ថៃ បន្ទន់​ឥរិយាបថទាក់ទងសុំចរចាបញ្ហាព្រំដែនជាមួយមីយ៉ាន់ម៉ា ខណៈជម្លោះជាមួយកម្ពុជា នៅតែបន្តជាប់គាំង

អ្វីដែលគួរឱ្យចាប់អារម្មណ៍ គឺការចរចាជាមួយកម្ពុជា នៅកម្រិតក្រសួងការពារជាតិ ត្រូវបានផ្អាក ដើម្បីរង់ចាំការពិភាក្សានៅកម្រិតយោធា។ ទោះជាយ៉ាងណា ភាគីថៃ នៅតែអះអាងថា កងទ័ពរបស់ខ្លួនត្រៀមខ្លួនរួចជាស្រេច និងកំពុងគ្រប់គ្រងស្ថានការណ៍។ នេះបើយោងតាមកាសែត The Nation ចុះផ្សាយនៅថ្ងៃទី២ ខែវិច្ឆិកា។
រដ្ឋមន្ត្រីការពារជាតិថៃ លោកឧត្តមសេនីយ៍ឯក អាឌុល ប៊ុនធុំចារឿន (Adul Boonthumjaroen) បានឱ្យដឹងថា លោក និងមេបញ្ជាការកំពូលរបស់ថៃ បានទាក់ទងតាមទូរសព្ទទៅថ្នាក់ដឹកនាំយោធាជាន់ខ្ពស់មីយ៉ាន់ម៉ា ដើម្បីសុំចរចាជុំវិញការប្រយុទ្ធគ្នារបស់មីយ៉ាន់ម៉ា នៅតាមព្រំដែន ដែលបានធ្វើឱ្យពលរដ្ឋថៃ រងការភិតភ័យដោយសារគ្រាប់ផ្លោងធ្លាក់ពីទឹកដីមីយ៉ាន់ម៉ា ចូលទឹកដីថៃ ជាបន្តបន្ទាប់។ រដ្ឋមន្ត្រីការពារជាតិថៃ រូបនេះ ក៏បានអញ្ជើញអនុព័ន្ធយោធា ស្តីទី មីយ៉ាន់ម៉ា មកស្តាប់ការព្រួយបារម្ភរបស់ថៃ ផងដែរ ដោយអះអាងថា ភាគីមីយ៉ាន់ម៉ា បានឆ្លើយតបជាវិជ្ជមាន។ នេះសបង្ហាញឱ្យឃើញថា ថៃ ហាក់សុភាពរាបសា និងស្លូតបូតដល់ថ្នាក់ដាក់ខ្លួនសុំចរចាជាមួយមីយ៉ាន់ម៉ា។
ដោយឡែកចំពោះបញ្ហាជាមួយកម្ពុជាវិញ រដ្ឋមន្ត្រីការពារជាតិថៃ រូបនេះ បានបញ្ជាក់ថា ជម្លោះព្រំដែនកម្ពុជា-ថៃ នៅមិនទាន់មានដំណោះស្រាយនៅឡើយទេ បន្ទាប់ពីលោកបានចុះទៅពិនិត្យតំបន់ប្រាសាទតាមាន់ធំរបស់កម្ពុជា។ រដ្ឋមន្ត្រីការពារជាតិថៃ បានបញ្ជាក់ថា កិច្ចពិភាក្សានៅកម្រិតក្រសួងការពារជាតិ ត្រូវបានផ្អាក ដើម្បីបើកផ្លូវឱ្យមានការពិភាក្សានៅកម្រិតគណៈកម្មាធិការព្រំដែនថ្នាក់តំបន់កម្ពុជា-ថៃ (RBC) ឬកម្រិតយោធាជាមុនសិន។
ជាមួយគ្នានេះ រដ្ឋមន្ត្រីការពារជាតិថៃ រូបនេះ ក៏បានលើកឡើងពីករណីទាហានកម្ពុជា ព្យាយាមឡើងទៅកាន់ភ្នំលេខ៦៤២ ដោយអះអាងថា កងកម្លាំងថៃ បានទទួលការណែនាំឱ្យអនុវត្តតាមវិធានការប្រតិបត្តិការយោធា ដោយចាប់ផ្តើមពីការសន្ទនា និងការបាញ់ព្រមានជាមុន។ រដ្ឋមន្ត្រីរូបនេះ អះអាងថា ស្ថានការណ៍នៅតាមព្រំដែនកម្ពុជា-ថៃ នៅតែស្ថិតក្រោមការគ្រប់គ្រង ហើយបានអំពាវនាវឱ្យប្រជាពលរដ្ឋថៃ ជឿទុកចិត្តលើការត្រៀមលក្ខណៈរបស់កងទ័ពថៃ៕

ដោយ: តែម សុខុម