អត្ថបទទាក់ទង
គណនីវ៉លឡេត គឺជាគណនីដែលកើតឡើងពីលេខទូរសព្ទរបស់ម្ចាស់អេស៊ីលីដាម៉ូបាល ដោយសារនៅពេលដែលអតិថិជនទាញយក (Download) កម្មវិធីនេះមកប្រើក្នុងទូរសព្ទដៃ លេខទូរសព្ទរបស់អតិថិជន គឺជាលេខគណនីពិសេសរបស់គាត់តែម្តង បានន័យថា អតិថិជនបង្កើតគណនីនេះដោយខ្លួនឯងបាន ដោយមិនចាំបាច់មកធនាគារនោះទេ ។ គណនីនេះ ងាយស្រួលចាំ ងាយស្រួលធ្វើប្រតិបត្តិការ គ្រប់សេវាធនាគារ ហើយអាចប្រើប្រាស់ប្រាក់រហូតដល់ ១ម៉ឺនដុល្លារ សម្រាប់ធ្វើប្រតិបត្តិការគ្រប់សេវាធនាគារ ដោយមិនគិតថ្លៃសេវា ។
ចំពោះគណនីធនាគារវិញ គឺអតិថិជនត្រូវអញ្ជើញមកបើកនៅធនាគារដោយផ្ទាល់ ។
លោកស្រី សុខ សោភា នាយិកាប្រតិបត្តិជាន់ខ្ពស់ទីផ្សារ នៃធនាគារ អេស៊ីលីដា បានមានប្រសាសន៍ឱ្យដឹងពីគណនីទាំងពីរនេះ យ៉ាងដូច្នេះថា ៖ «គណនីវ៉លឡេត (Wallet) នៅលើអេស៊ីលីដាម៉ូបាល មានអត្ថប្រយោជន៍យ៉ាងច្រើនសម្រាប់ធ្វើប្រតិបត្តិការសេវាធនាគារនៅក្នុងស្រុក ដូចជា ផ្ទេរប្រាក់ ទទួលប្រាក់ បង់ថ្លៃទឹកភ្លើង ទូទាត់ទំនិញ ទិញទំនិញអនឡាញ ជំនួសឲ្យការកាន់សាច់ប្រាក់ បញ្ចូលប្រាក់ក្នុងទូរសព្ទ ។ល។ រីឯគណនីធនាគារវិញ ប្រើប្រាស់បានជាលក្ខណៈអន្តរជាតិ ។ អតិថិជនអាចប្រើប្រាស់ប្រាក់ក្នុងគណនីធនាគារគ្មានចំនួនកំណត់ទេ ដាក់ប៉ុន្មានក៏បានដែរ ប៉ុន្តែ គណនីវ៉លឡេត គឺអតិថិជនអាចប្រើប្រាស់ ឬធ្វើចរាចរសាច់ប្រាក់បានត្រឹម ១ម៉ឺនដុល្លារតែប៉ុណ្ណោះ ប៉ុន្តែ វាមានលក្ខណៈពិសេសម៉្យាង គឺថា អតិថិជនលោកមានជម្រើសពីរក្នុងពេលតែមួយ ទោះជាគណនីណាមួយមានលុយលើស ឬខ្វះ ប្រព័ន្ធធនាគារនឹងជម្រាបជូនដំណឹងទៅគាត់ដោយស្វ័យប្រវត្តិ ហើយកាន់តែពិសេសជាងនេះទៅទៀត អតិថិជនក៏អាចធ្វើការផ្ទេរពីគណនីវ៉លឡេតទៅគណនីធនាគារទៅវិញទៅមកបានយ៉ាងងាយស្រួលដែរ និងមិនអស់ថ្លៃសេវា ផងដែរ ។»
ដូច្នេះ ចង់ដឹងថា អេស៊ីលីដាម៉ូបាល ងាយស្រួលប្រើកម្រិតណានោះ អតិថិជនដែលមិនទាន់មាន អាចធ្វើការដោនឡូត និងចុះឈ្មោះប្រើភ្លាមៗដោយមិនចាំបាច់ធ្វើដំណើរមកធនាគារទេ ៕
