ដើម្បីផ្ដល់ឱកាសដ៏ល្អ សម្រាប់ជនជាតិកូរ៉េ ដែលកំពុងរស់នៅកម្ពុជា ដែលមានចំណាប់អារម្មណ៍ក្នុងការវិនិយោគជាមួយនឹងធនាគារអេស៊ីលីដា សមាគមកូរ៉េនៃវិទ្យាស្ថានហិរញ្ញវត្ថុ នៅកម្ពុជា (KAFC) នឹងរៀបចំសិក្ខាសាលាមួយ ស្ដីពីការបោះផ្សាយលក់មូលបត្រកម្មសិទ្ធិលើកដំបូងរបស់ធនាគារអេស៊ីលីដា នៅថ្ងៃទី ១៩ ខែកុម្ភៈ ឆ្នាំ២០២០ វេលាម៉ោង ១៦៖ ៣០នាទី ដល់ម៉ោង ១៨៖០០ នាទី នៅសាលប្រជុំនៃធនាគារអេស៊ីលីដា (អគារលេខ ៦១ មហាវិថីព្រះមុនីវង្ស)។
សិក្ខាសាលានេះ នឹងធ្វើបទបង្ហាញទាំងអស់ ជាភាសាកូរ៉េ និងមានអ្នកជំនាញក្នុងទីផ្សារមូលធន និងវិស័យហិរញ្ញវត្ថុចូលរួមផងដែរ។ លោកបណ្ឌិត អ៊ិន ចាន់នី នាយកប្រតិបត្តិនៃធនាគារអេស៊ីលីដា និងលោក Han Kyung Tae នាយកប្រតិបត្តិក្រុមហ៊ុនយាន់តាស៊ីឃ្យូរីធី នឹងផ្ដល់បទបង្ហាញផ្សេងៗគ្នា ទាក់ទងនឹងការបោះផ្សាយលក់មូលបត្រកម្មសិទ្ធិ លើកដំបូងរបស់ធនាគារអេស៊ីលីដា ក៏ដូចជាឆ្លើយនូវសំណួរនានា ពីសិក្ខាកាមដែលចូលរួមផងដែរ។
អត្ថបទទាក់ទង!
លោក Ha Jong Weon អគ្គនាយករង នៃក្រុមហ៊ុនផ្សារមូលប័ត្រកម្ពុជា និងជាអនុប្រធានសមាគមកូរ៉េនៃវិទ្យាស្ថានហិរញ្ញវត្ថុនៅកម្ពុជា បានគូសបញ្ជាក់ថា គោលបំណងនៃសិក្ខាសាលានេះ គឺដើម្បីលើកកម្ពស់ឱកាសសក្ដានុពលវិនិយោគ ទៅកាន់វិនិយោគិនកូរ៉េជាឯកត្ដបុគ្គលនៅកម្ពុជា។
លោក Weon បានមានប្រសាសន៍ទៀតថា «ដូចដែល អ្នកអាចដឹងហើយថា វិនិយោគិនកូរ៉េ គឺពិតជាចង់វិនិយោគនៅកម្ពុជា ក្នុងវិស័យធនាគារ ដែលវាកំពុងត្រូវបានចាត់ទុកថា គឺជាវិស័យមួយ ក្នុងចំណោមវិស័យ ដែលមានផលចំណេញ និងកំណើនខ្ពស់បំផុតនៅកម្ពុជា។ រហូតមកទល់ពេលនេះ មានការទិញ ចំណែកភាគហ៊ុនធនាគារក្នុងស្រុកជាច្រើន ដោយវិនិយោគិនជាស្ថាប័នធំៗរបស់កូរ៉េ ប៉ុន្ដែ វិនិយោគិនជាឯកត្តបុគ្គល មិនធ្លាប់មានឱកាសចូលរួមនោះទេ។ មានវិនិយោគិនកូរ៉េជាច្រើន ដែលកំពុងរស់នៅកម្ពុជា កំពុងសាកសួរអំពីការបោះផ្សាយ IPO របស់ធនាគារអេស៊ីលីដា។ ខ្ញុំជឿជាក់ថា នៅក្នុងសិក្ខាលានេះ នឹងផ្ដល់ព័ត៌មានលម្អិត សម្រាប់វិនិយោគិនកូរ៉េ ដើម្បីត្រៀមខ្លួនឲ្យបានរួចរាល់ក្នុងការទិញចំណែកភាគហ៊ុន របស់ធនាគារក្នុងស្រុកដ៏ធំជាងគេបំផុតរបស់កម្ពុជាមួយនេះ។»
លោក Ha Jong Weon អគ្គនាយករង នៃក្រុមហ៊ុនផ្សារមូលប័ត្រកម្ពុជា និងជាអនុប្រធានសមាគមកូរ៉េនៃវិទ្យាស្ថានហិរញ្ញវត្ថុនៅកម្ពុជា
សូមបញ្ជាក់ថា កន្លងមក ធនាគារ អេស៊ីលីដា បានរៀបចំសិក្ខាសាលានេះ ចំនួន ៣ដងរួចហើយ សម្រាប់ប្រជាជនកម្ពុជា។
ធនាគារអេស៊ីលីដា គឺជាធនាគារពាណិជ្ជ ដ៏ធំបំផុតមួយនៅកម្ពុជា ដែលមានទ្រព្យសកម្មសរុបជាង ៥,៦ ពាន់លានដុល្លារអាមេរិក គិតត្រឹមដំណាច់ឆ្នាំ២០១៨។ ធនាគារអេស៊ីលីដា បានបង្ហាញនូវតួលេខចំណេញធៀបនឹងមូលធនដ៏ខ្ពស់ក្នុងរយៈពេលប៉ុន្មានឆ្នាំចុងក្រោយនេះ ដែលមានតួលេខដល់ទៅជាង ១០%។
ជាមួយគ្នានេះដែរ ការបោះផ្សាយលក់មូលបត្រកម្មសិទ្ធិ លើកដំបូងរបស់ធនាគារអេស៊ីលីដា នឹងក្លាយជាកាតាលីករសម្រាប់ការបោះផ្យាយលក់មូលបត្រកម្មសិទ្ធិលើកដំបូង របស់គ្រឹះស្ថានហិរញ្ញវត្ថុដទៃទៀត និងជាព្រឹត្តិការណ៍ដ៏សំខាន់មួយ នៃការអភិវឌ្ឍទីផ្សារមូលធននៅកម្ពុជា។
មិនតែប៉ុណ្ណោះ វាក៏ផ្ដល់នូវឱកាសវិនិយោគមួយដ៏ល្អ ជាមួយនឹងប្រាក់ចំណេញដ៏មានស្ថិរភាពដល់វិនិយោគិនបរទេស ដូចជាប្រជាជនកម្ពុជាផងដែរ៕
None
