ី បង្កសង្គ្រាមកាន់តែធំ ពិសេសទៅលើប្រទេសសមាជិកណាតូ។ ថ្មីៗនេះ លោក Zenlenskky ប្រធានាធិបតីអ៊ុយក្រែន ក៏បានបង្ហាញពីការអាក់អន់ចិត្ត និងថាលែងមែនចំណង់ចង់ស្នើសុំឲ្យណាតូទទួលយកខ្លួនតទៅទៀតហើយ។
ក្រោយពីការប្រកាសបែបនេះ អ៊ុយក្រែនហាក់បន្ទន់ឥរិយាបថជាងមុនជាមួយរុស្ស៊ី ដោយនៅថ្ងៃព្រហស្បតិ៍សប្ដាហ៍នេះ រដ្ឋមន្ត្រីក្រសួងកាបរទេសអ៊ុយក្រែន បានព្រមជួបជាមួយរដ្ឋមន្ត្រីការបរទេសរុស្ស៊ី នៅក្នុងប្រទេសទួកគី។ នេះជាជំនួបការទូតកម្រិតខ្ពស់ជាលើកដំបូងរវាងប្រទេសទាំងពី គិតចាប់តាំងពីសង្គ្រាមបានចាប់ផ្ដើមមក។
អត្ថបទគួរអាន
ទោះយ៉ាងណា រដ្ឋមន្ត្រីការប្រទេសអ៊ុយក្រែន លោក Dmytro Kuleb បាននិយាយនៅមុនជំនួបចាប់ផ្ដើមថា លោកមានការរំពឹងទុកថា ទាបណាស់ចំពោះការចរចានេះ ខណៈគិតត្រឹមល្ងាចថ្ងៃព្រហស្បតិ៍នេះ មិនទាន់មានការប្រកាសពីលទ្ធផលយ៉ាងណានោះទេ។
បើក្រឡេកទៅមើលការគាំទ្រពីសហរដ្ឋអាមេរិកសម្រាប់អ៊ុយក្រែនវិញ ឃើញថា អាមេរិក នៅតែបន្ដជួយអ៊ុយក្រែន ដោយថ្មីៗនេះ អាមេរិកបានបើកដៃឲ្យប្រទេសជាសមាជិកណាតូផ្ដល់សព្វាវុធ និងយន្ដហោះចម្បាំងទៅឲ្យអ៊ុយក្រែន ហើយអាមេរិកក៏បន្ដដាក់ទណ្ឌកម្មកាន់តែធ្ងន់ធ្ងរថែមទៀតទៅលើរុស្ស៊ី ដូចជាការឈប់នាំចូលប្រេងពីរុស្ស៊ីផងដែរ ខណៈដែលសម្ព័ន្ធមិត្តអាមេរិក អង់គ្លេស និងកាណាដា ក៏នឹងឈប់នាំចូលប្រេងពីរុស្ស៊ីដូចគ្នា។
យ៉ាងណាមិញ នៅថ្ងៃ ពុធសប្ដាហ៍នេះ សភាតំណាងរាស្ត្រអាមេរិកភាគច្រើន ក៏ទើបតែបានបោះឆ្នោតអនុម័តកញ្ចប់ថវិកា ១,៥ទ្រីលានដុល្លារ ដោយក្នុងនោះ មានជាង ១៣ពាន់៦រយលានដុល្លារ នឹងផ្ដល់ជាជំនួយទៅឲ្យប្រទេសអ៊ុយក្រែន និងផ្ដល់មូលនិធិដល់រដ្ឋាភិបាលសហព័ន្ធរហូតដល់ខែទី ៣០ ខែកញ្ញាផងដែរ។
សូមបញ្ជាក់ថា មកទល់ពេលនេះ ការប្រយុទ្ធវាយប្រហាររវាងកងទ័ពរុស្ស៊ី និងអ៊ុយក្រែន នៅតែបន្ដធ្វើឡើង បើទោះបីជា មានការចរចាជាច្រើនជុំទៅហើយក្ដី។
ស្ថានការណ៍ក៏នៅតែតានតឹងនៅឡើយ ជាក់ស្ដែង បើតាមទីភ្នាក់ងារព័ត៌មានរបស់រុស្ស៊ី TASS បានស្រង់សម្ដីក្រសួងការបរទេសរុស្ស៊ីបានឲ្យដឹងថា រុស្ស៊ី នឹងមិនចូលរួមនៅក្នុងក្រុមប្រឹក្សាអឺរ៉ុបទៀតនោះទេ ដោយរុស្ស៊ីចាត់ទុកថា អង្គការណាតូ និងសហភាពអឺរ៉ុប កំពុងធ្វើឲ្យខូចដល់ស្ថាប័នអឺរ៉ុប ដែលបង្កើតឡើងដើម្បីលើកម្ពស់សិទ្ធិមនុស្ស នីតិរដ្ឋ និងលទ្ធិប្រជាធិបតេយ្យ៕
None
