គម្រោងដែលពោរពេញទៅដោយមហិច្ឆតានេះ ត្រូវបានបង្ហាញឡើងក្រោយពី រាជរេដ្ឋាភិបាលកម្ពុជា បានផ្ដល់សិទ្ធិរួចរាល់ទៅឲ្យក្រុមហ៊ុន Naga Group Global Limited ដែលជាក្រុមហ៊ុនបុត្រសម្ព័ន្ធរបស់ NagaCorp ដោយមានកុងត្រាជួលដីទំហំ ៧៥ហិកតាក្នុងរយៈពេល ៥០ឆ្នាំ ដែលមានទីតាំងចម្ងាយ៥០០ម៉ែត្រ ខាងត្បូងនៃតំបន់ហាមឃាត់ខាងក្រៅជុំវិញប្រាសាទអង្គរវត្ត។
តាមប្រភពព័ត៌មានដដែលនេះ បានឲ្យដឹងទៀតថា តាមអ្វីដែលបានប្រកាសដោយក្រុមហ៊ុន NagaCorp គឺផែនការអភិវឌ្ឍន៍នេះ នឹងត្រូវបញ្ចប់រួចរាល់នៅត្រឹមឆ្នាំ២០២៥ ពោលគឺទំនងជាអាចរួចរាល់មុនពេលដែល Nagaworld 3 ដែលវិនិយោគអស់ប្រមាណ ៣,៥ ពាន់លានដុល្លារអាមេរិកនោះ បើកដំណើរការអាជីវកម្ម។
អត្ថបទទាក់ទង!
ក្នុងគម្រោងរបស់ NagaCorp នេះ ក៏នឹងមានបង្កើតតំបន់កម្សាន្ដមួយ ដែលមានឈ្មោះថា ទីក្រុងសៀមរាប-ចិន (Siem Reap China Town) ដែលនឹងការលក់អាហារតាមផ្លូវ ការប្រគុំតន្ត្រី ការដើរទិញទំនិញ រួមជាមួយនឹងសួនច្បារ និងទឹកផងដែរ។
លើសពីនេះ ការបង្កើឲ្យមានបឹងអច្ឆរិយ (Angkor Lake of Wonder) ដែលមាននៅក្នុងគម្រោងនេះ គឺអាចនឹងធ្វើឡើងធំជាងទំហំបូកបញ្ចូលគ្នានៃតំបន់កម្សាន្ដ Disneyland និង Disney California Adventure នៅក្នុងទីក្រុងរដ្ឋ Los Angeles សហរដ្ឋអាមេរិកទៅទៀត។
ក្រុមហ៊ុន NagaCorp បាននិយាយថា ការអភិវឌ្ឍនេះ នឹងបម្រើដល់ពហុបំណងជំរុញឲ្យមានការធ្វើដំណើរកម្សាន្ដមកកាន់ខេត្តសៀមរាប ស្របពេលដែលនឹងមានផ្ដល់ការផ្សព្វផ្សាយបន្ថែមទៀត ដោយអនុវត្តតាមយុទ្ធសាស្ត្រធ្វើដំណើរតភ្ជាប់ខេត្តសៀមរាប និងរាជធានីភ្នំពេញតាមជើងហោះហើរផ្លូវអាកាស តាមផ្លូវទន្លេ និងផ្លូវគោក។ លើសពីនេះទៀត ក្រុមហ៊ុនក៏មានបំណងធ្វើការងារជាមួយនឹងភ្នាក់ងារទេសចរណ៍តាមអនឡាញនៅប្រទេសចិន និងកន្លែងផ្សេងទៀត ដើម្បីផ្សព្វផ្សាយពីដំណើរកម្សាន្ដមកកាន់ខេត្តសៀមរាប និងរាជាធានីភ្នំពេញថែមទៀតផង។
គម្រោងបឹងអង្គរអច្ឆរិយ នឹងត្រូវរចនាឡើងដោយក្រុមហ៊ុនអាមេរិក Stealman Partners ដែលជាក្រុមហ៊ុនរចនាប្លង់របស់ Nagaworld និងក្រុមហ៊ុន Gensler។
នៅពេលដែលគម្រោងនៅខេត្តសៀមរាបនេះ អាចបង្ហាញពីលទ្ធផលជាវិជ្ជមាន ក្រុមហ៊ុន NagaCorp ក៏មានបំណងនឹងស្វែងរកឱកាសអភិវឌ្ន៍បន្ដនៅក្នុងតំបន់នៃខេត្តព្រះសីហនុផងដែរ៕
None
