លោកស្រី អាំ ផៃ ប្រធានសភាពាណិជ្ជកម្មប្រចាំខេត្តសមុទ្រសាខន បានគូសបញ្ជាក់ថា ការបិទទ្វារខេត្តជាបណ្តោះអាសន្ន នឹងប៉ះពាល់ដល់ វិស័យនាំចេញគ្រឿងសមុទ្ររបស់ថៃ ដែលមានការទិញលក់ប្រមាណ ១៥លានដុល្លារអាមេរិក ជារៀងរាល់ថ្ងៃ ហើយបច្ចុប្បន្នអាជីវកម្មផ្សេងៗទៀត ក៏ត្រូវបង្ខំចិត្តបិទទ្វារជាបណ្តោះអាសន្នដែរ ដែលធ្វើឲ្យមានការប៉ះពាល់ដល់សេដ្ឋកិច្ចជាតិប្រមាណ ៣៣លានដុល្លារអាមេរិកក្នុងមួយថ្ងៃ។
លោកស្រី បន្តថា ទោះយ៉ាងណាក៏ដោយ ផលប៉ះពាល់ធ្ងន់ធ្ងរ គឺជះឥទ្ធិពលខ្លាំងទៅដល់ អាជីវកម្ម ដែលជួលកម្លាំងពលកម្មមកពីក្រៅប្រទេសប៉ុណ្ណោះ ខណៈអាជីវកម្ម ដែលប្រើប្រាស់កម្លាំងពលកម្មក្នុងស្រុក អាចនឹងរងគ្រោះបន្តិចបន្តួច។
អត្ថបទទាក់ទង!
ចំពោះអាជីវកម្មក្នុងស្រុក ក៏បានយល់ព្រមអនុវត្តតាមវិធានការគ្រប់គ្រងជម្ងឺរាតត្បាត និងត្រួតពិនិត្យទៅលើកម្មករមកពីក្រៅប្រទេស ដើម្បីចៀសវាងការឆ្លងទៅកាន់តំបន់ផ្សេងទៀត ហើយចំពោះ សភាពាណិជ្ជកម្មខេត្តសមុទ្រសាខន នឹងដាក់សំណើទៅកាន់ សភាពាណិជ្ជកម្មថៃ ដើម្បីសម្រួលបន្ទុកដល់ ម្ចាស់អាជីវកម្ម ដែលស្ថិតនៅតំបន់ផ្សេង ខុសពីតំបន់ឆ្លងមេរោគ អនុញ្ញាតឲ្យបន្តដំណើរការអាជីវកម្មឡើងវិញ។
គួរជម្រាបដែរថា ធនាគារពាណិជ្ជកម្ម និងធនាគាររបស់រដ្ឋ ក៏បានប្រកាសពី ការផ្អាកដំណើរការជាបណ្តោះអាសន្ន រហូតដល់ថ្ងៃទី ៣ ខែមករា ឆ្នាំ ២០២១ខាងមុខ ហើយក៏មានការបិទសាលារៀន នៅក្នុងខេត្តនេះដែរ ដោយត្រលប់ទៅរក ការសិក្សាតាមរយៈប្រព័ន្ធអនឡាញវិញ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
