ក្នុងជំនួបជាមួយប្រធានាធិបតីឥណ្ឌូនេស៊ីនៅថ្ងៃអង្គារទី១៤ធ្នូ រដ្ឋមន្ត្រីការបរទសអាមេរិកបាននិយាយថា រដ្ឋបាលលោកចូ បៃឌិន មានការតាំងចិត្តខ្ពស់ក្នុងការថែរក្សាសន្តិភាព និងភាពរុងរឿងនៃតំបន់ឥណ្ឌូប៉ាស៊ីហ្វិក តាមរយៈការបង្កើនទំនាក់ទំនង និងកិច្ចសហប្រតិបត្តិការថ្មីៗ។
រដ្ឋមន្ត្រីការបរទេសអាមេរិក លោកប្លីងខេន បាននិយាយថា សហរដ្ឋអាមេរិកនឹងអនុវត្ត យុទ្ធសាស្ត្រ ធ្វើយ៉ាងណារំកិលទំនាក់ទំនងឲ្យកាន់តែជិតស្និទ្ធជាមួយប្រទេសនៅឥណ្ឌូប៉ាស៊ីហ្វិក ដូចជាវិស័យការទូត យោធា និងការស៊ើបការណ៍សម្ងាត់ជាដើម។
ទោះបីជាយ៉ាងនេះក្តី មន្ត្រីជាន់ខ្ពស់ក្រុងវ៉ាស៊ីនតោនរូបនេះ នៅតែអះអាង ម្តងហើយម្តងទៀតថា អាមេរិកនឹងមិនបង្ខិតបង្ខំឲ្យប្រទេសណាមួយ ពិសេសប្រទេសនៅតំបន់ឥណ្ឌូប៉ាស៊ីហ្វិក ជ្រើសយកប្រទេសណាមួយ ក្នុងចំណោមអាមេរិក ឬចិននោះទេ។ បន្ថែមពីលើនេះ សហរដ្ឋអាមេរិកក៏មិនចង់មានជម្លោះជាក្រុងប៉េកាំងផងដែរ។
អត្ថបទគួរអាន
ក្រៅតែពីការសន្យាក្នុងវិស័យយោធា និងសេដ្ឋកិច្ច សហរដ្ឋអាមេរិកក៏បានបង្ហាញការតាំងចិត្តខ្ពស់ ក្នុងការបន្តផ្តល់ឲ្យប្រទេសតំបន់ឥណ្ឌូប៉ាស៊ីហ្វិក នូវវ៉ាក់សាំងបង្ការកូវីដ១៩ គួបផ្សំនឹងការជួយគាំទ្រដល់កិច្ចខិតខំប្រឹងប្រែងក្នុងការដោះស្រាយបញ្ហាប្រែប្រួលអាកាសធាតុផងដែរ។
គួរជម្រាបថា បច្ចុប្បន្នរដ្ឋមន្ត្រីការបរទេសអាមេរិក លោកអាន់តូនី ប្លីងខេន កំពុងមានវត្តមានក្នុងប្រទេសឥណ្ឌូនេស៊ី អំឡុងដំណើរទស្សនកិច្ចរយៈជិតមួយសប្តាហ៍របស់លោកមកកាន់ប្រទេសតំបន់អាស៊ាន។ ក្រោយបញ្ចប់បេសសកម្មនៅឥណ្ឌូនេស៊ី លោកនឹងធ្វើដំណើរទៅប្រទេសម៉ាឡេស៊ី និងថៃបន្តទៀត។ របៀបវីរៈសំខាន់ៗក្នុងដំណើរទស្សនកិច្ចលើកនេះរបស់លោក ប្លីងខេន រួមមាន បញ្ហាឥទ្ធិពល និងវត្តមានយោធាចិននៅក្នុងតំបន់ បញ្ហាសមុទ្រចិនខាងត្បូង បញ្ហានៅហុងកុង និងកោះតៃវ៉ាន់ជាដើម៕
None
