គម្រោងទីក្រុងរណបទាំងបី របស់អ្នកឧកញ៉ាពុង ឃាវសែ
អ្នកឧកញ៉ា ពុង ឃាវសែ អាចនិយាយបានថា គឺជាវិនិយោគិនខ្មែរមួយរូបគត់ ដែលទទួលបានសិទ្ធិវិនិយោគសាងសង់ទីក្រុងរណបធំៗច្រើនជាងគេនៅតំបន់ក្បែររាជធានីភ្នំពេញ។ ជាក់ស្ដែង គិតមកទល់ពេលនេះ ទីក្រុងរណបដែលលោកបាននិងកំពុងសាងសង់មានចំនួន ៣ហើយ ដែលមានដូចខាងក្រោមនេះ ៖
១, នៅរាជធានីភ្នំពេញ កោះពេជ្រ គឺជាទីក្រុងរណបមួយ ដែលមានការពេញនិយម និងជោគជ័យខ្លាំងលើការអភិវឌ្ឍ ដោយបច្ចុប្បន្ន គម្រោងអគារខ្ពស់ៗជាច្រើន បាននិងកំពុងផុសឡើងកាន់តែច្រើនឡើងៗនៅក្នុងតំបន់នោះ។ ទីក្រុងរណបមួយនេះ គឺជាគម្រោងទីក្រុងរណបទី១ ដែលអ្នកឧកញ៉ា ពុង ឃាវសែ បានចាប់ផ្ដើមអភិវឌ្ឍ។ ទីក្រុងរណបកោះពេជ្រ ដែលបច្ចុប្បន្នកំពុងក្លាយជាមជ្ឈមណ្ឌលពាណិជ្ជកម្ម ទេសចរណ៍ ដ៏ទាក់ទាញបំផុតសម្រាប់រាជធានីភ្នំពេញ ជាទីកន្លែងបណ្តុំទៅដោយអគារពាណិជ្ជកម្មធំៗ ខ្ពស់ៗ ដូចជា អគារស្នាក់នៅរួម ខុនដូ ផ្សារទំនើប សណ្ឋាគារ ដែលភាគច្រើនវិនិយោគដោយចិន ដែលមានតម្លៃរាប់ពាន់លានដុល្លារអាមេរិក។
អត្ថបទទាក់ទង
២, ទីក្រុងរណបជ្រោយចង្វារ គឺជាគម្រោងទីក្រុងរណបធំទី២ របស់មហាសេដ្ឋកិច្ចអាត់កឺរូបនេះដោយមាន តម្លៃទុនចុះបញ្ជីទុនវិនិយោគ ១.៦០០លានដុល្លារអាមេរិក ផ្ទៃក្រឡាសាងសង់មានទំហំ ៣៨៧ហិកតាស្ថិតនៅសង្កាត់ទន្លេជ្រោយចង្វារ ខណ្ឌជ្រោយចង្វារ រាជធានីភ្នំពេញ។
បច្ចុប្បន្ន គម្រោងទីក្រុងរណបមួយនេះបានសាងសង់ប្រព័ន្ធហេដ្ឋារចនាសម្ព័ន្ធ ផ្លូវតភ្ជាប់ខ្វាត់ខ្វែង និងសាងសង់ផ្ទះល្វែងមួយចំនួន ព្រមជាមួយមានការសាងសង់នូវតំបន់កម្សាន្ដជាច្រើនផងដែរ។
តាមផែនការ ទីក្រុងរណបនេះកំពុងដំណើរការទៅមុខយ៉ាងរលូនក្នុងគម្រោងប្លង់មេ និងមានការសាងសង់អគារពាណិជ្ជកម្មធំៗ ផ្សារទំនើប លំនៅដ្ឋានប្រណីតៗ អគារស្នាក់នៅរួម និង កន្លែងកំសាន្តផ្សេងៗទៀត។ តាមការប៉ាន់ស្មាន នឹងបពា្ចប់គម្រោងសាងសង់ក្នុងឆ្នាំ២០២៦។
៣, ទីក្រុងរណបកោះនរា គឺជាគម្រោងទីក្រុងរណបទី៣ របស់អ្នកឧកញ៉ា ពុង ឃាវសែ ដែលបានចាប់ផ្ដើមសាងសង់តាំងពីខែមករាឆ្នាំ២០២០ ក្រោយពីទទួលបានការអនុញ្ញាតពីរាជរដ្ឋាភិបាលកម្ពុជា។
តាមការអះអាងរបស់អ្នកឧកញ៉ា ពុង ឃាវសែទីក្រុងរណបកោះនរាមានទំហំផ្ទៃដី ១២៥ ហិកតា ហើយបច្ចុប្បន្នក្រុមហ៊ុន OCIC បានបុកគ្រឹះបេតុង ចាក់ខ្សាច់ និងថ្ម ដើម្បីសាងសង់ច្រាំងទន្លេ និងហេដ្ឋារចនាសម្ព័ន្ធ ដោយមកទល់ពេលនេះ សម្រេចបានការសាងសង់ហេដ្ឋារចនាសម្ព័ន្ធ ប្រមាណ២៧% នៃគម្រោងសាងសង់ហេដ្ឋារចនាសម្ព័ន្ធរយៈពេល ៣ឆ្នាំ ដែលគ្រោងនឹងចំណាយថវិកាប្រមាណ ៥៥០លានដុល្លារអាមេរិក។
អ្នកឧកញ៉ា ពុង ឃាវសែ (រូបភាព៖ ហ្វេសប៊ុកសាលារាជធានីភ្នំពេញ)
គម្រោងទីក្រុងរណបកោះនរានេះ អាចអនុញ្ញាតឲ្យពលរដ្ឋបានដល់ ៥ម៉ឺននាក់រស់នៅ ដោយគ្រោងនឹងចំណាយថវិកាសរុប ២.៥០០លានដុល្លារអាមេរិក។ ដោយឡែក សម្រាប់ការចំណាយ៥៥០ លានដុល្លារ សម្រាប់ការសាងសង់ហេដ្ឋារចនាសម្ព័ន្ធរយៈពេល៣ឆ្នាំដំបូង គេរំពឹងថា នឹងចូលរួមចំណែកក្នុងផលិតផលក្នុងស្រុកសរុបប្រមាណ ២២៥លានដុល្លារ ក្នុងមួយឆ្នាំៗ ដែលស្មើនឹង០,៩% នៃ GDP នាពេលបច្ចុប្បន្ន។
គម្រោងនេះ អាចនឹងត្រូវការកម្លាំងពលកម្មប្រមាណ ៧០០នាក់ និងអាចកើនដល់៧ពាន់នាក់ នៅពេលមានសកម្មភាពសាងសង់ពេញទំហឹង។ នៅពេលបញ្ចប់ការសាងសង់ទីក្រុងរណបកោះនរានេះ នឹងអាចបង្កើតការងារបានដល់ជាង ១ម៉ឺនកន្លែង។
អាណាចក្រជំនួញ និងការវិនិយោកផ្សេងទៀតរបស់អ្នកឧកញ៉ាពុង ឃាវសែ
ក្រៅពីការវិនិយោគសាងសង់នូវគម្រោងទីក្រុងរណបធំៗទាំងបីកន្លែងនេះ អ្នកកឧកញ៉ា ពុង ឃាវសែ ក៏ស្នាដៃដ៏លេចធ្លោមួយទៀត គឺការអភិវឌ្ឍគម្រោងអាកាសយានដ្ឋានអន្តរជាតិភ្នំពេញថ្មី ដែលស្ថិតនៅក្នុងខេត្តកណ្ដាល ដែលមានចម្ងាយប្រហែល២០គីឡូម៉ែត្រ ពីរាជធានីភ្នំពេញ និងមានផ្ទៃដីសរុប២.៦០០ ហិកតា។ តាមផែនការ នៅក្នុងដំណាក់កាលទី១ គម្រោងនេះ នឹងចំណាយថវិកាសាងសង់ប្រមាណ ១.៥០០ លានដុល្លារ (មិនគិតពីតម្លៃដី) និងអាចទទួលបានភ្ញៀវធ្វើដំណើរ ១៣ លាននាក់ក្នុងមួយឆ្នាំ។
បើនិយាយពីមុខជំនួញដំបូង នៅកម្ពុជា ធនាគារកាណាឌីយ៉ា គឺជាមុខជំនួញដំបូងគេរបស់អ្នកឧកញ៉ា ពុង ឃាវសែ ក្រោយពីលោក វិលត្រឡប់ពីប្រទេសកាណាដា មករស់នៅក្នុងទឹកដីកំណើត។ បច្ចុប្បន្នធនាគារ កាណាឌីយ៉ា មានរហូតដល់ទៅ ជាង ៦០ សាខាទូទាំងប្រទេស និង មានសាខា នៅប្រទេសឡាវផងដែរ ជាមួយនឹងទ្រព្យសកម្មរបស់ធនាគារប្រមាណ៦,៥ពាន់លានដុល្លារ និងមានបុគ្គលិកបម្រើការដល់ទៅជាង៣ពាន់នាក់។
ក្រៅពីនេះ លោកក៏មានធនាគារ ប្រៃសណីយ៍កម្ពុជា ក្រុមហ៊ុនធានារ៉ាប់រងអាយុជីវិត សុវណ្ណភូមិ និងក្រុមហ៊ុនធានារ៉ាប់រងទូទៅ Cambodia-Vietnam Insurance Plc. ជាបន្តបន្ទាប់។ លោកបានវិនិយោគទៅលើសួនឧស្សាហកម្មកាណាឌីយ៉ា ដែលមានរោងចក្រកាត់ដេរសម្លៀកបំពាក់ប្រមាណជិត ៥០រោងចក្រ បូករួមជាមួយនឹងផ្សារ ឃ្លាំងស្តុកទំនិញ ជាច្រើនទៀត។
លើសពីនេះទៀត ក្រុមហ៊ុនរបស់អ្នកកឧកញ៉ាក៏បានវិនិយោគសាង់សង់បុរីលំនៅដ្ឋាន និងផ្សារទំនើបជាច្រើនកន្លែងផងដែរ។
បច្ចុប្បន្ន អ្នកឧកញ៉ា ពុង ឃាវសែ មានតួនាទីសំខាន់ៗជាច្រើន ដូចជា ប្រធានក្រុមប្រឹក្សាភិបាល ធនាគារ កាណាឌីយ៉ា, ជាអគ្គនាយកក្រុមហ៊ុនវិនិយោគទុនអាណិកជនកម្ពុជា (OCIC), ប្រធានសមាគមអ្នកសាងសង់កម្ពុជា, ប្រធានសមាគម ខែ្មរ-ចិន និងតួនាទីជាច្រើនទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
