ការឆ្លងរីករាលដាលកូវីដ-១៩ បាននិងកំពុងបង្កមហន្ដរាយកាន់តែធំឡើងៗហើយនៅក្នុងប្រទេសឥណ្ឌា ដោយគិតត្រឹមថ្ងៃអាទិត្យចុងសប្ដាហ៍នេះ ត្រឹមរយៈពេល២៤ម៉ោងប៉ុណ្ណោះ ឥណ្ឌាមានអ្នកឆ្លងថ្មីជាង៣១ម៉ឺននាក់ និងអ្នកស្លាប់ថ្មីបានកើនលើស ៤ពាន់នាក់។ សរុបអ្នកឆ្លងនៅនៅឥណ្ឌាគិតត្រឹមថ្ងៃនេះ មានជាង២៤លាននាក់ហើយ ខណៈអ្នកស្លាប់សរុបមាន២៧ម៉ឺននាក់។
ឥណ្ឌាបានផ្ទុះរីករាលដាលរលកឆ្លងលើកទី២ តាំងពីខែកុម្ភៈមក ហើយមកទល់នឹងពេលនេះ បញ្ហាកង្វះគ្រែអ្នកជំងឺ និងឧបករណបំពង់អុកស៊ីហ្សែន នៅតែជាបញ្ហាស្នូលក្នុងការព្យាបាលអ្នកជំងឺកូវីដ-១៩។ ទោះជាយ៉ាងណា មន្ត្រីសុខាភិបាលឥណ្ឌាបាននិយាយកាលពីចុងសប្ដាហ៍កន្លងទៅនេះថា ការតេស្ដរកឃើញវិជ្ជមានកូវីដ-១៩មានការធ្លាក់ចុះមកនៅជិត២០% ពីប្រមាណ២២%កាលពីសប្ដាហ៍មុន ដែលបង្កឲ្យមានក្ដីសង្ឃឹមថា ការឆ្លងប្រចាំថ្ងៃចាប់ផ្ដើមមានស្ថិរភាពបន្ដិចហើយ។
អត្ថបទទាក់ទង
ប៉ុន្ដែ ការកើនឡើងត្រូវបានគេមើលឃើញថា បានកើតមាននៅក្នុងរដ្ឋមួយចំនួនដូចជា នៅតំបន់ភាគខាងត្បូងប្រទេសឥណ្ឌា និងតំបន់ទីជនបទជាដើម។ លោកនាយករដ្ឋមន្ត្រីឥណ្ឌា ណារិនដ្រា ម៉ូឌី បានអំពាវនាវដល់មន្ត្រីនានាឲ្យពង្រឹងធនធានសម្រាប់ការថែទាំងសុខភាពនៅក្នុងតំបន់ជនបទ និងបង្កើនការឃ្លាំមើលឲ្យបានជាប់លាប់ពីការផ្ទុះរាលដាលឆាប់រហ័សនៃមេរោគនៅក្នុងតំបន់ទាំងនោះ បន្ទាប់ពីទីក្រុងមួយចំនួនបានរងប៉ះពាល់ខ្លាំងរួចហើយដោយសារកូវីដ-១៩នេះ។
បើទោះបីជាឥណ្ឌា ត្រូវបានគេស្គាល់ថា ជាប្រទេសផលិតវ៉ាក់សាំងកូវីដ-១៩ធំជាងគេបំផុតក្នុងពិភពលោកក៏ដោយចុះ ប៉ុន្ដែ មកទល់ពេលនេះ ប្រទេសដែលមានប្រជាជនច្រើនជាងគេលំដាប់ទី២ក្នុងលោកមួយនេះ មានអ្នកចាក់វ៉ាក់សាំងកូវីដ-១៩បានត្រឹមតែប្រមាណ ៤០លាននាក់ប៉ុណ្ណោះ ឬស្មើនឹងប្រមាណ៣% នៃចំនួនប្រជាជនសរុបជាង ១ពាន់៣រយលាននាក់។ បើតាមរដ្ឋមន្ត្រីក្រសួងសុខាភិបាលឥណ្ឌា នៅត្រឹមខែកក្កដាខាងមុខនេះ ឥណ្ឌានឹងវ៉ាក់សាំងកូវីដ-១៩សរុប ៥១៦លានដូសសម្រាប់ចាក់ជូនពលរដ្ឋរបស់ខ្លួន៕
None
