ខេមបូណូមីស សូមលើកយកនូវគំនិតវិនិយោគគន្លឹះមួយចំនួន របស់មហាសេដ្ឋីអចលនទ្រព្យដ៏ល្បីល្បាញ ហើយក៏ជាកំពូលអ្នកវិនិយោគ និងអភិវឌ្ឍន៍អចលនទ្រព្យដ៏ឆ្នើមមួយរូបនៅកម្ពុជាផងដែរ នោះគឺអ្នកឧកញ៉ា សៀ ឫទ្ធី ប្រធានក្រុមប្រឹក្សាភិបាល និងជាអគ្គនាយកក្រុមហ៊ុន WorldBridge Group។
នៅក្នុងបទសម្ភាសន៍ផ្ដាច់មុខជាមួយនឹងខេមបូណូមីសកាលពីពេលកន្លងទៅថ្មីៗនេះ អ្នកឧកញ៉ា សៀ ឫទ្ធី បានលើកឡើងថា ប្រជាពលរដ្ឋមួយចំនួនតែងមានមានបញ្ហាលំហូរសាច់ប្រាក់បន្ទាប់ពីបង់រំលោះផ្ទះល្វែង និងដីឡូតិ៍ ជាដើម។ នេះក៏ដោយសារតែការទិញរបស់ពួកគាត់មិនបានគិតគូរឲ្យបានច្បាស់លាស់។
អត្ថបទទាក់ទង!
មហាសេដ្ឋីអចលនទ្រព្យរូបនេះ បានក្រើនរំឭកទៀតថា បើទិញផ្ទះ ឬទិញដីទុកជួល ឬ យកប្រកបអាជីវកម្ម នោះគឺជាភាពឆ្លាតវៃក្នុងការវិនិយោគ ក៏ប៉ុន្ដែ បើទិញទុកដើម្បីរង់ចាំចំណេញ ហើយថែមទាំងខ្ចីបំណុលធនាគារដើម្បីទិញទៀតនោះ វាគឺជារឿងមួយដែលប្រថុយប្រថានខ្ពស់ណាស់ ដែលត្រូវគិតគូរឲ្យបានល្អិតល្អន់មែនទែនមុននឹងសម្រេចចិត្ត ព្រោះវាអាចធ្វើឲ្យមានការខាតបង់ ឬជួបញ្ហាលំហូរសាច់ប្រាក់ទៅថ្ងៃមុខ។
បើតាមអ្នកឧកញ៉ា សៀ ឫទ្ធី ការទិញអចលនទ្រព្យនឹងមិនងាយជួបបញ្ហាខាតបង់នោះទេ បើសិនជាអ្នកទិញចេះពិចារណាឲ្យបានម៉ត់ចត់លើចំណុចគន្លឹះបីយ៉ាង មុននឹងសម្រេចចិត្តទិញ។ ចំណុចសំខាន់៣យ៉ាងនោះ រួមមាន៖
១, ស្គាល់ពីលទ្ធភាពផ្ទាល់ខ្លួនឯងឲ្យច្បាស់
លោកឧកញ៉ា សៀ ឫទ្ធី បានផ្តល់អនុសាសន៍ឱ្យអ្នកមានចំណូលមធ្យមទាំងអស់ ដែលចង់បង់រំលោះអចលទ្រព្យ ឱ្យពិនិត្យហើយពិនិត្យទៀតថា ខ្លួនមានលទ្ធភាពបង់ប្រាក់នោះយូរប៉ុណ្ណោះ។
ខ្លួនមានប្រាក់ចំណូលប៉ុន្មាន? បង់ប៉ុន្មាន? ចុះបើសិនជាមានហានិភ័យកើតឡើង ដូចជា បាត់បង់ការងារ ឬធ្លាក់ខ្លួនឈឺ តើខ្លួនមានលទ្ធភាពបង់ប្រាក់ទៀតឬអត់? តើអចលនទ្រព្យនោះអាចលក់បង្វិលជាសាច់ប្រាក់បានវិញ ឬទេ?
បើបាន! បើគិតឃើញច្បាស់លាស់ហើយ អ្នកគួរសម្រេចចិត្តទិញចុះ តែគិតចុះឡើងនៅមិនច្បាស់ទេ គួរណាស់ព្យាយាមសន្សំប្រាក់ រកស៊ីរកចំណូលឲ្យបានគួរសមសិន អាចមានលទ្ធភាពនឹងនសិន ក៏មិនយឺតពេលនោះដែរ។
ម្យ៉ាងទៀត ពលរដ្ឋគួរចងចាំថា បើទិញដីឬផ្ទះអាចជួលបានលុយ គឺល្អជាងផ្ទះឬដីឡូតិ៍ ដែលទិញមកហើយទុកចោលចាំលក់យកចំណេញ។
២, ស្គាល់ម្ចាស់គម្រោងច្បាស់លាស់
ស្គាល់ម្ចាស់គម្រោង បានន័យថា យើងដឹងច្បាស់ថា គម្រោងនោះមានដី មានផ្ទះពិតប្រាកដ សង់លើដីស្របច្បាប់ ផ្ទះឬដីទាំងនោះគ្មានជាប់ជំពាក់នឹងជម្លោះក្តីក្ដាំ នៅតុលាការ ។ល។
កេរ្តិ៍ឈ្មោះម្ចាស់គម្រោងអចលនទ្រព្យជាប្រការសំខាន់បំផុត ដែលអ្នកទិញគួរចងចាំ និងដឹងឱ្យបានច្បាស់។ បើដឹងច្បាស់ថា ម្ចាស់គម្រោងធ្លាប់រកស៊ីលក់ដីខ្យល់ឱ្យគេ ធ្លាប់បោកប្រាស់គេនោះ យើងជាអ្នកទិញមិនស្គាល់ច្បាស់ សូមកុំប្រថុយទិញអី!។
៣, ព័ត៌មានទីផ្សារអចលទ្រព្យ
លោកឧកញ៉ា សៀ ឫទ្ធី បានឱ្យតម្លៃខ្ពស់បំផុតចំពោះព័ត៌មាន។ លោកថា បើយើងដឹងព័ត៌មានច្រើន មានចំណេះដឹងច្រើន គឺងាយស្រួល មិនឆាប់ចាញ់បោកគេទេ។
លោកលើកទឹកចិត្តឱ្យប្រជាពលរដ្ឋចេះតាមដានព័ត៌មាន ចេះអានសៀវភៅ មើលទូរទស្សន៍ ឬស្តាប់វិទ្យុ ដើម្បីទទួលបានព័ត៌មានថ្មីៗសម្រាប់គិតពិចារណា។ ជាធម្មតា សារព័ត៌មានទាំងអស់ តិច ឬច្រើន គេផ្សាយពីគម្រោងវិនិយោគនានារបស់រាជរដ្ឋាភិបាល រាប់តាំងពីគោលនយោបាយអភិវឌ្ឍន៍ ជាដើម។
លោកមានសុទិដ្ឋិនិយមថា អ្នកតាមដានព័ត៌មានជាប្រចាំ នឹងងាយចំណេញលើការវិនិយោគអចលនទ្រព្យ ជាងអ្នករកស៊ីជោរតាមគេតាមឯង៕
None
