តាមតួលេខពីអាជ្ញាធរចិនដដែលនេះ បានឲ្យដឹងទៀតថា ចិនអាចមានសមត្ថភាពចាក់វ៉ាក់សាំងដល់ពលរដ្ឋខ្លួន២០លានដូសក្នុងមួយថ្ងៃ ខណៈដែលតាមការព្យាករពីអ្នកជំនាញ គិតត្រឹមចុងឆ្នាំ២០២១ ការផលិតវ៉ាក់សាំងនៅប្រទេសចិននឹងកើនឡើងដល់៣ពាន់លានដូស។
ប្រទេសចិន មានបំណងចាក់វ៉ាក់សាំងឲ្យបានដល់៤០% នៃចំនួនប្រជាជនសរុបប្រមាណ១ពាន់៤រយលានដុល្លារ នៅត្រឹមចុងខែកក្កដាខាងមុខនេះ។
បន្ទាប់ពីប្រទេសចិន គេសង្កេតឃើញថា អាមេរិកក៏កំពុងសម្រុកចាក់វ៉ាក់សាំងខ្លាំងណាស់ដែរ តាមទិន្នន័យពីសារព័ត៌មាន Bloomberg បានបង្ហាញថា នៅអាមេរិកមានការចាក់វ៉ាក់សាំងសរុបបានជិត៣០០លានដូសហើយ ខណៈដែលអឺរ៉ុបមានជាង ២២០លានដូស និងឥណ្ឌាវិញ មានប្រមាណជិត២០០លានដូស។
សម្រាប់អាមេរិក សន្ទុះនៃការចាក់វ៉ាក់សាំងនាពេលបច្ចុប្បន្ន គឺ១ថ្ងៃចាក់បានជិត២លានដូស ដូច្នេះ អាមេរិកត្រូវការពេលចាក់វ៉ាក់សាំង៣ខែទៀត ទើបអាចបាន៧៥% នៃចំនួនប្រជាជនសរុបរបស់ខ្លួន។
អត្ថបទទាក់ទង!
តាមទិន្នន័យពីសារព័ត៌មាន Bloomberg ដដែលបានឲ្យដឹងទៀតថា គិតមកទល់ថ្ងៃទី ២៤ ខែឧសភា មានមនុស្សប្រមាណ ជិត១១% នៃចំនួនប្រជាជនសរុបនៅទូទាំងពិភពលោកបានទទួលការចាក់វ៉ាក់សាំងកូវីដ-១៩គ្រប់ចំនួនដូស ហើយប្រទេស និងតំបន់ដែលមានចំណូលខ្ពស់បំផុត កំពុងមានការចាក់វ៉ាក់សាំងច្រើនជាង ពោលគឺមានលើស៣០ដង ធៀបនឹងប្រទេស និងតំបន់ដែលមានប្រាក់ចំណូលទាបបំផុត។
ទិន្នន័យបានបង្ហាញឲ្យឃើញថា មកទល់ពេលនេះ ការចាក់វ៉ាក់សាំងសរុបនៅទូទាំងសកលលោកមានប្រមាណជាង ១ពាន់៦រយលានដូសហើយ ដែលបាននិងកំពុងចាក់នៅក្នុងប្រទេស ១៧៦ប្រទេសទូទាំងសកលោក។
ទាក់ទិននឹងការចាក់វ៉ាក់សាំងនេះដែរ សម្រាប់កម្ពុជាយើងវិញ គិតត្រឹមថ្ងៃទី ២៣ខែឧសភា មានអ្នកទទួលបានការចាក់វ៉ាក់សាំងលើកទី១សរុបមានជាង២លាននាក់ហើយ ខណៈដែលអ្នកបានចាក់គ្រប់ចំនួន២ដូសមានជាង១លាន៥សែននាក់ ចំនួននេះ គឺមានប្រមាណ២២%ហើយ នៃចំនួនគោលដៅចាក់វ៉ាក់សាំងជូនប្រជាជនឲ្យបានដល់១០លាននាក់របស់រាជរដ្ឋាភិបាលកម្ពុជា៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
