តាមសារព័ត៌មាន Vietnam News ដែលបានស្រង់របាយការណ៍ចុះផ្សាយបានឲ្យដឹងថា បន្ទាប់ពី កិច្ចព្រមព្រៀងពាណិជ្ជកម្មសេរី អឺរ៉ុប-វៀតណាម (EVFTA) ចូលជាធរមាន ពន្ធគយប្រភេទ Most Favoured Nation (MFN) នឹងត្រូវចូលមកប្ដូរជំនួសឲ្យប្រព័ន្ធអនុគ្រោះពន្ធទូទៅ GSP ដោយស្វ័យប្រវត្តិតែម្ដង ដោយប្រព័ន្ធអនុគ្រោះពន្ធ GSP នេះ គឺសហភាពអឺរ៉ុប បានផ្ដល់ជូនសម្រាប់ប្រទេសកំពុងអភិវឌ្ឍ និងប្រទេសពុំទាន់អភិវឌ្ឍន។ ក្នុងន័យនេះ គឺនៅក្នុង២ទៅ៣ឆ្នាំដំបូង នៃការអនុវត្តEVFTA នឹងមានផលិតផលសម្លៀកបំពាក់ និង ស្បែកជើងក្នុងស្រុក របស់វៀតណាមភាគច្រើន នឹងមិនអាចទទួលបានប្រយោជន៍ភ្លាមៗ ពី EVFTA នោះទេ ព្រោះប្រភេទអត្រាពន្ធគយ MFN ដែលមានលើផលិតផលទាំងនោះ គឺមានមានខ្ពស់ជាងអត្រាប្រព័ន្ធអនុគ្រោះពន្ធទូទៅ GSP ប្រមាណ ៩ ភាគរយ សម្រាប់ផលិតផលស្បែកជើង និង៣-៤ ភាគរយ សម្រាប់ផលិតផលស្បែកជើងនាពេលបច្ចុប្បន្ន។
អត្ថបទទាក់ទង!
ជាពិសេសនោះ គឺផលិតផលសម្លៀកបំពាក់ភាគច្រើន ដែលវៀតណាម បាននិងកំពុងនាំចេញទៅអឺរ៉ុប នឹងត្រូវលុបបំបាត់ពន្ធគយបន្ដិចម្ដងៗពោលគឺ នឹងលុបពីការយកពន្ធគយប្រភេទ MFN ដែលមាន ១២ភាគរយ រហូតដល់ដល់លុបចោលនៅសល់ ០ភាគរយ ក្នុងរយៈពេល ៣ ទៅ៧ឆ្នាំ បន្ទាប់ពី EVFTA ចូលជាធរមាន។ ដូចគ្នានេះដែរ ផលិតផលស្បែកជើងវៀតណាមវិញ ក៏នឹងត្រូវលើកលែងពន្ធពីប្រភេទពន្ធគយ MFN ដែលមាន ១២,៤% ទៅ ០ភាគរយ ដោយប្រើរយៈពេល ៣ ទៅ៧ឆ្នាំ ដូចគ្នាដែរ។
ប្រភពព័ត៌មាន បានបញ្ជាក់ថា ផលិតផល ដែលនឹងត្រូវទទួលបានប្រយោជន៍កាត់ចេញនូវពន្ធគយក្នុងដំណាក់កាលបឋមនៃការអនុវត្ត EVFTA នេះ គឺមិនមែនជាផលិតផលសំខាន់ៗរបស់វៀតណាមនាំចេញទៅសហភាពអឺរ៉ុបនោះទេ ប៉ុន្ដែ វាគ្រាន់តែផលិតផល សរសៃអំបោះសម្រាប់ការផលិតសម្លៀកបំពាក់ និងវត្ថុធាតុដើមផ្សេងទៀត សម្រាប់ការផលិតស្បែកជើងតែប៉ុណ្ណោះ។
ចំពោះ វិស័យផលិតស្បែកជើង សហភាពអឺរ៉ុបសន្យានឹងលុបបំបាត់ ៣៧ភាគរយ នៃបន្ទាត់ពន្ធគយ សម្រាប់ក្រុមហ៊ុននាំចេញស្បែកជើង ទៅអឺរ៉ុប ក្រោយពី FTA ចូលជាធរមាន រួមបញ្ចូលមានផលិតផលដូចជា ស្បែកជើងកៅស៊ូ-ផ្លាស្ទិក ការពារទឹក ស្បែកជើងប្រភេទ Slipper និងវត្ថុធាតុដើមផ្សេងទៀត។
មានប្រទេសភាគច្រើន ដែលនាំចេញផលិតផលវាយនភ័ណ្ឌ និងសម្លៀកបំពាក់ទៅអឺរ៉ុប ដោយមិនមាន FTA ជាមួយអឹរ៉ុប ដូច្នេះ ប្រសិនរោងចក្រវៀតណាម អាចផលិតស្របតាមការតម្រូវការប្រភពដើម នោះ កិច្ចព្រមព្រៀងពាណិជ្ជកម្មសេរី អឺរ៉ុបវៀតណាម (EVFTA) នឹងបើកចំហរឱកាសយ៉ាងវិសេសវិសាល សម្រាប់វិស័យនាំចេញសម្លៀកបំពាក់ និងស្បែកជើង វៀតណាម។
លោក Vu Duc Giang ប្រធានក្រុមប្រឹក្សាភិបាល សមាគមវាយនភ័ណ្ឌ និងសម្លៀកបំពាក់វៀតណាម បានឲ្យដឹងនៅក្នុងសារព័ត៌មាន Vietnam News ថា ប្រទេសវៀតណាម បានចុះហត្ថលេខាលើកិច្ចព្រមព្រៀងពាណិជ្ជកម្មសេរី ចំនួន ១៦ ជាមួយប្រទេស និងតំបន់ជាច្រើន។ ក្នុងនោះ មាន កិច្ចព្រមព្រៀង ចំនួន ១២ បានចូលជាធរមាន និងបានជំរុញដល់ចំណូលនៃការនាំចេញ នាំចូល នៃវិស័យវាយនភ័ណ្ឌ និងសម្លៀកបំពាក់វៀតណាម។
យ៉ាងណាមិញ តាមរយៈ EVFTA ឧស្សាហកម្មវាយនភ័ណ្ឌ សម្លៀកបំពាក់ និងស្បែកជើងវៀតណាម នឹងទទួលបានប្រយោជន៍ជាមួយនឹងចំណូលនាំចេញកើនឡើងដល់ប្រមាណ ១៥,២៣ ពាន់លានដុល្លារអាមេរិក នៅឆ្នាំ២០៣៥។
អត្ថបទគួរឲ្យចាប់អារម្មណ៍!
ប្រធានក្រុមប្រឹក្សាភិបាល សមាគមវាយនភ័ណ្ឌ និងសម្លៀកបំពាក់វៀតណាម បានគូសបញ្ជាក់ថា EVFTA រំពឹងថា សក្ដានុពលការនាំចេញផលិតផលសម្លៀកបំពាក់វៀតណាម នឹងមានដល់ ១០០ ពាន់លានដុល្លារ ក្នុងមួយឆ្នាំ។
សមាគមនេះ ជឿជាក់ទៀតថា គោលដៅ នាំចេញ ៤០ពាន់លានដុល្លារ នៃផលិតផលវាយនភ័ណ្ឌ និងសម្លៀកបំពាក់ របស់វៀតណាម នៅឆ្នាំ២០១៩នេះ គឺពិតជាអាចសម្រេចទៅបាន ដោយសារតែមានការជំរុញមួយផ្នែកដោយ កិច្ចព្រមព្រៀងពាណិជ្ជកម្មសេរី រួមទាំង កិច្ចព្រមព្រៀងដែលកំពុងធ្វើជាមួយនឹងអឺរ៉ុបផងដែរ ខណៈដែលអឺរ៉ុប គឺជាទីផ្សារធំទី២ របស់វៀតណាម សម្រាប់ការនាំចេញផលិតផលទាំងនេះ៕
None
