អាមេរិក និងចិន នឹងចុះកិច្ចព្រមព្រៀងដំណាក់កាលដំបូងរួមគ្នានៅពាក់កណ្តាលខែមករា២០២០

លោក ដូណាល់ ត្រាំ បានបង្ហោះសារនៅ​លើបណ្តាញ​សង្គមរបស់ខ្លួនថា លោក នឹង​ចុះហត្ថលេខាលើ កិច្ចព្រមព្រៀង​ដ៏ធំមួយ ជាមួយនឹងចិន​នៅពាក់កណ្តាល​ខែមករានេះ ហើយលោក នឹង​ឆ្លៀតពេល​ទៅធ្វើទស្សនកិច្ច​នៅប្រទេសចិន ហើយអាច​នឹងជជែកគ្នា​អំពី កិច្ចព្រមព្រៀង​ដំណាក់កាលទី ២ ថែមទៀតផង។

ដោយឡែក គណៈប្រតិភូចិន ដឹកនាំដោយ​ឧបនាយករដ្ឋមន្រ្តីចិន លោក លូ ហេ ដែលគ្រោងនឹង​ហោះទៅ​អាមេរិក នៅដើមខែមករានេះ ក៏បានផ្លាស់​ប្តូរការធ្វើ​ដំណើរថ្មី រយៈពេល ៤ថ្ងៃ ទៅកាន់អាមេរិក​ ដើម្បីចុះហត្ថលេខា​លើកិច្ច​ព្រមព្រៀងពាណិជ្ជកម្ម​នេះ ដោយរំពឹងនឹង​អាចលុបបំបាត់​សង្គ្រាម​ដ៏ខាតបង់​មួយនេះ។

តំណាងចរចាពាណិជ្ជកម្ម​អាមេរិក លោក រ៉ូបឺត ឡៃធីសឺ បានគូសបញ្ជាក់ថា អាមេរិក យល់ព្រមបន្ធូរបន្ថយ​ពន្ធដែលដំឡើង​ស្រាប់​លើទំនិញចិន និងពន្យារពេល​ដំឡើង​ ពន្ធថ្មី​លើទំនិញ​របស់ចិន ជាការដោះដូរនឹង ការយល់ព្រម​របស់ភាគីចិន ដែលសម្រេច​ទិញទំនិញ​កសិកម្ម ឧស្សាហកម្ម និងថាមពលមកពី​អាមេរិក ដែលមាន​តម្លៃជាង ៥០ពាន់លាន​ដុល្លារអាមេរិក នៅក្នុងរយៈពេល ២ឆ្នាំខាងមុខ។

លោក រ៉ូបឺត គូសបញ្ជាក់​បន្ថែមថា ជាចុងក្រោយ​បង្អស់ ថ្នាក់ដឹកនាំចិន ជាអ្នកសម្រេច​លើ កិច្ចព្រមព្រៀងនេះ ហើយលទ្ធផល​ក៏អាចនឹង​មិនដូចការ​រំពឹងទុកផងដែរ ហើយយ៉ាងណា កិច្ចព្រមព្រៀង​មួយនេះ ក៏មិនអាចដោះស្រាយ​បញ្ហា​ទាំងអស់បានដែរ ដោយសារតែ​ភាពខុសគ្នានៃ ទម្រង់​សេដ្ឋកិច្ច​នៃប្រទេសទាំងពីរ។

ទោះបីជាយ៉ាងណា ក្តីសង្ឃឹមដែលថា មហាអំណាច​សេដ្ឋកិច្ចទាំងពីរ អាចឈាន​ដល់កិច្ច​ព្រមព្រៀង​ពាណិជ្ជកម្ម ដើម្បីបន្ធូរបន្ថយ​កម្តៅសង្គ្រាម​ពាណិជ្ជកម្មនោះ តែងតែស្ថិត​ក្នុងភាពស្រពិច​ស្រពិល​ជានិច្ច ព្រោះថា សេដ្ឋកិច្ចយក្ស-យក្សរបស់​ប្រទេសទាំងពីរ សុទ្ធតែចង់​ឲ្យដៃគូចរចារបស់​ខ្លួន បត់បែនទៅតាម​ការកំណត់​របស់ខ្លួន ហើយវាមិនមែន​ជារឿងងាយ​ស្រួលនោះទេ ដោយហេតុថា ជម្លោះនេះ ចាប់ផ្តើម​ពីរឿងតូច រហូតដល់ ដំឡើងពន្ធ​លើទំនិញ រាប់ពាន់លានដុល្លារដាក់គ្នា៕