ធនាគារអេស៊ីលីដា បច្ចុប្បន្នកំពុងជាធនាគារឈានមុខគេមួយ ក្នុងការប្រើប្រាស់ប្រព័ន្ធបច្ចេកវិទ្យាហិរញ្ញវត្ថុ តួយ៉ាង ថ្មីៗនេះ ធនាគារអេស៊ីលីដា បានចាប់ដៃគ្នាជាមួយនឹងក្រុមហ៊ុនជប៉ុន JCB International ដែលជាក្រុមហ៊ុនលំដាប់ពិភពលោក ខាងផ្នែកសេវាកម្មទូទាត់មាន គុណភាពខ្ពស់លំដាប់អន្តរជាតិ និងមានទីតាំងនៅក្នុងប្រទេសជប៉ុន ធ្វើជាដៃគូយុទ្ធសាស្រ្តក្នុងការធ្វើសហប្រតិបត្តិការបម្រើសេវាកម្មទូទាត់ជូនអតិថិជនទាំងក្នុង និងក្រៅប្រទេស។
នៅក្នងពិធីដាក់ឲ្យដំណើរការបណ្ណឥណពន្ធ JCB អេស៊ីលីដា លោកបណ្ឌិត អ៊ិន ចាន់នី ប្រធាននាយកប្រតិបត្តិ ធនាគារអេស៊ីលីដា ភីអិលស៊ីបានមានប្រសាសន៍ថា ក្នុងនាមជាធនាគារឈានមុខគេមួយនៅក្នុងប្រទេសកម្ពុជា អេស៊ីលីដា ពិតជាមានមោទនភាព ដោយបានសហការជាមួយស្ថាប័នលំដាប់ថ្នាក់ពិភពលោកដូច JCB នេះ។ លោកបន្តថា ការសហការគ្នានៅពេលនេះ គឺវាស្របទៅនឹងយុទ្ធសាស្រ្តរបស់ធនាគារអេស៊ីលីដា ដែលមានការគោលការណ៍ពង្រីកបណ្តាញតាមរយៈប្រព័ន្ធ API (Access Public Interface)គឺមានន័យថា លែងមានការពង្រីកប្រតិបត្តិការតាមរយៈការិយាល័យទៀតហើយ។
អត្ថបទទាក់ទង!
លោកបណ្ឌិតបានបន្ថែមថា ចំនុចសំខាន់នៃកិច្ចព្រមព្រៀងនេះ គឺសមាជិកអេធីអឹមរបស់ធនាគារ អេស៊ីលីដា អាចទទួលបានប័ណ្ណសហនិមិត្តសញ្ញារវាង ធនាគារ JCB និង អេស៊ីលីដា ដោយអាចប្រតិបត្តិការបានយ៉ាងសម្បូរបែប ទាំងក្នុង និងក្រៅប្រទេស ដែលនេះស្រដៀងទៅនឹង Master Card និង Visa Card ដែរ គ្រាន់តែថា លក្ខណៈពិសេសរបស់បណ្ណឥណពន្ធ JCB អេស៊ីលីដានេះ អាចទូទាត់ជាប្រាក់រៀលបាន។
លោក គីមីហ៊ីសា អ៊ីម៉ាដា អគ្គនាយក និងជាប្រធាននាយកប្រតិបត្តិរបស់ក្រុមហ៊ុន JCB International Co., Ltd បានប្រាប់ឲ្យដឹងដែរថា ការឈានមកដល់ការកិច្ចសហការនេះ គឺដោយសារក្រុមហ៊ុន JBC សង្កេត មើលឃើញពី កេរ្តិ៍ឈ្មោះ ភាពរឹងមាំ និងសក្តានុពលរបស់ធនាគារអេស៊ីលីដា ក្នុងការពង្រីកពាណិជ្ជកម្មក្នុងប្រទេសកម្ពុជា ។ លោកបន្តថា ការសហការគ្នានាពេលនេះ នឹងបម្រើដល់សាធារណជននូវសេវាបណ្ណឥណពន្ធដល់អតិថិជនទាំងពីរ ស្ថាប័នទាំង២បានទូលំទូលាយ ខណៈដែល JCB International មានជាង ៣០លានទីតាំង និង ១លានកន្លែង ក្នុងការប្រតិបត្តិការទូទាត់ និងដកប្រាក់បុរេប្រទានទូទាំងពិភពលោក។
សូមជម្រាបថា រយៈពេល៥ឆ្នាំហើយ ដែលក្រុមហ៊ុន JCB International Co., Ltd និងធនាគារអេស៊ីលីដា បានសិក្សាពីគ្នាទៅវិញទៅមក មុននឹងឈានដល់ការសហការនេះ ។ ហើយសព្វថ្ងៃនេះ បណ្ណឥណពន្ធ JCB អេស៊ីលីដា មានការចែកចាយ និងប្រើប្រាស់ប្រមាណ ២ម៉ឺនកាត។ លោកបណ្ឌិត អ៊ិន ចាន់នី បញ្ជាក់ថា កាតនេះ ហាក់មានប្រជាប្រិយភាពជាងកាតដទៃទៀតដែល ធនាគារធ្លាប់ដាក់ឲ្យដំណើរការ៕
None
