បញ្ហាគ្រោះរាំងស្ងួតនឹងបើកឱកាសឱ្យវៀតណាម ដណ្តើមទីផ្សារនាំចេញទុរេនពីថៃ

លោកសាស្ត្រាចារ្យ អាត ពីសានវ៉ានិច (Aat Pisanwanich) អ្នកជំនាញសេដ្ឋកិច្ចអន្តរជាតិ និងជាទីប្រឹក្សារបស់ក្រុមហ៊ុនស្រាវជ្រាវ Intelligent Research Consultancy ថ្មីៗនេះបានចេញផ្សាយរបាយការណ៍មួយដោយនិយាយថា កង្វះទឹកភ្លៀងនឹងធ្វើឱ្យប៉ះពាល់យ៉ាងធ្ងន់ធ្ងរដល់ការនាំចេញផ្លែទុរេនរបស់ប្រទេសថៃ។ ទុរេនបានក្លាយជាផលិតផលនាំចេញឈានមុខគេរបស់ថៃ កាលពីឆ្នាំមុន ដោយសម្រេចបានតម្លៃនាំចេញជិត៤ពាន់លានដុល្លារ ដោយបានវ៉ាដាច់ផលិតផលកៅស៊ូ និងដំឡូងបារាំង តែបាននាំមុខការនាំចេញអង្ករតែបន្តិចបន្តួចប៉ុណ្ណោះ។

ទោះជាយ៉ាងណាលោក អាត ជឿថា តម្លៃនាំចេញទុរេនក្នុងរយៈពេល៥ឆ្នាំខាងមុខ អាចរងផលប៉ះពាល់ដោយសារតែការធ្លាក់ចុះផលិតកម្មបណ្ដាលមកពីគ្រោះរាំងស្ងួត និងការប្រកួតប្រជែងខ្លាំងពីប្រទេសវៀតណាម។ តែយ៉ាងណា បច្ចុប្បន្នតម្លៃដាំដុះទុរេននៅវៀតណាម ស្មើនឹងពាក់កណ្តាលនៃតម្លៃផលិតនៅប្រទេសថៃ នៅឡើយទេ។

យ៉ាងណាក៏ដោយលោកបានវាយតម្លៃថា ប្រសិនបើរដ្ឋាភិបាលថៃ មិនចាត់វិធានការដោះស្រាយបញ្ហាគ្រោះរាំងស្ងួតទេនោះ ទិន្នផលទុរេនរបស់ថៃនឹងធ្លាក់ចុះ៥៣%នៅ៥ឆ្នាំខាងមុខ ដោយធ្លាក់មកនៅត្រឹមតែ៦៤ម៉ឺនតោនប៉ុណ្ណោះ ខណៈគ្រោះរាំងស្ងួតនៅឆ្នាំនេះ បានធ្វើឱ្យទិន្នផលទុរេនធ្លាក់ចុះ៤២% ឬប្រហែល៥៤ម៉ឺនតោនរួចស្រេចទៅហើយ។ អ្នកសិក្សារូបនេះបាននិយាយថា បើប្រៀបធៀបផលិតកម្មទុរេនរវាងប្រទេសទាំងពីរនេះឃើញថា ផលិតកម្មនៅវៀតណាម បានកើនឡើង២០០% ក្នុងរយៈពេល១ទសវត្សរ៍ចុងក្រោយនេះ។

សូមបញ្ជាក់ថា បច្ចុប្បន្នតម្លៃលក់រាយទុរេននៅប្រទេសថៃ មានចន្លោះពីជិត៣ដុល្លារ ទៅជាង៥ ដុល្លារក្នុងមួយគីឡូក្រាម ចំណែកការលក់រាយនៅប្រទេសវៀតណាមវិញមានតម្លៃចន្លោះពីជាង៣ដុល្លារទៅជាង៦ដុល្លារ ក្នុងមួយគីឡូក្រាម ​៕

អត្ថបទ៖ សុខ មង្គល