នៅព្រឹកថ្ងៃទី ២៧នេះ ក្រសួងសុខាភិបាលកម្ពុជា បានចេញសេក្ដីអំពាវនាវមួយ នៅលើទំព័រហ្វេសប៊ុកផ្លូវការរបស់ខ្លួន ដោយបានស្នើដល់អ្នកលក់ម៉ាស់ទាំងអស់នៅទូទាំងប្រទេសកម្ពុជា សូមកុំដំឡើងថ្លៃម៉ាស់អី ដោយទុកលទ្ធភាពឲ្យពលរដ្ឋអាចទិញប្រើប្រាស់បាន ដើម្បីការងារការឆ្លងនូវជំងឺ ដែលបច្ចុប្បន្នពិភពលោកកំពុងមានការព្រួបារម្ភយ៉ាងខ្លាំង។
ក្រសួងសុខាភិបាលបានសរសេរលើហ្វេសប៊ុករបស់ខ្លួនយ៉ាងដូច្នេះថា «ក្រសួងសុខាភិបាល សូមអំពាវនាវ អ្នកដែលលក់ម៉ាស់ (mask) ទាំងអស់នៅក្នុងព្រះរាជាណាចក្រកម្ពុជា សូមចូលរួមទប់ស្កាត់ការចម្លងវីរុសកូរ៉ូណាថ្មី (2019-nCoV) ដោយសុំកុំតម្លេីងថ្លៃម៉ាស់ ទុកលទ្ធភាពឲ្យបងប្អូនប្រជាពលរដ្ឋយេីងដែលមានតម្រូវការប្រេីម៉ាស់ អាចទិញប្រើបានផង ដេីម្បីជាកិច្ចចូលរួមការពារសុខភាពផ្ទាល់ខ្លួនលើការចម្លងជំងឺនេះ និងជាបុណ្យកុសលសម្រាប់លោកអ្នកជាអ្នកលក់ម៉ាស់នេះផង។»
អត្ថបទទាក់ទង!
បន្ថែមពីនេះ ក្រសួងសុខាភិបាល ក៏បានក្រើនរំឭកដល់ពលរដ្ឋទៀតថា ប្រសិនបើមិនមានម៉ាស់ពាក់ទេ គេក៏អាចប្រើកន្សែង ឬក្រដាសជូតមាត់ សម្រាប់ទប់មាត់ នៅពេលក្អក កណ្ដាស់បាន និងត្រូវលាងដៃភ្លាមៗពេលក្អក ឬកណ្ដាស់ ជាមួយសាប៊ូ និងទឹកស្អាត។
បើតាមក្រសួងសុខាភិបាលគិតមកទល់នឹងថ្ងៃទី២៧ មករានេះ គេនៅទាន់រកឃើញថា មានមេរោគផ្លូវដង្ហើម កូរ៉ូណានេះ បានឆ្លងមកដល់ប្រទេសកម្ពុជាយើងនៅឡើយទេ ប៉ុន្ដែ វាបានឆ្លងមកដល់ប្រទេសថៃ ហើយដែលត្រូវបានគេរាយការណ៍ថា បានកើតឡើង៤ករណី ខណៈដែលវៀតណាមមាន២ករណី, សាំងហ្គាពួរមាន៣ករណី។
សម្រាប់ប្រទេសចិនវិញ មានករណីឈឺដែលមានវីរុស កូរ៉ូណានេះ សរុបចំនយន ១២៨៧នាក់ (គិតត្រឹមថ្ងៃតី២៦ មករា) ក្នុងនោះ ស្លាប់មានចំនួន ៤២នាក់។ មិនមែនត្រឹមតែរាតត្បាតដល់ប្រទេសតំបន់អាស៊ីប៉ុណ្ណោះទេ នៅសហរដ្ឋអាមេរិក និងប្រទេសអឺរ៉ុបមួយចំនួនក៏មានផ្ទះកើតមានករណីវីរុសកូរ៉ូណានេះដែរ។
ការផ្ទុះឡើងនូវវីរុសកូរ៉ូណានេះ ធ្វើឲ្យគេបានបាននឹកឃើញដល់ការផ្ទុះកើតឡើងនូវជំងឺសា (SAR) កាលពីឆ្នាំ២០០៣ ដែលវាក៏បានកើតឡើងនៅប្រទេសចិនដែរ ដោយកាលនោះ វាបានធ្វើឲ្យសេដ្ឋកិច្ចចិន ត្រូវរងផលប៉ះពាល់ខ្លាំងគួរឲ្យកត់សម្គាល់ មិនមែនតែចិនទេ សេដ្ឋកិច្ចពិភពលោកទាំងមូលក៏រងផលប៉ះពាល់ដូចគ្នាដែរ។ ប៉ុន្ដែ សម្រាប់ករណីវីរុសកូរ៉ូណានេះ វិញ ត្រូវបានអ្នកជំនាញលើកឡើងថា វាហាក់ដូចជា លឿនពេកដែលត្រូវព្យាករណ៍ពីផលប៉ះពាល់ ដ្បិតថា ការផ្ទុះឡើងនៃវីរុសនេះ គឺទើបតែកើតឡើងដំបូង កាលពីថ្ងៃទី ៣០ខែធ្នូ ឆ្នាំ២០១៩ ប៉ុណ្ណោះ៕
None
