កិច្ចប្រជុំពិភាក្សាអំពីប្រធានបទជាច្រើន ដោយក្នុងនោះ មានទាំងប្រធានបទទាក់ទងនឹងគូប្រជែងចិន និង រុស្សីផងដែរ។ អង្គការណាតូ គឺជាបក្សសម្ព័ន្ធយោធាមួយ ត្រូវបានបង្កើតឡើងតាមរយៈសន្ធិសញ្ញាអាត្លង់ទិកខាងជើង ដែលបានចុះហត្ថលេខានាថ្ងៃទី០៤ ខែមេសា ឆ្នាំ១៩៤៩ ដែលមានទីស្នាក់ការនៅទីក្រុងប្រ៊ូស្សែល ប្រទេសបែលហ្ស៊ិក។
នៅក្នុងជំនួបកាលពីដើមសប្តាហ៍នេះ ក្រុមមេដឹកនាំនៃសមាជិក NATO បានព្រមានក្តែងៗថាវត្តមានបច្ចុប្បន្នរបស់ប្រទេសចិនកំពុងក្លាយជា «បញ្ហាប្រឈមជាប្រព័ន្ធ»។ ការព្រមានដូច្នេះ បានបង្ហាញពីជំហរយ៉ាងម៉ឺងម៉ាត់បំផុតរបស់អង្គការ NATO មកកាន់រដ្ឋាភិបាលក្រុងប៉េកាំង និង ហាក់បីដូចជាការបន្ថែមសាំងទៅក្នុងភ្លើងជម្លោះដែលកំពុងឆេះងំ រវាងចិន និង អាមេរិកក្រោមអាណត្តិលោកចូបៃឌិន ក៏ដូចជាជម្លោះរវាងចិន និង អឹរ៉ុប រួមទាំងអូស្ត្រាលីជាដើម។
បន្ថែមពីលើនេះទៅទៀត លោក ចូ បៃឌិន ថែមទាំងបានជំរុញឲ្យក្រុមប្រទេសសមាជិកអង្គការ NATO ទាំងអស់ក្រោកឈរប្រឆាំងតទល់នឹងរបបផ្តាច់ការរបស់ប្រទេសចិន និង ការបង្កើនឥទ្ធិពលយោធារបស់មហាយក្សសេដ្ឋកិច្ចលើលោកមួយនេះ។
អត្ថបទគួរអាន
យ៉ាងណាមិញ ក្រុមមេដឹកនាំនៃសមាជិកអង្គការ NATO ជាច្រើនរូបបានលើកឡើងឆ្លើយតបមកលោក ចូ បៃឌិន វិញថា ការប្រឈមមុខនឹងប្រទេសរុស្សីនៅតែជាអាទិភាពទី១ សម្រាប់សម្ព័ន្ធមិត្ត អង្គការ NATO មិនមែនតែជាប្រទេសចិននោះទេ។ NATO ដែលត្រូវបានបង្កើតឡើងដើម្បីទប់ទល់នឹងការគំរាមកំហែងរបស់សហភាពសូវៀតនៅឆ្នាំ ១៩៤៩ ពោលគឺបន្ទាប់ពីសង្គ្រាមលោកលើកទី ២ បិទបញ្ចប់។
ជាក់ស្តែង បើតាមក្រុមអ្នកវិភាគបានលើកឡើងថា ក្រុមសម្ព័ន្ធមិត្ត NATO នឹងរិះរកវិធីពង្រឹងការការពារជារួមមួយ ជាមួយនឹងសមាជិករបស់ខ្លួន ដើម្បីឆ្លើយតបនឹងសកម្មភាពយោធាដែលកំពុងមានវត្តមានយ៉ាងសន្ធឹកសន្ធាប់ កាន់តែច្រើនឡើង របស់រុស្សីនៅប៉ុន្មានឆ្នាំចុងក្រោយនេះ ជាពិសេសនៅតាមតំបន់ព្រំដែនប្រទេស អ៊ុយក្រែន។
ជុំវិញទៅនឹងការលើកឡើងនានា នៅក្នុងកិច្ចប្រជុំរបស់សម្ព័ន្ធមិត្តអង្គការ NATO ដែលបានដាក់បន្ទុកលើប្រទេសចិនថា ជាមេបញ្ហា និង ជាការគម្រាមកំហែងនេះ ត្រូវបានស្ថានបេសសកម្មចិនប្រចាំនៅសហភាពអឺរ៉ុប បានធ្វើការឆ្លើយតបមកវិញភ្លាមៗ យ៉ាងចាស់ដៃដែរថា៖ ការលើកឡើងរបស់សម្ព័ន្ធមិត្ត NATO ខាងលើនេះ គឺជាការបង្កាច់បង្ខូចឈ្មោះ និងធ្វើឲ្យអាប់ឱនដល់កិត្យានុភាព និង ការអភិវឌ្ឍប្រកបដោយសន្តិភាពរបស់ចិន។
ស្ថានបេសសកម្មចិនប្រចាំនៅសហភាពអឺរ៉ុប បញ្ជាក់ពីជំហរយ៉ាងរឹងមាំថា ចិនតែងតែប្រកាន់ខ្ជាប់ការអភិវឌ្ឍប្រកបដោយសន្តិភាព និង មិនដែលចង់ក្លាយជាការគម្រាមកំហែងសម្រាប់នរណាម្នាក់នោះទេ។
ផ្ទុយទៅវិញ ប្រសិនបើមានភាគីណាមួយចង់ក្លាយជាបញ្ហាប្រឈម ឬ ការគម្រាមកំហែងដល់ចិន នោះចិនក៏មិននៅស្ងៀមដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
