ឥណ្ឌាបានរកឃើញអ្នកឆ្លងកូវីដ-១៩ថ្មី ក្នុងចំនួនរាប់សិបម៉ឺននាក់បែបនេះ អស់រយៈពេលប្រមាណ ១០ថ្ងៃជាប់ៗគ្នាមកហើយ ដែលប្រការនេះហើយ បានធ្វើឲ្យអ្នកឆ្លងសរុបនៅប្រទេសឥណ្ឌាកើនឡើងដល់ ១៩លាននាក់ និង មានអ្នកស្លាប់សរុបដល់ទៅជាង ២១ម៉ឺននាក់។ រដ្ឋ អំណាចដែនដីរបស់ឥណ្ឌាបានដាក់ចេញនូវទម្រង់នៃវិធានការរឹតត្បិត បើទោះបីជារដ្ឋាភិបាលកណ្ដាលរបស់ប្រទេសឥណ្ឌាហាក់នៅមានភាពស្ទាក់ស្ទើរក្នុងការដាក់វិធានការបិទខ្ទប់ទូទាំងប្រទេសទាំងមូលក៏ដោយ។
អត្ថបទទាក់ទង
ឥណ្ឌាជាប្រទេសអ្នកផលិតវ៉ាក់សាំង កូវីដ-១៩ ធំជាងគេបំផុតនៅលើពិភពលោក ការចាក់វ៉ាក់សាំងនៅតាមរដ្ឋខ្លះកាលពីថ្ងៃសៅរ៍សប្តាហ៍មុន ហាក់មិនមានសញ្ញាល្អ និងដំណើរការទៅរលួននោះទេ ដោយសារតែតាមមណ្ឌលចាក់វ៉ាក់សាំងនីមួយៗមិនមានវ៉ាក់សាំងចាក់គ្រប់គ្រាន់ និងជាពិសេសមិនមានវ៉ាក់សាំងសម្រាប់ចាក់ឲ្យមនុស្សពេញវ័យ ដូចទៅនឹងផែនការដែលបានគ្រោងទុក។
ការកើនឡើងនៃការឆ្លងកូវីដ១៩ បានបង្កឲ្យមានចំនួនដ៏ច្រើនលើសលុបនៃអ្នកជំងឺនៅតាមមន្ទីរពេទ្យ កន្លែងបញ្ចុះសព និងកន្លែងបូជាសព។ កុំថាឡើយតែ បំពង់អុកស៊ីហ្សែន និងបរិក្ខារពេទ្យនានា ដែលកំពុងខ្វះខាត សូម្បីតែអុសសម្រាប់បូជាសពអ្នកស្លាប់ដោយសារជំងឺកូវីដនៅឥណ្ឌាក៏កំពុងខ្វះខាតផងដែរ។
តើមានមូលហេតុអ្វីខ្លះដែលបណ្តាលឲ្យឥណ្ឌាធ្លាក់ក្នុងមហន្ដរាយយ៉ាងដូច្នេះ?
ស្ថានភាពនៃការរីករាតត្បាតជំងឺកូវីដ កាន់តែធ្ងន់ធ្ងរសព្វថ្ងៃនេះដោយសារតែការគ្រប់គ្រងមិនបានល្អ ការមើលស្រាលរបស់រដ្ឋាភិបាលឥណ្ឌាទៅលើជំងឺកូវីដ-១៩។
នៅដើមខែ កុម្ភៈ នាយករដ្ឋមន្ត្រីឥណ្ឌា លោក ណារិនដ្រា ម៉ូឌី បានប្រកាសក្តែងៗថា ប្រទេសឥណ្ឌាបានយកឈ្នះលើជំងឺកូវីដ-១៩ដោយជោគជ័យហើយ ដោយសារតែកាលនោះ ករណីឆ្លងថ្មីមានត្រឹមតែ ៩ពាន់នាក់ក្នុងមួយថ្ងៃ។ នៅចំពោះមុខពលរដ្ឋឥណ្ឌា លោក ណារិនដ្រា ម៉ូឌី បានលើកសរសើរខ្លួនទៀតថា លោក ជាអ្នកស្រោចស្រង់ប្រទេសឥណ្ឌា ហើយបានធ្វើឲ្យឥណ្ឌាក្លាយជាប្រទេសផលិតវ៉ាក់សាំងធំជាងគេបំផុតក្នុងពិភពលោកថែមទៀតផង។ ដោយសារតែមូលហេតុទាំងនេះហើយ ទើបរដ្ឋាភិបាលលោក ណារិនដ្រា ម៉ូឌី ចាប់ផ្តើមឈប់រិតបន្ដឹងវិធានការសុវត្ថិភាពដូចមុនទៀត។
រដ្ឋាភិបាលក៏បានអនុញ្ញាត ឲ្យមានពិធីបុណ្យសាសនា ហិណ្ឌូដ៏ធំដែលមានមនុស្សចូលរួមរាប់លាននាក់ និងយុទ្ធនាការឃោសនាបោះឆ្នោត ដូចធម្មតា។ ធ្លាក់ក្នុងស្ថានភាពកូវីដ-១៩ ធ្ងន់ធ្ងរបែបនេះទៅហើយ ឥណ្ឌានៅតែបន្តរៀបចំការបោះឆ្នោតប្រចាំរដ្ឋទៀត ដែលប្រការនេះធ្វើឲ្យគេបារម្ភថា អាចជាកត្តាជំរុញ ឲ្យមានការឆ្លងរាលដាលកាន់តែខ្លាំងនៅប្រទេសនេះ។
ក្រៅពីនោះ គេសង្កេតឃើញ ថានៅក្នុងពិធីបុណ្យសាសនា ហិណ្ឌូ ក៏ដូចជាក្នុងយុទ្ធនាការឃោសនាបោះឆ្នោត មានមនុស្សរាប់សែននាក់រាប់លាននាក់បានចូលរួម ដោយពុំមានរក្សាគម្លាត និងពាក់ម៉ាសការពារអ្វីនោះទេ។ គេវាយតម្លៃថាការជួបជុំមនុស្សដ៏កកកុញ ក្នុងពិធីបុណ្យនៅទន្លេគង្គារ និង នៅតាមភូមិស្រុក បូករួមការប្រមូលផ្តុំធ្វើកិច្ចប្រជុំឃោសនា របស់គណបក្សនយោបាយ គឺជាកត្តាចម្បងមួយដែលធ្វើឲ្យចំនួនឆ្លងកូវីដ-១៩បានហក់ឡើងខ្លាំងដូចនេះ។
បន្ថែមពីលើការមើលស្រាលស្ថានការណ៍ រដ្ឋាភិបាលឥណ្ឌាមិនបានយកចិត្តទុកដាក់នឹងការព្រមានរបស់អ្នកវិទ្យាសាស្ត្រនោះទេ
កាលពីដើមខែមីនាកន្លងទៅ ភ្នាក់ងារព័ត៌មាន Reuters បានឲ្យផ្សាយថា អ្នកជំនាញវិទ្យាសាស្ត្រមួយក្រុម បានព្រមានអំពីមេរោគបំប្លែងខ្លួនថ្មីដែលអាចបំប្លែងខ្លួនទ្វេដង និងមានការឆ្លងសាហាវជាងមេរោគចាស់ កំពុងចាប់ផ្ដើមកើតមាននៅឥណ្ឌា។
អ្នកវិទ្យាសាស្ត្រទាំង៥នាក់បានប្រាប់ទីភ្នាក់ងារ Reuters ទៀតថា ទោះបីមានការព្រមានបែបនេះក្ដី រដ្ឋាភិបាលកណ្ដាលឥណ្ឌាបានធ្វើព្រងើយកន្តើយមិនព្រមចាត់វិធានការភ្លាមៗនោះទេ ដោយអនុញ្ញាតឲ្យប្រជាជនរាប់សែនរាប់លាននាក់មកជួបជុំគ្នា ក្នុងពិធីសាសនាដោយមិនពាក់ម៉ាស់ កសិករជួបជុំគ្នាធ្វើបាតុកម្មតវ៉ា ការជួបប្រជុំក្នុងយុទ្ធនាការឃោសនារកសម្លេងឆ្នោត ជាដើម។
សូមបញ្ជាក់ថា រហូតមកដល់ពេលនេះមានប្រទេសចំនួន១៩ហើយ ដែលចុងក្រោយ គឺវៀតណាម និង បារាំង ដែលធ្វើតេស្តរកឃើញមានករណីមេរោគកូវីដ បំប្លែងខ្លួនថ្មីមកពីឥណ្ឌានេះ។ ដោយឡែក មានប្រទេសជាច្រើនមកពីជុំវិញពិភពលោក ក៏បានផ្តើមបិទជើងហោះហើរជាមួយឥណ្ឌាផងដែរ ដើម្បីបញ្ចៀសការឆ្លងមេរោគកូវីដ-១៩បំប្លែងខ្លួនថ្មីដ៏កាចសាហាវនេះ។ ក្នុងនោះ គេសង្កេតឃើញថាអូស្ត្រាលីបានចេញវិធានការក្តៅជាងគេ ដោយបានកំណត់ទោសទណ្ឌរហូតដល់ជាប់ពន្ធនាគារ សម្រាប់ជនជាតិអូស្ត្រាលីណា ដែលហ៊ានលួចចេញពីឥណ្ឌាត្រឡប់មកអូស្ត្រាលីវិញក្នុងពេលនេះ៕
None
