អង្គការទេសចរណ៍ពិភពលោកបានគូសបញ្ជាក់ថា ចរន្តនៃការមកដល់របស់ភ្ញៀវទេសចរជាសកលនឹង មិនប្រសើរឡើងនោះទេក្នុងឆ្នាំនេះ ហើយវាក៏មិនអាចត្រឡប់មករកសភាពធម្មតាវិញបានដែរ រហូតដល់ឆ្នាំ២០២៣ លើកលែងតែប្រទេសក្នុងតំបន់អឺរ៉ុបមួយចំនួនប៉ុណ្ណោះ ដែលពួកគេមានការចាក់វ៉ាក់សាំងបង្ការកូវីដ-១៩ បានចំនួនច្រើន។
ជាការពិត របាយការណ៍អង្គការទេសចរណ៍ពិភពលោកបានផ្តល់ក្តីសង្ឃឹមខ្ពស់លើការចាក់វ៉ាក់សាំងបង្ការ និងការប្រើប្រាស់លិខិតឆ្លងដែនបញ្ជាក់ពីការចាក់វ៉ាក់សាំង ដើម្បីឈានទៅស្តារឡើងវិញនូវវិស័យទេសចរណ៍អន្តរជាតិ ដែលជាវិស័យដ៏សំខាន់សម្រាប់ប្រទេសនានាក្នុងពិភពលោក ជាពិសេសប្រទេសកូនកោះតូចៗ ដែលមានសក្តានុពលទេសចរណ៍ធម្មជាតិ ហើយពឹងផ្អែកលើវិស័យនេះស្ទើរទាំងស្រុង ដើម្បីរកចំណូលនឹងបង្កើតការងារដល់ប្រជាជន។
គួររំឭកថានៅឆ្នាំ២០២០ គ្រាដែលកូវីដ១៩បានចាប់ផ្ដើមរាលដាលពាសពេញពិភពលោក ការធ្វើដំណើររបស់ទេសចរជាសកលបានដាំក្បាលចុះជាង ៧០% បើធៀបនឹងឆ្នាំ២០១៩ ដែលប្រការនេះបានធ្វើឲ្យបាត់បង់ចំណូលសរុបក្នុងវិស័យទេសចរណ៍ និងវិស័យ ដែលពាក់ព័ន្ធនឹងទេសចរណ៍នៅទូទាំងពិភពលោកប្រមាណ ២,៤ទ្រីលានដុល្លារអាមេរិក។
អត្ថបទគួរអាន
ទន្ទឹមនឹងនេះ របាយការណ៍បានធ្វើការព្យាករតាមរយៈការដាក់ចេញនូវ សេណារីយ៉ូ ចំនួន៣ សម្រាប់ស្ថានភាពទេសចរណ៍ពិភពលោកក្នុងឆ្នាំ២០២១នេះ ដោយក្នុងនោះ មានសេណារីយ៉ូមួយ ដែលបានបង្ហាញថា ចរន្តទេសចរណ៍នៅបន្តដាំក្បាលចុះពី ៦០%ទៅ៧០% ដដែល បើធៀបនឹងឆ្នាំ២០១៩ ជាឆ្នាំមិនទាន់កើតរោគកូវីដរាតត្បាត ដែលវានឹងជំរុញឲ្យខាតបង់ប្រាក់ ចន្លោះ ១,៧ ទ្រីលានដុល្លារទៅ ២,៤ទ្រីលានដុល្លារបន្ថែមទៀត។
យ៉ាងណាមិញ តំបន់អឺរ៉ុបទំនងនឹងក្លាយទៅជាតំបន់តែមួយគត់ និង ដំបូងគេក្នុងពិភពលោកដែលនឹងអាចស្តារបានខ្លះឡើងវិញនូវវិស័យទេសចរណ៍ដោយហេតុថា លិខិតឆ្លងដែនបែបឌីជីថល ដែលបញ្ជាក់ពីកូវីដ១៩របស់អឺរ៉ុប នឹងផ្តើមចូលជាធរមាននៅថ្ងៃព្រហស្បតិ៍សប្តាហ៍នេះហើយ៕
None
