អ្នកនាំពាក្យក្រសួងសុខាភិបាល លោក វេជ្ជបណ្ឌិត លី សូវ៉ាន់ បានបញ្ជាក់នៅថ្ងៃទី ៨ ខែឧសភានេះថា ក្រសួងសុខាភិបាលមិនបានលើកទឹកចិត្ត ឲ្យប្រជាពលរដ្ឋរៀបចំពិធីរៀបមង្គលការនៅអំឡុងពេលនេះនោះទេ។ លោកគូសបញ្ជាក់ទៀតថា ពិធីរៀបមង្គលការនេះ គួរតែពន្យារពេលសិនទើបជារឿងល្អ។ ការដែលមិនលើកទឹកចិត្តឲ្យប្រជាពលរដ្ឋប្រារព្ធ ឬចូលរួមក្នុងកម្មវិធីជួបជុំនេះ គឺដោយសារតែក្រសួងបារម្ភខ្លាចនូវករណីឆ្លងនាំចូលថ្មី ដែលអាចជារលកទី២ កើតឡើងជាយថាហេតុ។ នេះបើតាមការអះអាងរបស់លោក លី សូវ៉ាន់។
អ្នកនាំពាក្យក្រសួងសុខាភិបាលរូបនេះ បានបញ្ជាក់ទៀតថា ការប្រារព្ធពិធីជួបជុំ ដូចជាពិធីជុបលៀង ឬពិធីមង្គលការ នៅអំឡុងពេលនេះ សូមពន្យារពេលសិនទៅ ព្រោះថា បើនៅតែធ្វើទៀត ក៏មិនចំណេញដែរ ដោយសារតែ ការជួបជុំតម្រូវឲ្យមានការរក្សាគម្លាតពីគ្នា ដូចជាតុទទួលភ្ញៀវដែលធ្លាប់ដាក់បានមនុស្ស១០នាក់ តម្រូវឲ្យដាក់តែ៥នាក់ ដើម្បីរក្សាគម្លាត ណាមួយទៀតនោះ ការប្រារព្ធពិធីជួបជុំនៅអំឡុងពេលនេះក៏មិនប្រាកដថាមានអ្នកចូលរួមនោះដែរ។ ដូច្នេះ ការប្រារព្ធពិធីជុបលៀង និងមង្គលការនាពេលនេះ អាចនឹងខាតបង់ប្រាក់ចោលទៅវិញទេ។
អត្ថបទទាក់ទង!
លោក បញ្ជាក់យ៉ាងដូច្នេះថា «ខ្ញុំគិតថាអញ្ចេះ បើសិនជាយើងបើក (អនុញ្ញាតឲ្យរៀបចំពិធីមង្គលការ) ក៏អត់ល្អដែរ ព្រោះនាំតែគាត់ខាតទេ ព្រោះគ្មាននរណាមកចូលរួម ហើយបើចង់បើក យើងមិនអាចអង្គុយជិតគ្នាបានទេ! រាល់ដងយើងធ្លាប់ដាក់១០នាក់ (ភ្ញៀវអង្គុយហូបការ) ១តុអីចឹងទៅណា តែឥឡូវឲ្យនៅ៥នាក់ អញ្ចឹងនាំតែខាតបងទេ អញ្ចឹងយកល្អ ខ្ញុំសុំឲ្យពន្យារមក! ហើយខ្ញុំក៏សំណូមពរដល់អាជ្ញាធរដែនដី ធ្វើការងារហ្នឹង កុំឲ្យមានការពេលហ្នឹង! ឲ្យគាត់ពន្យារពេលសិនទៅ ក្នុងពេលមានមេរោគរាតត្បាតហ្នឹង កុំឲ្យមានការរីករាលដាលហ្នឹងបាទ!»។
លោក លី សូវ៉ាន់ សង្កត់ធ្ងន់ទៀតថា «ទី១ ខាតបង់ថវិកា, ទី២គ្មាននរណាចូលរួមទេ! ហើយទី៣ ត្រូវអនុវត្តតាមគម្លាតបុគ្គលនោះ ដូច្នេះ ធ្វើឲ្យគាត់ខាតបង់! ចឹងកុំឲ្យមានការរៀបការ ឬជួបជុំគ្នាអី»។
លោក អ៊ឹង គៀន អ្នកគ្រប់គ្រងមជ្ឈមណ្ឌលពិព័រណ៌កោះពេជ្រ បានអះអាងដែរថា តាំងពីពាក់កណ្ដាលខែមីនាមកទល់ពេលនេះ ខាងមជ្ឈមណ្ឌលរបស់លោក មិនទាន់មានការប្រារព្ធកម្មវិធីអ្វីនោះទេ គឺនៅបន្ដផ្អាកដំណើរការ និងកំពុងរង់ចាំមើលគោលការណ៍ ក៏ដូចជាវិធានការថ្មីពីក្រសួងសុខាភិបាលដែរ។
ជាមួយគ្នានេះ លោក ទូច រដ្ឋា អ្នកគ្រប់គ្រងទូទៅអាជីវកម្មរៀបចំកម្មវិធី និងចុងភៅ សេងហុងហេង បានលើកឡើងថា តាំងពីមានកូវីដ-១៩នេះ ការប្រារព្ធពីធីរៀបមង្គលការ គឺពិតជាស្ងប់ស្ងាត់មែន ប៉ុន្ដែលោកថា សម្រាប់អាជីវកម្មរបស់លោក បើទោះបីជាស្ងាត់កម្មវិធីរៀបមង្គលការមែន តែលោកនៅទទួលបានកម្មវិធីខ្លះៗដែរ ដូចជាខួបកំណើត និងពិធីបុណ្យនានាជាដើម។
សូមរម្លឹកថា ក្នុងរយៈពេលប្រមាណជា ៣សប្ដាហ៍ជាប់គ្នានេះ កម្ពុជាមិនបានរកឃើញករណីឆ្លងកូវីដ-១៩ថ្មីនោះទេ ដែលបាននាំឲ្យករណីឆ្លងកូវីដ-១៩សរុបនៅរក្សាតួលេខដដែល គឺចំនួន ១២២នាក់ ក្នុងនោះ អ្នកដែលត្រូវបានព្យាបាលសះស្បើយមានចំនួន ១២០នាក់ ខណៈដែលអ្នកកំពុងសម្រាកព្យាបាលនៅសល់តែ ២នាក់ប៉ុណ្ណោះ។
សូមបញ្ជាក់ថា ថ្មីៗនេះ បើយើងក្រឡេកទៅមើលប្រទេសជិតខាងរបស់កម្ពុជាយើង ដូចជាវៀតណាមជាដើមនោះ ឃើញថាបានបន្ធូរបន្ថយវិធានការទប់ស្កាត់ការឆ្លងមេរោគកូវីដ-១៩ជាងមុន ដោយបានអនុញ្ញាតឲ្យសិស្សចូលរៀននៅសាលាឡើងវិញ ខណៈដែលនៅប្រទេសថៃ ក៏មានការអនុញ្ញាតឲ្យបើកអាជីវកម្មមួយចំនួនឡើងវិញផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
