ប្រភពព័ត៌មានចុងក្រោយបង្ហាញថា ក្នុងរយៈពេលតែ៤ថ្ងៃភ្លើងបានឆាបឆេះព្រៃឈៃអស់ជិត ៧ពាន់ហិកតា ចំណែកប្រជាជនជាង ៦ពាន់នាក់ ត្រូវបានជម្លៀសចេញពីតំបន់រងគ្រោះដោយសារភ្លើង ភាគច្រើននៃពួកគេបានស្នាក់នៅក្នុងជម្រកបណ្តោះអាសន្ន។ នាយកដ្ឋានពន្លត់អគ្គីភ័យនៃរដ្ឋកាលីហ្វ័រញ៉ាបានឱ្យដឹងថា ក្រុមពន្លត់អគ្គិភ័យអាចគ្រប់គ្រងស្ថានការណ៍ភ្លើងដែលកំពុងឆេះបាន ១០%ប៉ុណ្ណោះ ខណៈ៩០%ទៀតបន្តរាលដាលយ៉ាងលឿនរហ័ស។
ដោយឡែក នាយកដ្ឋានព្រៃឈើ និងការពារអគ្គីភ័យ នៃរដ្ឋកាលីហ្វ័រញ៉ា បានរាយការណ៍ថា អគារចំនួនជាង ៣ពាន់២រយ ដែលរាប់ទាំងផ្ទះ និងអាគារពាណិជ្ជកម្ម ស្ថិតនៅក្រោមការគំរាមកំហែងនៃភ្លើងរាលដាល។
គួរជម្រាបថា នៅក្នុងប្រវត្តិភ្លើងឆេះព្រៃនៅរដ្ឋកាលីហ្វ័រនីញ៉ា ភាគខាងលិចអាមេរិក ភ្លើងឆេះព្រៃនៅឆ្នាំនេះត្រូវបានគេចាត់ទុកជាភ្លើងឆេះព្រៃដ៏សម្បើម ដោយមើលទៅលើលក្ខណៈ និងល្បឿនឆេះរាលដាលដ៏លឿនរបស់វា ដែលគេមិនធ្លាប់ជួបប្រទះពីមុនមក។
អត្ថបទគួរអាន
ទំហំនៃការឆាបឆេះលើកនេះ គឺជាការចាប់ផ្តើមដ៏អាក្រក់មួយចំពោះរដូវកាលភ្លើងឆេះព្រៃនៅរដ្ឋកាលីហ្វ័រញ៉ា ហើយក្រុមមន្ត្រីបានព្រមានថា ការរួមបញ្ចូលគ្នានៃគ្រោះរាំងស្ងួត ការប្រែប្រួលអាកាសធាតុ និងឈើដែលងាប់ស្ងួតចែសដោយសារការឡើងកំដៅខ្លាំង កំពុងរុញច្រានឱ្យភ្លើងឆេះរាលដាលកាន់តែឆាប់រហ័ស។
សូមបញ្ជាក់ថា តំបន់ភាគច្រើនទូទាំងសហរដ្ឋអាមេរិកកំពុងទទួលរងរលកកំដៅដ៏ក្តៅហួតហែង ខណៈការប្រកាសឱ្យប្រុងប្រយ័ត្នបានចូលជាធរមាននៅរដ្ឋជាង១០ទៅហើយ គិតមកទល់នឹងសប្តាហ៍នេះ។ សីតុណ្ហភាពបានហក់ឡើងដល់៣៨អង្សាសេកាលពីសប្តាហ៍មុន ហើយត្រូវបានគេរំពឹងថា នឹងបន្តឡើងខ្ពស់ដល់ ៤០អង្សាសេ សម្រាប់សប្តាហ៍នេះ៕
