រដ្ឋមន្ត្រីក្រសួងទេសចរណ៍ឥណ្ឌូនេស៊ី បានគូសបញ្ជាក់ថា កាលពីឆ្នាំ ២០១៩កន្លងទៅ មានភ្ញៀវទេសចរចិន ប្រមាណ ២លាននាក់ មកកម្សាន្តនៅក្នុងប្រទេសឥណ្ឌូនេស៊ី ដែលភ្ញៀវម្នាក់ៗ បានចំណាយជាមធ្យម ១.៤០០ដុល្លារអាមេរិក ក៏ប៉ុន្តែក្នុងឆ្នាំនេះ និន្នាការអវិជ្ជមាននៃវិស័យទេសចរណ៍ទូទាំងសកលលោក អាចឲ្យឥណ្ឌូនេស៊ី ខាតបង់ប្រាក់ចំណូលជាង ៤ពាន់លានដុល្លារអាមេរិក។
រដ្ឋមន្ត្រីរូបនេះ បានបន្តថា ជុំវិញភាពមិនច្បាស់លាស់នៃ ការរីករាលដាលនៃមេរោគកូរ៉ូណា បានធ្វើឲ្យការកក់កន្លែងកម្សាន្តសម្រាប់រដូវក្តៅ បានថយចុះខ្លាំងគួរឲ្យព្រួយបារម្ភ ជាពិសេស តំបន់គោលដៅទេសចរណ៍ ទីក្រុងបាលី មានការលុបចោលការកក់ អស់ជាង ១ម៉ឺនដងទៅហើយ ក្នុងខែមករា ឆ្នាំ ២០២០នេះ។
អត្ថបទទាក់ទង!
យ៉ាងណាក៏ដោយ រដ្ឋាភិបាលឥណ្ឌូនេស៊ី រំពឹងថា ផលប៉ះពាល់ពី មេរោគកូរ៉ូណា នឹងជះឥទ្ធិពលតិចតួចប៉ុណ្ណោះដល់ សេដ្ឋកិច្ចជាតិទាំងមូលបើទោះបីជា វាបានវាយលុកវិស័យទេសចរណ៍ក៏ដោយ ព្រោះវិស័យទេសចរណ៍ ជាចំណែកតូចមួយប៉ុណ្ណោះនៃ GDP របស់ឥណ្ឌូនេស៊ី តែយ៉ាងណា រដ្ឋាភិបាលឥណ្ឌូនេស៊ី នៅតែចាត់វិធានការ បន្ទាបតម្លៃធ្វើដំណើរ សម្រាប់ភ្ញៀវទេសចរអន្តរជាតិ ធ្វើដំណើរមកកាន់គោលដៅទេសចរណ៍សំខាន់ៗ និងជំរុញការធ្វើដំណើរកម្សាន្តក្នុងស្រុក ដើម្បីជួយស្រោចស្រង់ស្ថានការណ៍ឡើងវិញ។
បើតាមរបាយការណ៍ពី គណៈកម្មាធិការសុខាភិបាលចិន គិតត្រឹមព្រឹកថ្ងៃទី ១០ ខែកុម្ភៈ ឆ្នាំ២០២០នេះ ករណីមនុស្សឆ្លងមេរោគកូរ៉ូណា បានកើនដល់ជាង ៤ម៉ឺននាក់ និងសម្លាប់មនុស្សអស់ជាង ៩០០នាក់ នៅក្នុងប្រទេសចិន ក្រៅពីនោះក៏មាន ការព្យាបាលបានជាសះស្បើយ ប្រមាណ ៣ពាន់នាក់ ហើយគេក៏ពុំទាន់រកឃើញ ករណីឆ្លង កើតឡើងក្នុងប្រទេសឥណ្ឌូនេស៊ីនៅឡើយនោះទេ៕
None
