បើតាម សារព័ត៌មាន VN Express របស់វៀតណាមបានរាយការណ៍ថា គោលដៅនាំចេញដ៏ធំនេះ ត្រូវបានប្រកាសឡើងដោយលោកនាយករដ្ឋមន្ត្រីវៀតណាមលោក ក្វៀន សៀនហ្វុក នៅក្នុងកិច្ចប្រជុំតាមអនឡាញមួយ ជាមួយនឹងថ្នាក់ដឹកនាំនៅតាមទីក្រុងនិងបណ្ដាខេត្តនានា កាលពីថ្ងៃពេលថ្មីៗនេះ។ ក្នុងនោះ លោក នាយករដ្ឋមន្ត្រីវៀតណាម បានបញ្ជាក់ទៀតថា នឹងជំរុញការនាំចេញឲ្យបានកើនឡើងខ្ពស់ជាងឆ្នាំ២០១៩ រហូតដល់ទៅ ១៣,៨% ទើបអាចសម្រេចបានការនាំចេញ៣០០ ពាន់លានដុល្លារអាមេរិកបាន ខណៈដែលកាលពីឆ្នាំ២០១៩ វៀតណាមសម្រេចបានការនាំចេញ២៦៣,៥ ពាន់លានដុល្លារអាមេរិក ដែលមានកំណើន៨% ធៀបនឹងឆ្នាំ២០១៨។
លោក ក្វៀន សៀនហ្វុក និយាយថា «បន្ទាប់ពីស្ថិតនៅក្នុងអំឡុងពេលឧបត្ថម្ភធនមួយរយៈ ប្រទេសវៀតណាម បានប្រែក្លាយខ្លួនជាអ្នកនាំចេញសកលដ៏ធំមួយ។ ប្រទេសវៀតណាមឥឡូវនេះ មានផលិតផលភាគច្រើនមានលើសពីតម្រូវការ និងអាចស្វែងរកទីផ្សារដើម្បីលក់ចេញទៅកាន់ពិភពលោក»។
អត្ថបទទាក់ទង!
បើទោះបីជាកាលពីឆ្នាំ២០១៩ ប្រទេសវៀតណាមទទួលបានអតិរេកពាណិជ្ជកម្ម ៩,៩៤ ពាន់លានដុល្លារ ដែលជាអតិរេកខ្ពស់៤ឆ្នាំជាប់គ្នាក៏ពិតមែន ប៉ុន្ដែ រដ្ឋាភិបាលប្រទេសនេះ នៅបារម្ភនឹងឱនភាពពាណិជ្ជកម្ម ដែលអាចនឹងកើតមានឡើងនៅឆ្នាំ២០២០នេះ។
លោក Tran Tuan Anh រដ្ឋមន្ត្រីក្រសួងឧស្សាហកម្ម និងពាណិជ្ជកម្ម បានប្រាប់ទៅកាន់រដ្ឋសភាជាតិកាលពីខែវិច្ឆិកា ឆ្នាំ២០១៩ថា ដោយសារតែការនាំចេញវៀតណាមនឹងថយចុះមកនៅ ៦ ទៅ៧% នៅក្នុងឆ្នាំ២០២០នេះ ហើយការនាំចូលនឹងកើនឡើងលឿនក្នុងកម្រិត៨ទៅ១០% ហេតុនេះហើយ វាអាចនឹងមានឱនភាពពាណិជ្ជកម្មតិចតួច។
ការចូលជាធរមាននៃកិច្ចព្រមព្រៀងពាណិជ្ជកម្មសេរីអឺរ៉ុប-វៀតណាម (EVFTA) និងផលប៉ះពាល់កាន់តែអាក្រក់ នៃសង្គ្រាមពាណិជ្ជកម្មរវាងអាមេរិក និងចិន វានឹងអាចនាំមកនូវការកើនឡើងនៃការនាំចូលនៅក្នុងប្រទេសវៀតណាម នៅឆ្នាំក្រោយនេះ។ នេះបើតាមរបាយការណ៍មួយរបស់រដ្ឋាភិបាល។
នាយករដ្ឋមន្ត្រីវៀតណាម ទាមទារឲ្យ មន្ត្រីរដ្ឋាភិបាលក៏ដូចជាក្រសួងពាក់ព័ន្ធឲ្យបង្កើតនូវលក្ខខណ្ឌអំណោយផលសម្រាប់អ្នកនាំចេញ និងបញ្ឈប់រាល់សកម្មភាពការិយាធិបតេយ្យ (ការបង្កើតនូវប្រព័ន្ធរដ្ឋបាលសាំញ៉ាំ) ដែលរាំងស្ទះដល់ដំណើរការនាំចេញ។
លោកនាយករដ្ឋមន្ត្រីបន្ថែមថា ប្រទេសវៀតណាម ក៏ត្រូវការកាត់បន្ថយថ្លៃដឹកជញ្ជូន ដើម្បីបង្កើនតម្លៃបន្ថែមដល់ការនាំចេញ។ តួយ៉ាងក្នុងករណីការនាំចេញផ្លែស្វាយ ដែលបាននាំចេញហើយនោះ នាពេលនេះ មានការចំណាយលើថ្លៃដឹកជញ្ជូនរហូតដល់ទៅ៥០% នៃតម្លៃរបស់ផ្លែស្វាយនោះ។
សូមបញ្ជាក់ថានៅឆ្នាំ ២០១៩កន្លងទៅថ្មីៗនេះ សេដ្ឋកិច្ចវៀតណាមមានកំណើនខ្ពស់រហូតដល់ទៅ ៧,០២% ដែលជាកំណើនខ្ពស់ជាងគោលដៅដែលរដ្ឋាភិបាលប្រទេសនេះបានកំណត់ ៦,៦% ទៅ៦,៨% ក៏ដូចជាស្ថាប័នអន្តរជាតិធំៗ ក៏បានព្យាករដូចរដ្ឋាភិបាលវៀតណាមដែរ។
ពាណិជ្ជកម្មក្រៅប្រទេសរបស់វៀតណាមបានឈានដល់ ៥១៧ ពាន់លានដុល្លារអាមេរិកជាលើកដំបូងនៅឆ្នាំ២០១៩ កើនឡើង៨% ធៀបនឹងឆ្នាំ២០១៨៕
None
