ដើម្បីលើកកម្ពស់ប្រាក់រៀលក្នុងសេដ្ឋកិច្ច ថ្នាក់ដឹកនាំធនាគារជាតិនៃកម្ពុជាជំរុញឲ្យ ក្រសួងស្ថាប័ននានាទាំងរដ្ឋ និងឯកជនបង្កើនការធ្វើប្រតិបត្តិការជាប្រាក់រៀលជាអតិបរមា។ ព្រោះក្នុងកាលៈទេសៈ ដែលកម្ពុជាស្ថិតក្នុងស្ថានភាពមិនច្បាស់លាស់នៃការឆ្លងរាតត្បាតនៃជំងឺកូវីដ-១៩ និងរងឥទ្ធិពលពីវិបត្តិសង្គ្រាមនៅអ៊ុយក្រែនការប្រើប្រាស់រៀល ជាការរួមចំណែកដ៏សំខាន់ក្នុងការជួយស្តារ និងពង្រឹងភាពធន់នៃសេដ្ឋកិច្ច។
នាទិវាប្រាក់រៀលអបអរខួបលើកទី៤២ នៃការដាក់ឲ្យប្រើប្រាស់ប្រាក់រៀលឡើងវិញកាលពីព្រឹកថ្ងៃទី២០ មីនា នៅផ្សារទំនើប ជីប ម៉ុង សែនសុខ ឯកឧត្តម ស៊ុំ សន្និសិទ្ធ ទេសាភិបាលរងធនាគារជាតិនៃកម្ពុជាបានគូសបញ្ជាក់ថា នៅក្នុងរយៈពេល៤២ឆ្នាំកន្លងមកនេះ ប្រាក់រៀលបានរួមចំណែកយ៉ាងសំខាន់ក្នុងការជួយស្តារ និងកសាងអធិបតេយ្យភាព និងទ្រទ្រង់សេដ្ឋកិច្ច និងសង្គមជាតិ។ ឯកឧត្តមអះអាងថា ក្រោមគោលនយោបាយលើកកម្ពស់ប្រាក់រៀលរបស់ ធនាគារជាតិ ទំហំចរាចរណ៍ប្រាក់រៀលបានកើនឡើងជាលំដាប់ ហើយតម្លៃប្រាក់រៀលក៏មានស្ថិរភាពល្អប្រសើរផងដែរ។
ទោះបីយ៉ាងនេះក្តី ឯកឧត្តម ស៊ុំ សន្និសិទ្ធ សង្កេតឃើញថា ទម្លាប់នៃការប្រើប្រាស់ប្រាក់ដុល្លារក្នុងប្រតិបត្តិការទូទាត់ និងវិនិយោគ ក៏បាននិងកំពុងចាក់ឬសជ្រៅទៅក្នុងសេដ្ឋកិច្ច និងសង្គម ជាពិសេសផ្នត់គំនិតរបស់ប្រជាជនកម្ពុជាផងដែរ។ កត្តានេះ បន្តទាមទារឲ្យមានការចួលរួមពីគ្រប់ភាគីពាក់ព័ន្ធបន្ថែមទៀតក្នុងការជួយជំរុញការប្រើប្រាស់ប្រាក់រៀលក្នុងប្រតិបត្តិការនានានៅកម្ពុជា។ លើសពីនេះ ឯកឧត្តម ជំរុញឲ្យក្រសួង ស្ថាប័ន គ្រឹះស្ថានហិរញ្ញវត្ថុទាំងរដ្ឋ និងឯកជនបង្កើនការប្រើប្រាស់ប្រាក់រៀលក្នុងប្រតិបត្តិការរបស់ខ្លួន។
អត្ថបទគួរអាន
ពាក់ព័ន្ធការប្រើប្រាស់ប្រាក់រៀលនេះដែរ លោកជំទាវ ជា សិរី ឧបការីទេសាភិបាល និងជាអគ្គនាយិកាបច្ចេកទេសធនាគារជាតិ នៃកម្ពុជាបានគូសបញ្ជាក់ថា ទោះបីនិន្នាការប្រើប្រាស់ប្រាក់រៀលនៅកម្ពុជាបច្ចុប្បន្នមានការកើនឡើងក៏ដោយ តែនៅមានចំណែកតិចតួចនៅឡើយបើធៀបនឹងការប្រើប្រាស់រូបបិយបណ្ណបរទេស។ ពោលគឺការប្រើប្រាស់ប្រាក់រៀល ក្នុងប្រតិបត្តិការទូទាត់នានាទូទាំងប្រទេសបានក្តោបចំណែកទីផ្សារប្រមាណ១៥% តែប៉ុណ្ណោះ ខណៈចំណែកទីផ្សារជាង៨០% ត្រូវបានក្តោមក្តាប់ដោយប្រាក់ដុល្លារ។ លោកជំទាវបានគូសបញ្ជាក់បន្ថែមថា ប្រាក់រៀលត្រូវបានប្រើប្រាស់ភាគច្រើនតែនៅតាមទីជនបទនោះទេ ខណៈទីក្រុង និងទីប្រជុំជននានាការធ្វើប្រតិបត្តិការភាគច្រើនជាប្រាក់ដុល្លារ។
ជាមួយគ្នានេះលោក ផល វ៉ាន់ឌី ប្រធានសមាគមមីក្រូហិរញ្ញវត្ថុកម្ពុជាកត់សម្គាល់ឃើញថា ក្នុងរយៈពេលជាង៤០ឆ្នាំមកនេះ ប្រាក់រៀលបានដើរតួនាទីជាឆ្អឹងខ្នងយ៉ាងសំខាន់ក្នុងការជួយទ្រទ្រង់ប្រតិបត្តិការរបស់វិស័យមីក្រូហិរញ្ញវត្ថុ ក៏ដូចជាចូលរួមចំណែកជួយអភិវឌ្ឍន៍និងជំរុញកំណើនសេដ្ឋកិច្ចកម្ពុជា។ ប្រធានសមាគមមីក្រូហិរញ្ញវត្ថុរូបនេះបានគូសបញ្ជាក់បន្ថែមថា ក្នុងទំហំឥណទានសរុបដែលផ្តល់ជូនដោយគ្រឹះស្ថានមីក្រូហិរញ្ញវត្ថុ ប្រាក់រៀលបានក្តោបចំណែកទីផ្សារចំនួន២០% ហើយ លោក រំពឹងថា ទំហំឥណទានជាប្រាក់រៀលនឹងបន្តកើនឡើងជាបន្តបន្ទាប់នៅឆ្នាំក្រោយៗទៀត។
ឯកឧត្តម ស៊ុំ សន្និសិទ្ធ លើកទឹកចិត្តឲ្យប្រជាជនកម្ពុជាងាកមកប្រើប្រាស់ប្រាក់រៀលជំនួសឲ្យរូបិយបណ្ណបរទេសសម្រាប់ការធ្វើប្រតិបត្តិការទូទាត់នានា ដ្បិតការប្រើប្រាស់ប្រាក់រៀលប្រៀបដូចជាការរួមចំណែកដោយផ្ទាល់និងប្រយោលដល់កិច្ចការពារនិងពង្រឹងអធិបតេយ្យសេដ្ឋកិច្ចជាតិ អត្តសញ្ញាណជាតិ និងការរីកចម្រើនសេដ្ឋកិច្ច និងសង្គម។ កន្លងមកសម្តេចតេជោ ហ៊ុន សែន បានចាត់ទុករូបិយវត្ថុជាតិ គឺជាផ្នែកមួយនៃការកសាងអធិបតេយ្យ និងអំណាចខាងសេដ្ឋកិច្ចរបស់រដ្ឋ៕
None
