បើតាមអ្នកជំនាញក្នុងវិស័យធានារ៉ាប់រង អះអាងថា កម្រិតនិងតួនាទីរបស់វិស័យធានារ៉ាប់រង គឺដើរទន្ទឹមគ្នាទៅនឹងសេដ្ឋកិច្ចសកលទាំងមូល ពោលគឺ កាលណាសេដ្ឋកិច្ចរីកចម្រើន វិស័យធានារ៉ាប់រងក៏រីកចម្រើន ហើយនៅពេលសេដ្ឋកិច្ចជួបវិបត្តិ វិស័យធានារ៉ាប់រងក៏ជួបនូវបញ្ហាផងដែរ ដែលនាំឱ្យវិស័យនេះត្រូវមានភាពបត់បែនឱ្យទាន់សភាពការ ដើម្បីរក្សាបាននូវភាពរីកចម្រើន។
លោក ស៊ាន ធនិន នាយកប្រតិបត្តិនៃក្រុមហ៊ុនធានារ៉ាប់រង Forte ប្រចាំប្រទេសឡាវ បានបង្ហាញនូវគំនិតសុទិដ្ឋិនិយម ចំពោះវិស័យធានារ៉ាប់រងនៅប្រទេសកម្ពុជា ក៏ដូចជាប្រទេសឡាវ នឹងនៅតែបន្តមានការរីកចម្រើននៅក្នុងឆ្នា២០២៣នេះ បើទោះបីបច្ចុប្បន្នកំពុងស្ថិតក្នុងវិបត្តិសេដ្ឋកិច្ចដែលកំពុងរង្គោះរង្គើយ៉ាងណាក្តី។ ទោះយ៉ាងណាក៏ដោយចុះ ការរីកចម្រើននេះក៏ស្ថិតក្នុងកម្រិតមួយនៃភាពមិនច្បាស់លាស់របស់ស្ថានភាពសេដ្ឋកិច្ចបច្ចុប្បន្នផងដែរ។
លោក បានអះអាងថា ការរីកចម្រើនៃវិស័យធានារ៉ាប់រង គឺដើរស្របគ្នានឹងការរីកលូតលាស់របស់វិស័យសេដ្ឋកិច្ចទាំងមូល ជាក់ស្តែង បើមើលតាមការព្យាករពីកំណើនសេដ្ឋកិច្ចនៅក្នុងតំបន់អាស៊ី គឺមានកំណើនចន្លោះពី ៤% ទៅ ៥% នៅឆ្នាំនេះ បើធៀបនឹងឆ្នាំមុន មានការធ្លាក់ចុះបន្តិចមែន ប៉ុន្តែនៅតែមានកម្រិតខ្ពស់បើធៀបនឹងតំបន់ដទៃទៀត។ ដូចនេះ វិស័យធានារ៉ាប់រងនៅក្នុងតំបន់អាស៊ី រួមទាំងកម្ពុជា គឺប្រាកដណាស់នឹងមានជួបប្រទះនូវផលប៉ះពាល់ផងដែរ ដោយមិនអាចមានកំណើនខ្ពស់ដូចមុននោះទេ ក៏ប៉ុន្តែនៅតែអាចរក្សាខ្លួនឯងបានល្អ និងរីកចម្រើនក្នុងកម្រិតណាមួយ ទៅតាមការបត់បែនរបស់ផលិតផលសេវាកម្ម នៃរបត់នៃការប្រែប្រួលសេដ្ឋកិច្ចដែលកំពុងជួបប្រទះ។ នេះបើតាមលោក ស៊ាន ធនិន នាយកប្រតិបត្តិនៃក្រុមហ៊ុនធានារ៉ាប់រង Forte ប្រចាំប្រទេសឡាវ។
អត្ថបទគួរអាន
ជុំវិញស្ថានភាពវិស័យធានារ៉ាប់រងនេះដែរ លោក យក់ ចំរើនឫទ្ធិ ប្រធានអគ្គនាយកនៃក្រុមហ៊ុនសម្ព័ន្ធធានារ៉ាប់រង Forte យល់ឃើញថា ភាពមិនច្បាស់លាស់នៃស្ថានភាពពិភពនាពេលបច្ចុប្បន្ន បានធ្វើឱ្យវិស័យធានារ៉ាប់រងក្នុងឆ្នាំ២០២៣នេះ នឹងជួបប្រទះនូវបញ្ហាប្រឈមច្រើន ដូចជាតម្លៃធានារ៉ាប់រងបន្តកើនឡើងខ្ពស់ និងការកាត់បន្ថយការចំណាយរបស់អតិថិជនមួយចំនួនដោយសារបញ្ហាអតិផរណាជាដើម។ ទោះយ៉ាងណា អ្នកជំនាញរូបនេះ នៅតែមានសុទិដ្ឋិនិយម ខ្ពស់ចំពោះវិស័យធានារ៉ាប់រងនៅកម្ពុជាក្នុងការបន្តរីកចម្រើនបន្ថែមទៀត។
បើតាម លោក យក់ ចំរើនឫទ្ធិ នៅឆ្នាំ២០២២ ក្រុមហ៊ុនធានារ៉ាប់រង Forte មានផ្តោបក្តាប់ចំណែកទីផ្សារប្រមាណ៤៥% ក្នុងចំណោមក្រុមហ៊ុនធានារ៉ាប់រងទូទៅទាំង១៨ ក្រុមហ៊ុន៕
