ក្រុមហ៊ុន Foxconn កាន់តែបង្ហាញមហិច្ឆតាធំក្នុងការផលិតរថយន្តអគ្គិសនីរបស់ខ្លួន ខណៈក្រុមហ៊ុននេះ បានប្រាប់ទៅវិនិយោគិន តាមរយៈសន្និសីទអនឡាញនាពេលកន្លងទៅថ្មីៗនេះថា ផែនការរបស់ក្រុមហ៊ុន នឹងសាងសង់គម្រោងចក្រផលិតរថយន្តអគ្គិសនីនៅសហរដ្ឋអាមេរិក និងប្រទេសថៃនៅឆ្នាំ ២០២២ ហើយនឹងចាប់ផ្តើមផលិតរថយន្តទ្រង់ទ្រាយធំនៅឆ្នាំបន្តបន្ទាប់។
លោក លោក យ៉ុង លីវ (Young Liu) ប្រធានក្រុមហ៊ុន Foxconn បាននិយាយថា ក្រុមហ៊ុនក៏កំពុងពិភាក្សាផងដែរ ទាក់ទងនឹងទីតាំង ដែលអាចសាង់រោងចក្ររថយន្តអគ្គិសនីនៅអឺរ៉ុប ព្រោះថាវាជាផ្នែកមួយនៃយុទ្ធសាស្ត្រឈានមុខគេរបស់ក្រុមហ៊ុន។
ទន្ទឹមនេះ លោក លីវ បានបន្តទៀតថា រោងចក្រប្រទេសថៃនឹងក្លាយជាផ្នែកមួយនៃការបណ្តាក់ទុនរួមគ្នារបស់ Foxconn ជាមួយក្រុមហ៊ុនប្រេងឥន្ធនៈថៃ PTT ដើម្បីអភិវឌ្ឍផែនការផលិតរថយន្តអគ្គិសនី និងផលិតគ្រឿងបន្លាស់ ខណៈដែលរោងចក្រនេះក្នុងដំណាក់កាលដំបូងនឹងដោះស្រាយបញ្ហាទីផ្សារនៅក្នុងប្រទេសថៃ បន្ទាប់មកនឹងធ្វើការនាំចេញផលិតផលបន្តិចម្តងៗ ទៅកាន់បណ្តាប្រទេសក្នុងតំបន់អាស៊ាន។ លោកបានរំពឹងថា សមត្ថភាពក្នុងការផលិតប្រចាំឆ្នាំ ដែលបានគ្រោងទុក គឺអាចនឹងឈានដល់ ១៥ម៉ឺន ទៅ ២០ម៉ឺនគ្រឿង។
អត្ថបទគួរអាន
ដោយឡែករោងចក្រនៅអាមេរិក Foxconn បានចាប់ដៃគូជាមួយនឹងក្រុមហ៊ុនក្នុងស្រុកទើបបង្កើតថ្មីមួយរបស់អាមេរិកឈ្មោះ Fisker ដើម្បីបង្កើតរោងចក្រផលិតយន្ដអគ្គិសនី ក្រោមម៉ាកយីហោរបស់ Fisker ដើម្បីលក់ទៅកាន់ទីផ្សារអាមេរិកខាងជើង អឺរ៉ុប ចិន និងឥណ្ឌាជាដើម។ ក្រុហ៊ុន Foxconn និង Fisker បានចុះកិច្ចព្រមព្រៀងជាមួយគ្នាកាលពីខែឧសភាឆ្នាំ២០២១ និងគ្រោងបើកដំណើររោងចក្រនៅឆ្នាំ២០២៣។
សូមរំលឹកថា ការផលិតផលរថយន្តអគ្គិសនីនេះ គឺចាំបាច់ត្រូវតែប្រើប្រាស់នូវបន្ទះឈីបដើម្បីធានាបាននូវប្រភពនៃឧបករណ៍អេឡិចត្រូនិក ដូច្នេះហើយកាលពីសប្ដាហ៍មុន ក្រុមហ៊ុន Foxconn បានប្រកាសពីការទិញយកសមត្ថភាពផលិតបន្ទះឈីបពីក្រុមហ៊ុនផលិតបន្ទះឈីបតៃវ៉ាន់ Macronix ក្នុងតម្លៃប្រមាណ ៩០លានដុល្លារ ដើម្បីបំពេញខ្សែចង្វាក់ផ្គត់ផ្គង់បន្ទះឈីបសម្រាប់ការផលិតរបស់ខ្លួនាពេលខាងមុខនេះ ខណៈបញ្ហាខ្វះខាតបន្ទះឈីបនេះ កំពុងបង្កផលលំបាកជាច្រើនផលិតផលកម្មយានយន្ដនាពេលបច្ចុប្បន្ននេះ៕
អត្ថបទ៖ ស៊ើង និមល់
None
